Ubushobozi buke bw’amashuri, ku isonga mu byadindije gahunda yo guha amata abanyeshuri

Yanditswe na Iradukunda Serge
Kuya 20 Gashyantare 2020 saa 12:23
Yasuwe :
0 0

Abayobozi b’amashuri mu Rwanda bavuga ko ubushobozi buke buri mu bituma batubahiriza amabwiriza bamaze umwaka bahawe yo guha buri mwana nibura igice cya litiro y’amata buri munsi.

Muri Mutarama 2019 nibwo Minisitiri w’Uburezi Dr Mutimura Eugène yavuze ko minisiteri ayoboye yatanze amabwiriza yo guha abana amata mu mashuri, bikajyana no kugaburira abana ibiribwa biva ku musaruro w’ibikomoka imbere mu gihugu, by’umwihariko mu gace ishuri riherereyemo.

Iki gihe Mutimura yabwiye abanyamakuru ko abayobozi b’ibigo by’amashuri, mu ifunguro risanzwe bagaburira abana hadakwiye kuburamo nibura igice cya litiro y’amata ku mwana ku munsi, mu mashuri y’incuke, abanza n’ayisumbuye.

Yagize Ati “Uko biteye uyu munsi abana babagaburira kawunga, ibishyimbo, umuceri n’ibindi, ariko turasaba ko abayobozi b’amashuri batekereza uburyo bushoboka bwose kugira ngo ibyo kurya bagaburira abana bashyiremo amata, kuko arahari kandi arahendutse hirya no hino mu byaro.”

Muri iki gihe Minisiteri yavugaga ko ibigo bigomba kwishakamo ubushobozi bwo kugura aya mata bitongereye amafaranga y’ishuri, ibintu abayobozi b’amashuri bavuga ko basanze bidashoboka kubera amikoro make.

Umuyobozi wa Kagarama Secondary school riherereye mu karere ka Kicukiro, Samuel Nkurunziza, yabwiye The NewTimes ko ku munsi w’Umuganura ubwo iri shuri ryatangaga amata ku banyeshuri baryigamo, litiro bayiguze amafaranga 400 bivuze ko igice cya litiro bakiguze 200.

Nkurunziza avuga ko kugira ngo bahe amata abanyeshuri 1055 iri shuli rifite nibura byabasabye kugura litiro 500, ibintu bikomeje gutyo byajya bibatwara miliyoni 18.9 ku gihembwe.

Nkurunziza avuga ko ibigo byari bikeneye ubufasha kugira ngo iyi gahunda yubahirizwe.

Ati “Guha amata abanyeshuri buri munsi utazamuye amafaranga y’ishuri cyangwa ay’ibyo kurya ntibishoboka, kereka tubonye ubufasha”

Nkurunziza agaragaza ko nk’ibigo bashima iyi gahunda ndetse bakayibona nk’iyafasha, ariko bakabura ubushobozi.

Iki kibazo Nkurunziza agisangiye n’abandi bayobozi b’amashuri barimo Callixte Havugimana uyobora urwunge rw’amashuri rwa Munini mu karere ka Ruhango, uvuga ko ubushobozi buke bw’amashuri butayemerera gushyira mu bikorwa iyi gahunda.

Ati “Amata ni ingenzi mu mikurire y’abana kubera ko bakeneye intugamubiri, gusa nk’uko ibintu bihagaze ubu, iyi gahunda ntiyashyirwa mu bikorwa kereka guverinoma itanze ubwunganizi”

Iyi gahunda yo guha amata abanyeshuri, ni umwe mu myanzuro yavuye mu mwiherero wa 16 w’abayobozi wabaye muri Werurwe 2019.

Iyi gahunda yari yitezweho ko izarushaho kongerera ubushobozi amakusanyirizo y’amata yo hirya no hino mu gihugu ndetse n’abikorera muri uru rwego bakarushaho kubona amasoko.

Umuyobozi w’urwunge rw’amashuri rwa Gishoma mu karere ka Rusizi, Mwitaba Anaclet, we avuga ko iyi gahunda bazatangira kuyishyira mu bikorwa muri Kamena uyu mwaka babifashijwemo n’inka ebyiri bazagura, zitanga umukamo ushobora kugera kuri litiro 40 ku munsi.

Ati “Turateganya kubikora muri Kamena uyu mwaka, ibyo nibyo dushobora gukora mu rwego rwo gushyira iyi gahunda mu bikorwa by’igihe kirekire”

Mwitaba avuga ko basanze kugura amata ku makusanyirizo byazajya bibahenda ndetse bikaba bitajyanye n’ubushobozi bw’ishuri.

Imibare ya Minisiteri y’uburezi yo mu 2018 yerekana ko muri uyu mwaka mu Rwanda habarurwaga Abanyeshuri miliyoni 3.08 bari mu mashuri abanza n’ayisumbuye.

Hagendewe kuri iyi mibare, byerekana ko iyi gahunda yari gutanga isoko ryagutse ku musaruro w’amata kubera ko nibura buri munsi muri iyi gahunda hari kujya hakenerwa litirio z’amata miliyoni 1.5.

Imibare ya Minisiteri y’Ubuhinzi n’Ubworozi yerekana ko buri munsi mu Rwanda haboneka umusaruro w’amata ungana na litiro Miliyoni 2.2, naho buri munyarwanda anywa litiro 70 z’amata buri mwaka.

Ibigo by'amashuri biragaragaza ko amikoro make ari imbogamizi kuri gahunda yo guha abana amata

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza