UBUHAMYA: Uko Bemeriki yari yaranze kumva Radiyo Rwanda ngo ni iy’abatutsi

Yanditswe na Philbert Girinema
Kuya 16 Nyakanga 2019 saa 11:58
Yasuwe :
0 0

Mu 1994 u Rwanda rwacuze imiborogo, abatutsi bicwa ubutitsa mu gihe cy’iminsi 100 gusa abarenga miliyoni bavutswa ubuzima, bigizwemo uruhare runini n’itangazamakuru cyane cyane radiyo rutwitsi ya RTLM.

Iyi radiyo ni imwe mu nzira mu nzira zifashishijwe mu guhamagarira abahutu kwica abatutsi, kuranga aho bihishe no kubambura ubumuntu babita amazina kugira ngo batere umwete abicanyi.

Valerie Bemeriki ni umwe mu banyamakuru bayikozeho ndetse kuva ubwo indege ya Habyarimana yahanurwaga, ari nabwo umugambi wa Jenoside watangiraga gushyirwa mu bikorwa byeruye, ntiyigeze ava aho RTLM yakoreraga kuko yakomeje ibiganiro byibanda ku guhamagarira abahutu kwica abatutsi no kuranga aho bihishe.

Magingo aya afungiye muri Gereza ya Mageragere aho amaze imyaka 20 nyuma yo guhamwa n’ibyaha bya Jenoside, agakatirwa igifungo cya burundu. Yemeye ibyaha anasaba imbabazi.

Mu gice cya mbere cy’ikiganiro aherutse kugirana na IGIHE aho afungiye muri Gereza ya Nyarugenge i Mageragere, twagarutse ku mikorere ya RTLM kuva mu ijoro ryo kuwa 7 Mata 1994. Muri iki gice cya kabiri, Bemeriki aragaruka ku buryo yafashwe yarahungiye muri RDC, uko yemeye icyaha n’ubutumwa ku bapfobya Jenoside bavuga ko itateguwe n’ibindi.

IGIHE : Jenoside irabaye irahagaritswe, byagenze bite ngo Bemeriki afatwe agezwe mu butabera ?

Bemeriki : Murabona FPR ifashe igihugu twarahunze, tugenda n’amaguru njye nagize n’ibibazo bitanyoroheye cyane nari nsanzwe ndi ikimuga. Barantaye, barigendera ntibari bazi niyo ndi.

Hari ahantu nageze ku mupasiteri w’umudiventisiti wanyakiriye mu rugo rwe ariko aho naho haza kuza ibintu by’umwuka mubi turahunga, duhungira mu rundi rugo rwari ahitwa Kambombo muri Congo iyo ruguru, aho hantu twagiye mu rugo rwari ruhari.

Nagumye aho ariko nshaka uburyo nagaruka, mu gihe nkishakisha kugaruka nibwo nafatiwe hafi ya Minove muri Kivu y’Amajyaruguru ubundi nari muri Kivu y’Amajyepfo, aho niho nafatiwe muri 1999, nibwo nazanwe mu Rwanda.

IGIHE : Umaze gufatwa uzanwe mu Rwanda watekerezaga iki ?

Bemeriki : Nzanwa mu Rwanda nari nziko nta muhutu n’umwe nzahasanga, nzasanga abahutu bose barishwe ko ntanumwe wari usigaye. Hari n’abo mu muryango wanjye nahasanze numvaga ko nzasanga bose barishwe n’abaturanyi b’abahutu numvaga nzasanga bose barishwe.

Ubwo baje kunjyana muri gereza babanza kunjyana muri Brigade nyibamo, nkajya mvuga ngo ntabakiriho hashize iminsi mbona murumuna wanjye araje, nti ‘narinziko mutakiriho ati oya turahari na mukecru arahari, nti reka da, ambwira n’abandi baturanyi. Nti narinziko mwapfuye mwashize kuko ariyo makuru nari mfite. Ati ‘Oya’.

IGIHE : Bitewe n’amateka ufitanye n’ikitwa radiyo, ujya ugira umwanya wo kuyikurikira ?

Bemeriki : Njya muri 1930 [Gereza ya Nyarugenge], nayigezemo muri 1999 mu kwezi kwa 12. Kera iby’intambara birangiye sinumvaga Radio Rwanda, kuko numvaga ari iy’abatutsi nkumva ari ibintu bya FPR nkibwira ko ari ibintu by’inzangano bitaduha uburyo bwo kubaho twebwe, ahubwo ari ukugira ngo bazatwice, nkumva ntashaka no kumva n’ibyabo.

Ariko noneho nkibuka ikintu nahuye nacyo cy’umukecuru aho nari nahungiye, ntangira kujya noneho numva Radio Rwanda, nkumva inyigisho nkumva amagambo ya Perezida Kagame cyane cyane, nkibaza niba ibyo bavuga niba ari ukuri nti ngomba kuzareba niba ibyo bavuga ari ukuri koko. Rimwe na rimwe nasohoka ngiye nko kwa muganga nkareba ukuntu umujyi wubatse nkakurikirana cyane gahunda za Leta zihari nkumva ziraboneye pe.

IGIHE : Uri mu bemera uruhare bagize muri Jenoside yakorewe Abatutsi bakabisabira imbabazi, iyi ntambwe wayiteye gute ?

Bemeriki : Hafunzwe umugabo witwaga Bucyana tuza kwiga isomo ry’imboneragihugu, tuza kwigaho amateka, batwigishije nsanga hari ibintu bimwe batubeshye, amoko dusanga ni 18 barayatubwira.

Bucyana aje gufungwa navugaga ko ari umututsi, ubwoko bwanjye n’ubwe dusanga burahuje, nti bimeze bite kuki njyewe ndi umuhutu wowe ukaba uri umututsi. Ati ‘ntabwo ubuhutu n’ubututsi bubaho barabashutse ibyo babigishije ni ubusa’.

Urabona ngewe natangiranye na revolusiyo yo muri 1959, yabaye mfite imyaka ine. Ntangira batubwira ko ubwoko ari abahutu n’abatutsi, barabyigisha bakajya bahagurutsa abari abahutu n’abari abatutsi bakabandika cyangwa bakajya batubwira ngo tubyandike ku mpapuro tugiye gukoreraho ibizamini, tukajya tubitanga byanditseho. Batwigishije amoko atatu ayo yandi 18 nta na rimwe bigeze batwigisha.

Ibyo rero byatumye mfata icyemezo cyo kwemera ko Jenoside yakorewe abatutsi yabaye, nemera ko yateguwe, nemera ko nanjye nayigizemo uruhare, bituma nsha bugufi nsaba imbabazi abanyarwanda bose, nsaba imbabazi guverinoma y’u Rwanda.

IGIHE: Byagufashe igihe kinini ngo wumve mu mutima wawe ubohotse, ushobora gusaba imbabazi, kugira ubutwari bwo gusaba imbabazi byaba ari ikintu cyagushimishije?

Bemeriki: Ntabwo navuga ko nishimye kuko mu mutima wanjye mpora nicuza. Ntabwo ari cyo cyatumye mvuga ngo mu mutima wanjye ndishimye, nasabye imbabazi ndishimye, oya ntabwo ari cyo kintu kibintera kuko hari n’abambaza bati aho ntiwasabye imbabazi ngo bakurekure?.

Iyo mba narasabye imbabazi ngo bandekure simba ndi imbere yanyu mbivuga, ndiho mbaganiriza ibyo nakoze mbibasubiriramo.

Ntabwo ari ukuvuga ngo kuba narireze nibyo bihinduhura umutima, ariko kuba nari reze ni kimwe mu byashoboraga kunduhura umutima, kuko umutima wanjye n’ubundi numvaga uremerewe cyane.

Maze kuvuga ibintu byose numvaga uri kugenda uruhuka buhoro buhoro, nubwo utararuhuka neza kuko ndacyazirikana inzirakarengane.

Njye rero icyo nishimira ni uko navuye muri bwa bunyamaswa nkaba naragarutse mu bantu, nkaba naragize umutima wa kimuntu kandi uzirikana ububabare bw’abandi. Kuko iyo ntekereje impfubyi, nkatekereza abapfakazi, ibyo byose binkora ku mutima.

IGIHE : Imyaka 25 irashize Jenoside ihagaritswe, ni iki gikomeye ubona abanyarwanda bagezeho ?

Bemeriki : Muri iyo myaka 25, mbona ikintu gikomeye gihari ni ubumwe n’ubwiyunge, ni cyo kintu tugomba no gushimangira, tukabushimangira cyane kugira ngo abanyarwanda babane kivandimwe. Kugira ngo abanyarwanda bamenye ko bya bindi byadutandunyaga by’amako, ubuhutu n’ubututsi ntabyo ahubwo ya moko yandi niyo ahari kandi na yo ndumva ntaburuta ubundi, tugomba gufatanya, tukuzuzanya, tukubaka igihugu cyacu.

Ntekereza ko tugomba no kubyigisha cyane cyane urubyiruko kuko ntirwamenye ibyabaye mbere ya Jenoside. Rero bagomba kubyiga bakamenya ko ibyo kintu cyateguwe.

Ni nayo mpamvu mvuga nti abo bantu bayiteguye bari hehe ? Ni bacye cyane nkubwira ko bafashwe, abenshi ntibarafatwa, abenshi bari iyo mu muhanga, bibereye mu Burayi no muri Amerika.

Njyewe umwanzuro nafashe ni uwo kuva muri ibyo bintu by’ingegabitekerezo bishingiye ku moko y’ubuhutu n’ubutusi, nkumva ko ahubwo hariho umunyarwanda gusa.

IGIHE : Wabaye umunyamakuru kandi itangazamakuru riracyakora, abanyamakuru bariho hari n’abashobora kugira imitekerereze itandukanye. Nk’umuntu wabibayemo ni iki wabasangiza mu myitwarire bakwiye kugira ?

Bemeriki : Abanyamakuru ntibakwiye kubogama. Ubundi burya tugira amategeko agenga umwuga w’itangazamakuru ariko igihe cya jenoside ntabwo twigeze tuyubahiriza. Mu by’ukuri twakoze ibyo batubwiye n’ibyo dushatse.

Icyo nsaba abanyamakuru ni uko muri iki gihe bagombye gushishoza bagakurikiza n’amabwiriza agenga umurimo w’itangazamakuru. Ntibabogame, nibajye hirya no hino ariko icyo bagamije nabo ari ukubaka igihugu kandi mu kubaka igihugu nabo bajijura abaturage. Ntibabajijure muri bwa buryo bwo kuvuga ngo uyunguyu ni umuhutu undi ni umututsi, ahubwo bakumva ko bose ari abanyarwanda.

IGIHE : Hari abagifite ingengabitekerezo ya Jenoside, ni iki wababwira ?

Bemeriki: Iyi myaka 25 ishize hakaba hari abagifite ingengabitekerezo ni byo bintera nanone ikibazo nkibaza mu by’ukuri niba abantu bakimeze gutyo bizagenda bite?. Abo bantu kuki batabohoka, muri bo bagire umutima wa kimuntu aho kugira ngo bakomeze bagire umutima wa kinyamaswa?.

Icyo njye mbona ni uko twakomeza tugashimangira ubumwe n’ubwiyunge, tukabwigisha cyane, tugafatanya n’abandi tukareba icyatugirira akamaro aho kugira ngo turebe icyadutandukanya cyaturyanisha. Niturebe icyakubaka igihugu cyacu. Njye mbona ari cyo cya mbere.

Ikiganiro cya mbere na BemerikiMu cyumba cya RTLM: Inkuru yo ku wa 7 Mata 1994 (Video)

Ikiganiro na Bemeriki agaruka ku buryo yemeye ibyaha

Ni we wari kuri Radiyo RTLM umunsi umugambi wo gutsemba Abatutsi utangira gushyirwa mu bikorwa nyuma y'igihe kinini utegurwa. Yarangaga kuri radiyo inzu z'Abatutsi, hanyuma Interahamwe zikajya kubahiga
Amaze imyaka 20 afungiye ibyaha bya Jenoside nyuma yo gufatirwa muri RDC aho yari yarahungiye
Bemeriki Valerie yabaye Umunyamakuru kuri RTLM ndetse yumvikanye inshuro nyinshi ashishikariza Abahutu kwica Abatutsi
Uyu munara munini ni wo wakoreshwaga na RTLM. Yakoreraga mu nyubako iri mu Mujyi rwagati ahari Car Free Zone ubu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza