00:00:00 IGIHE NETWORK KN KINYARWANDA EN ENGLISH FR FRANCAIS

Ubuhamya bwa Bayingana Uzziel wiciwe umuryango muri Jenoside, bigakorwa n’abapasiteri basenganaga

Yanditswe na Bukuru JC
Kuya 2 Gicurasi 2021 saa 09:00
Yasuwe :
0 0

Bayingana Uzziel ni umwe mu barokotse Jenoside yakorewe Abatutsi mu Kagari ka Munanira II mu Murenge wa Nyakabanda muri Nyarugenge, ufite ubuhamya bukomeye bw’uburyo Jenoside yakoranywe ubugome bukabije muri ako gace, kugeza ubwo n’abihaye Imana babigizemo uruhare.

Papa wa Bayingana, Pasiteri Iyamuremye Amon yishwe na bagenzi be bari abapasiteri mu Itorero ry’Abadiventisiti b’Umunsi wa Karindwi, bamwicisha grenade bamushinja ko umwana we (Bayingana) yagiye muri FPR Inkotanyi.

Ubu buhamya Bayingana yabutanze kuri iki Cyumweru mu muhango wo kwibuka Jenoside yakorewe Abatutsi, wateguwe n’abarokotse Jenoside mu Kagari ka Munanira II ku bufatanye n’ubuyobozi.

Abitabiriye uwo muhango bari bake mu rwego rwo kubahiriza amabwiriza yo kwirinda Covid-19. Wabereye ahashyinguye umuryango wa Pasiteri Iyamuremye Amon wazize Jenoside yakorewe Abatutsi mu 1994.

Muri uyu muhango, Bayingana Uzziel yatanze ubuhamya bw’uburyo papa we Pasiteri Iyamuremye n’umuryango we bishwe muri Jenoside yakorewe Abatutsi mu 1994, azira ko yari afite umwana wari waragiye mu gisirikare cya FPR Inkotanyi. Bishwe tariki 8 Mata 1994 hashize umunsi umwe Jenoside itangiye mu gihugu hose.

Bayingana Uzziel w’imyaka 69 y’amavuko, yavuze ko ikibabaje kurushaho umuryango we wishwe n’abari abapasiteri basenganaga na Iyamuremye.

Abishe uwo muryango barimo Pasiteri Ayigihugu na Ishimwe Samuel, bafatanyije n’Interahamwe.

Ati “Data ni njye yazize. Yishwe n’abapasiteri babiri basenganaga ubwo bumvaga ko afite umwana uri mu Nkotanyi. Baraje bamusanga iwe hano mubona habaye itongo, maze bamwicana na mama, na bashiki banjye babiri, mwishywa wanjye ndetse n’umugore wa mukuru wanjye. Baraje batera grenade ebyiri mu nzu bari barimo, bahita bapfa bose nta n’umwe uvuyemo.”

Nubwo abo mu muryango we bishwe bazira uko bavutse, Bayingana ashima ingabo za FPR Inkotanyi ko zabashije kurokora abari bakiri bazima, zikanahagarika Jenoside.

Yashimye kandi Guverinoma y’Ubumwe yongeye kubanisha neza Abanyarwanda nta macakubiri, kandi bakaba bakomeje kurwanya Ingengabitekerezo ya Jenoside yakorewe Abatutsi mu 1994.

Umunyamabanga Nshingwabikorwa w’Akagari ka Munanira ya II, Habimana Jules, yihanganishije Bayingana, amubwira ko u Rwanda ubu rufite ubuyobozi bwiza bwitaye ku barokotse Jenoside, kandi buhora buhashya icyahembera amacakubiri cyose.

Nyuma yo kuva ahashyinguye umuryango wa Pasiteri Iyamuremye Amon, abitabiriye uwo muhango bahise bajya kuremera umwe mu bacitse ku icumu rya Jenoside yakorewe Abatutsi utishoboye, bamuha ibirimo ibiribwa n’ibindi bikoresho byo kumufasha.

Uyu muhango wari witabiriwe n’inzego zitandukanye zo mu Murenge wa Nyakabanda harimo Habimana Jules usanzwe ari Umunyamabanga Nshingwabikorwa w’Akagari ka Munanira ya II; Umuyobozi w’Umuryango wa FPR Inkotanyi ku rwego rw’Umurenge wa Nyakabanda, Kayiranga Vedaste, abahagarariye abacitse ku icumu rya Jenoside yakorewe Abatutsi, abayobozi b’imidugudu n’abandi.

Hakozwe urugendo rwo kwibuka Abatutsi bazize Jenoside
Bahagurukiye ku Biro by’Akagari ka Munanira ya II bakora urugendo rugana ahashyinguye umuryango wa Iyamuremye wishwe n’abapasiteri bagenzi be muri Jenoside
Habanje gufatwa umunota umwe wo kwibuka Abatutsi bazize Jenoside mu 1994
Hafashwe umunota wo kwibuka inzirakarengane za Jenoside yakorewe Abatutsi
Habanje gufatwa umunota umwe wo kwibuka Abatutsi bazize Jenoside mu 1994
Ahashyinguye umuryango wa Pasiteri Iyamuremye Amon
Umuryango wa Bayingana Uzziel wasabwe gukomeza gutwaza muri ibi bihe
Abarimo Umuyobozi wa FPR Inkotanyi mu Murenge wa Nyakabanda, Kayiranga Vedaste, bifatanyije n'umuryango wa Bayingana kwibuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .