Televiziyo ya Manchester united igiye kujya igaragara kuri StarTimes

Yanditswe na Ntabareshya Jean de Dieu
Kuya 26 Gashyantare 2021 saa 01:42
Yasuwe :
0 0

Ikipe yo mu Bwongereza ikina muri Shampiyona y’icyiciro cya mbere muri iki gihugu, Premier League, Manchester United yagiranye amasezerano na StarTimes agamije kwegera abakunzi bayo binyuze mu gukorana na televiziyo y’iyi kipe izwi nka MUTV.

Aya masezerano yo gukorana na Manchester United azayifasha kugera ku bakunzi bayo batari bake muri Afurika by’umwihariko ibihugu bisaga 30 by’Afurika yo munsi y’ubutayu bwa Sahara.

Nko mu bihugu birimo Nigeria, Afurika y’Epfo, Kenya na Ghana bazabona umwihariko wo kugira amakuru yose ajyanye na Manchester United amasaha 24 ku yandi bifashishije imbuga za StarTimes.

MUTV ni umuyoboro ukomeye ku isi ukunda kunyuraho ibikorwa binyuranye bya Manchester United nkuru n’iy’abakiri bato, harimo ibiganiro by’abatoza n’itangazamakuru, abakinnyi, amakuru y’ikipe n’ibyegeranyo ku batsindiye ibihembo runaka.

Umuyobozi ushinzwe itangazamakuru muri Manchester United, Phil Lynch yavuze ko bishimiye gukorana na StarTimes nka kimwe mu bigo byabafasha kugera kuri benshi.

Ati “Tunejejwe no kugira abakunzi amagana muri Afurika kandi aya masezerano azatuma baba hafi n’ikipe binyuze mu biganiro bitandukanye bizajya binyura ku muyoboro wa MUTV.”

“MUTV ni umuyoboro wacu w’ingenzi uduhuza n’abakunzi bacu hirya no hino ku Isi, turabyishimiye gukorana na StarTimes kuko bizatuma igera kure.”

Umuyobozi wungirije ushinzwe Siporo muri StarTimes, Kritsen Miao yavuze ko gukorana na Manchester United nk’ikipe ikomeye ari ingirakamaro.

Ati “Manchester United iri mu makipe akomeye ku Isi. Twishimiye gusangiza abakunzi b’umupira w’amaguru muri Afurika MUTV kandi biri mu rwego rwo kongerera abafatabuguzi bacu ubumenyi ku ikipe.”

Manchester United yubatse amateka mu bihe binyuranye cyane ko mu myaka 142 imaze yabashije gutwara ibikombe bisaga 66 byose hamwe , ikaba ifite abafana basaga miliyari 1.1 hirya no hino ku Isi.

StarTimes muri Afurika ifite abafatabuguzi basaga miliyoni 13 bakoresha antene z’igisahani, miliyoni 20 bakoresha antene z’udushami, bakagira imiyoboro isaga 600. Iyi miyoboro igizwe 75% bya televiziyo zo mu bihugu bya Afurika na 25% mpuzamahanga.

Startimes yasinyanye amasezerano na televiziyo ya Manchester United igamije kugera kuri benshi muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .