Sudani y’Epfo: Kompanyi y’indege yahagaritswe kubera impanuka

Yanditswe na Muhonzire Sylvine
Kuya 4 Werurwe 2021 saa 09:29
Yasuwe :
0 0

Perezida wa Sudani y’Epfo, Salva Kiir Mayardit, yategetse ko Kompanyi y’indege yitwa ‘South Sudan Supreme Airlines’ ihagarikwa nyuma yuko imwe mu ndege zayo ikoze impanuka ku wa Kabiri w’iki cyumweru igahitana abantu bose bari bayirimo.

BBC yatangaje ko iyi kompanyi yari isanzwe ikorera ingendo zayo mu gihugu. Imwe mu ndege zayo yakoze impanuka ubwo yavaga ku Kibuga cy’indege giherereye mu gace kitwa Pieri yerekeza Juba, ikorera impanuka mu Burasirazuba bwa Leta ya Jonglei.

Iyi ndege yahitanye umupilote w’Umunyakenya wari uyitwaye, uwari uri kumufasha ukomoka muri Sudani y’Epfo ndetse n’abandi bagenzi b’abagore barindwi.

Mu nyandiko Perezida Salva Kiir yanditse ahagarika iyo kompanyi yagize ati “Guhagarika kompanyi y’indege ni imwe mu ngamba zifashwe kugira ngo duhangane n’izi mpanuka z’indege za hato na hato zidashobora gutangirwa, mbere yuko hajyaho amategeko akomeye agenga kompanyi z’indege zigenga.”

“Izi ngamba zifashwe ni ngombwa kuri ibi bigo bifite Kompanyi zitwara indege kugira ngo bikemure ikibazo cy’izindi ndege za ‘South Sudan Supreme’. Ni ngombwa kandi ko tugira uruhare mu gutuma rubanda rugarurira ikizere ingendo zo mu kirere zikorerwa hagati mu gihugu.”

Kompanyi yahagaritswe ni iy’umuherwe witwa Ayii Duang Ayii akaba n’Umuyobozi Mukuru w’Ikigo cyo muri Sudani y’Epfo cy’abikorera.

Si ubwa mbere indege zikoze impanuka muri iki gihugu kuko no mu mwaka wa 2020 muri Kanama abantu umunani baguye mu mpanuka y’indege yabereye ahitwa Kemeru nyuma y’iminota mike ivuye ku Kibuga cy’Indege cya Juba.

Mu 2015 nabwo abantu 36 bapfiriye mu mpanuka y’indege y’Abarusiya yari ivuye Juba mu gihe no mu 2018 abantu 19 baguye mu mpanuka y’indege yari itwaye abagenzi bavuye Juba bagiye mu gace kitwa Yirol.

Aha ni muri Kanama 2020 ubwo habaga impanuka y'indege yahitanye abantu barindwi yari ivuye mu Mujyi wa Juba
Indege yakoze impanuka ni iyavaga Pieri igiye Juba igakorera impanuka hagati mu rugendo, ahitwa Jonglei/ Ifoto: BBC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .