Ruracyageretse ku mitungo ya Jean Pierre Bemba iri mu Rwanda, ibirego bine mu nkiko z’ubucuruzi

Yanditswe na Twarabanye Venuste
Kuya 16 Kamena 2020 saa 11:59
Yasuwe :
0 0

Abanyamibagane ba Société d’Exploitation Agricole du Rwanda (E.A.R Ltd) bongeye guhaguruka nyuma yo kubona itangazo rya cyamunara ryatanzwe na Kayitana Imanzi Emmanuel ryo kugurisha ibibanza by’iyo sosiyete bakiburanira.

Hashize igihe abanyamigabane ba E.A.R Ltd bari mu nkiko bapfa ibibanza by’iyo sosiyete biherereye mu Murenge wa Remera, mu Karere ka Gasabo.

Ibyo bibanza ni umutungo wa sosiyete EAR yatangiye mu 1990, igatangizwa na Bemba Saolana se wa Jean Pierre Bemba wabaye Visi Perezida wa RDC, Majyambere Silas, umuvandimwe we Ngendahimana Ezechiel n’abandi banye-Congo.

Ishingwa n’ibibazo byaje muri E.A.R Ltd

Mu 1989, muri Zaїre hari umunyemari ukomeye witwa Bemba Saolona akaba inshuti ya Perezida Mobutu Sese Seko. Mobutu yaje gusura u Rwanda barazana, Saolona amenyana na Perezida Habyarimana ndetse amusaba kuba yashora imari mu Rwanda.

Saolona amaze kubyemera, yahujwe na Majyambere Silas na we wari umunyameri mu Rwanda ngo barebe ibyo bashoramo imari.

Bombi baje kwemeranya gushora imari mu bijyanye n’ibihingwa byoherezwa hanze, biyemeza gushing Société d’Exploitation Agricole du Rwanda (E.A.R Ltd) yagombaga gutunganya ikawa.

Muri iyo sosiyete, Saolona yashyizemo imigabane 59 %, Majyambere binyuze muri sosiyete ye Sogetra ashyiramo imigabane 20%, umuvandimwe we witwaga Ngendahimana Ezechiel ashyiramo imigabane ingana na 20 % naho abandi banye-Congo barimo na Jean Pierre Bemba umwana wa Saolona bashyiramo 1% by’imigabane.

Baguze ibibanza bibiri byo gukoreramo muri Rukiri mu murenge wa Remera, imbere y’ahahoze Alpha Palace Hotel, banatumiza imashini zo gutangira gutunganya umusaruro.

Mu gihe bari baratumije imashini, hatangiye urugamba rwo kubohora igihugu, Saolona agira impungenge umushinga basa n’abawuhagaritse.

Jenoside irangiye, Saolona yandikiye ba bantu bose yishyuriye imigabane muri EAR Ltd abamenyesha kumwishyura ariko ntibabikora na Majyambere amumenyesha ko hari ibindi bibazo afite mu bucuruzi bwe ku buryo atajya mu byo kwishyura imigabane, bityo ko imigabane ye ayitwara. Saolona yasigaye afitemo imigabane ingana na 99 %.

Kera kabaye mu 1997, u Rwanda rwohereje Kayitana Imanzi Emmanuel ngo arubere Ambasaderi i Kinshasa, aza guhura na Saolona, amusaba kumukurikiranira imitungo ye iba mu Rwanda. Yavugaga EAR Ltd yari afitemo imigabane anayibereye umuyobozi w’inama y’ubutegetsi.

Kayitana yatangiye kujya akodesha bya bibanza bya EAR Ltd amafaranga akayashyikiriza Saolona. Mu 2005 Saolona ngo yaje kubona ntaho EAR Ltd igana, aza kumenyana na Dunia Bakarani Faustin wanabaye umudepite muri Congo bemeranya ko Bakarani agura iyo mitungo iri mu Rwanda.

Mu kuyigura bisa naho aribwo ibibazo byose byatangiye. Bakarani yishyuye Saolona ibihumbi bigera ku 160 by’amadolari, amuhuza na Kayitana wari ushinzwe gucunga iyo mitungo, ngo ayimushyikirize.

Kayitana na Bakarani bagiye mu biro by’Umuyobozi w’Umujyi wa Kigali basaba guhabwa impapuro z’ihererekanyamutungo n’iz’ubugure, bakora inama bemeza ko ibibanza byari ibya Saolona bihawe Bakarani, hakorwa inyandikomvugo na noteri ayisinyaho, baherezwa mu karere ka Gasabo ngo abe aribo babakorera ihererekanyamutungo.

Aho niho ibyo bari bemeranyije byahindutse Kayitana amubwira ko ihererekanyamutungo ritarakorwa kuko hari ibyo Saolona amugomba atamuhaye. Byageze kuri Saolona atanga ikirego urukiko rwemeza ko ihererekanyamutungo n’ubugure byubahirije amategeko ariko nubundi basubiye ku karere ka Gasabo biranga.

Ibibazo byarakomeje kugeza ubwo, Saolona apfuye mu 2009, iby’imigabane muri EAR Ltd bigatangira gukurikiranwa n’umuhungu we Jean Pierre Bemba.

Muri izo manza Kayitana yaje kwerekana impapuro zerekana ko mu 1998, Saolona yamuhaye imigabane ingana na 40 % muri EAR Ltd ndetse anamuha ububasha bwo kuyihagararira, ndetse avuga ko atemera ko ibibanza bya sosiyete bigurishwa Bakarani.

Mu 2017, urukiko rw’ikirenga rwemeje ko Kayitana afite imigabane ingana na 40 % kandi ari na we uhagarariye EAR Ltd. Bakarani yatanze ikirego avuga ko ari impapuro mpimbano, Kayitana atsindwa mu rukiko rw’ibanze bamukatira imyaka irindwi y’igifungo, ajuriye mu rukiko rwisumbuye bamugira umwere.

Mu 2019 uruhande rwa Bakarani n’urwa Saolona ruhagarariwe na Jean Pierre Bemba batanze ikirego mu rukiko rw’Ikirenga, basaba gusubirishamo urubanza rwemeje ko Kayitana ari we uhagarariye EAR Ltd kandi afitemo imigabane.

Cyamunara yongeye guhindura ibintu

Muri icyo gihe cyose ntabwo Sosiyete yari yanditse mu mategeko, Kayitana aza kujya kuyandikisha, imaze kwandikwa yandikira umujyi wa Kigali awusaba uburenganzira bwo kugurisha bya bibanza avuga bitajyanye n’icyerekezo.

Babanje kumwangira gusa nyuma abantu baza kumugira inama bamubwira ko kubera ko urukiko rw’ikirenga rwari rwaremeje ko hari imigabane Salaona yamuhaye ingana na 40% akaba anahagarariye sosiyete ashobora kugurisha.

Yagiye mu rukiko rw’ubucuruzi yizeye ko rutazamwima ububasha narwo ruramwangira ruvuga ko atagurisha ibintu bya sosiyete ikiriho kandi nta cyemezo cyayo afite cyo kugurisha.

Yahise ajya mu rukiko rw’ubujurire rw’ubucuruzi nabwo bamwima uburengenzira aratsindwa. Nyuma ngo abantu bamugiriye inama ko ashobora kugurisha wenyine, ashaka umuhesha w’inkiko kandi hari icyemezo cy’urukiko kibimubuza, akora itangazo ryo kugurisha.

Itangazo ryo kugurisha mu cyamunara risohotse, niryo ryongeye guca ibintu. Dunia Bakarani Faustin yahise ahaguruka, kuko nubwo bari barakuyeho ubugure yari yakoze batamugaruriye agaciro k’ibibanza yari yaraguze.

Bakarani yahise atanga ikirego cyo gutambamira cyamunara, abaza umuhesha w’inkiko ububasha bwo kugurisha aho abuvana, amubwira ko yabuhawe na EAR ltd ihagarariwe na Kayitana. Cyamunara yahise ihagarara, atanga ikirego mu rukiko rw’ubucuruzi.

Abo kwa Jean Pierre Bemba nabo bahise bamenya ko Cyamunara igiye kuba na bo batanga ikirego. Buhuru Pierre Célèstin usanzwe wunganira Bakarani yavuze ko muri rusange hongeye kubura ibirego bine.

Ati “Ubwo rero hari ibirego bine mu nkiko z’ubucuruzi; ikirego cy’abazungura ba Bemba cyo gutambamira Cyamunara n’icyo kwambura Kayitana ububasha yihaye, Dunia nawe atanga ikirego cy’iremezo cyo kugarurirwa agaciro k’ikibanza kuko yari yarabiguze muri 2007 agaciro yabitanzeho ubwo kagomba kubarwa uyu munsi, atanga rero n’ikirego cyihutirwa cyo kugira ngo ibyo byamunara bibe bihagaritswe.”

Ku wa 14 Kamena nibwo ikirego cyihutirwa cy’abazungura ba Bemba cyo guhagarika Cyamunara cyasohotse, urukiko rutegeka ko cyamunara ihagarara kubera ko hari ibirego by’iremezo. Biteganyijwe ko kuwa 17 Kamena hazaba urubanza rwa Bakarani ku kirego cyihutirwa na we yatanze asaba ihagarikwa rya Cyamunara.

Ku rundi ruhande ariko mu rubanza rw’abazungura ba Bemba baregera ihagarikwa rya Cyamunara, hari umuntu utazwi wajemo mushya avuga ko aburanira Bakarani avuga ko yemera ko Cyamunara iba nta kibazo bakazagabana amafaranga.

Me Buhuru Pierre Célèstin usanzwe yunganira Bakarani yahise ahamagara umukiliya we basanga nta n’umwe umuzi. Byaragenzuwe basanga ni abandi bantu bamuhaye ububasha batazwi, ibyo yavugaga biteshwa agaciro arahagarikwa.

Uhereye ibumoso ni Jean Pierre Bemba, Silas Majyambere na Kayitana Imanzi Emmanuel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .