RIB yahamagaje Barafinda Fred

Yanditswe na Habimana James
Kuya 7 Gashyantare 2020 saa 03:00
Yasuwe :
0 0

Urwego rw’Igihugu rw’Ubugenzacyaha, RIB, rwahamagaje Barafinda Sekikubo Fred ngo azarwitabe ku cyicaro gikuru cyarwo, tariki 10 Gashyantare 2020.

Barafinda yibukwa cyane ubwo yatunguranaga ajyanye kandidatire mu matora y’umukuru w’igihugu yabaye muri Kanama 2017, ariko Komisiyo y’Igihugu y’Amatora igasanga atujuje ibisabwa.

Urwandiko RIB yageneye Barafinda ku wa 5 Gashyantare 2020, rumumenyesha ko "utumiwe ku itariki ya 10/2/2020, isaha ya saa mbili za mu gitondo ku Kimihurura ku cyicaro gikuru cy’Ubugenzacyaha, aho dukorera. Tugusabye kuza witwaje uru rupapuro hamwe n’Irangamunta.”

Umuvugizi wa RIB, Umuhoza Marie Michelle, yabwiye IGIHE ko uyu mugabo koko yahamagajwe, gusa yirinda kugira byinshi avuga ku mpamvu zabyo.

Yagize ati “Urwego rw’Igihugu rw’Ubugenzacyaha iyo rushaka umuntu rushobora kumutumiza mu nzira nyinshi, n’iyi ni imwe mu nzira yo kumutumiza kugira ngo rugire ibyo rumubaza. Ntabwo twavuga ko twamuhamagaye ngo tumubaze kuri iki cyaha iki n’iki, twaramuhamagaye kugira ngo agire ibyo asobanura.”

Yavuze ko umuntu ashobora no kuba nta cyaha akurikiranweho, kuko ashobora no kuba umutangabuhamya.

Mu makuru akeruka kunyuza ku mbuga za YouTube, Barafinda asobanura uburyo aherutse gufatwa n’abakozi ba RIB ariko akaza kubacika. Mu bindi biganiro yagiye yumvikana anenga leta ku bikorwa nko gukuraho ibikorwa biri mu bishanga no mu manegeka, agakoresha n’andi magambo akomeye kuri gahunda zinyuranye.

Tariki 13 Kamena 2017, Barafinda yabwiye itangazamakuru ko yigeze kumara igihe avurirwa i Ndera ahakurikiranirwa abafite indwara zo mu mutwe, ariko ntiyasobanuye igihe yagiriyeyo cyangwa uko yahavuye.

Barafinda yahamagajwe n'urwego rw'ubugenzacyaha ngo agire ibyo asobanura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .