Qatar Airways ishobora kugura imigabane muri RwandAir

Yanditswe na Evariste Nsengimana
Kuya 14 Ukwakira 2019 saa 07:10
Yasuwe :
0 0

Guverinoma y’u Rwanda n’iya Qatar ziri mu biganiro bishobora gutuma zigurishanya imigabane hagati ya Sosiyete zazo z’Indege za RwandAir na Qatar Airways mu rwego rwo kwagura ibikorwa byazo.

Amakuru y’iryo gurisha ashingiye ahanini ku masezerano n’ibiganiro byagiye biba mu minsi ishize, bica amarenga ko Qatar ishobora kuba ishaka kwagurira ibikorwa byayo by’ubwikorezi bwo mu Kirere muri Afurika inyuze kuri Sosiyete y’u Rwanda ya RwandAir.

Impuguke mu by’ubwikorezi bw’indege zigaragaza ko uyu mugambi wa Qatar wo kugura imigabane muri RwandAir bishobora kuba uburyo yahisemo bwayifasha kwagura ingendo muri Afurika nyuma y’uko ifatiwe ibihano n’ibihugu bituranye.

Mu 2017 nibwo Sosiyete y’Indege ya Qatar yakumiriwe gukorera ingendo mu bihugu bituranye nka Arabie Saoudite, Leta Zunze Ubumwe z’Abarabu na Bahrain bitewe n’ubwumvikane bucye bwari hagati yabyo.

Impuguke zisanga kuba Qatar yagura imigabane muri RwandAir byayibera icyambu kiyifasha kwigarurira isoko ryo ku mugabane wa Afurika.

The East African yatangaje ko amakuru yizewe ifite avuga ko ibiganiro byo kugura iyo migabane bigiye kugera ku musozo nubwo bitaratangazwaho byinshi.

Mu kiganiro kigufi iki kinyamakuru cyagiranye n’Umuyobozi Mukuru wa RwandAir, Yvonne Makolo, kimubaza ingano y’imigabane igiye kugurishwa, imiterere y’amasezerano, igihe bizashyirirwa mu bikorwa n’ibindi, yavuze ko “nta kintu mfite navuga kuri Qatar, ntacyo nabivugaho.”

RwandAir imaze igihe yagura ibikorwa byayo birimo kwagura ibyerekezo hirya no hino ku Isi.

Impuguke mu bwikorezi bw’indege zivuga ko RwandAir na Qatar Airways zishobora kungukira muri aya masezerano bishingirwa ku kuba ubusanzwe RwandAir yakeneraga ubufasha mu bya tekinike no gusana indege muri Qatar.

Perezida Kagame kandi aheruka kuvuga ko u Rwanda rushaka gufungura amarembo ku bikorera bifuza kugura imigabane RwandAir mu rwego rwo kwagura ibikorwa byayo.

Muri Mata uyu mwaka ubwo Umuyobozi w’Ikirenga wa Qatar (Emir) Sheikh Tamim bin Hamad al Thani yasuraga u Rwanda yagiranye ibiganiro na Perezida Kagame banashyira umukono ku masezerano arimo ayo kwagura ingendo n’ishoramari mu by’indege.

Icyo gihe Qatar yasezeranyije u Rwanda gushora imari mu mirimo yo kubaka ikibuga cy’indege cya Bugesera.

Isinywa ry’ayo masezerano n’ibiganiro impande zombi zagiranye bishobora kuba ari mu rugendo rwo kumvikana uburyo bwo kugura imiganane hagati ya Qatar Airways na RwandAir.

Muri Gashyantare uyu mwaka Inteko Ishinga Amategeko yemeje amasezerano y’ishoramari hagati ya Leta y’u Rwanda n’iya Qatar yashyizweho umukono umwaka ushize, akaba ari mu byahaye inzira kwagura ubufatanye mu by’ishoramari hagati y’ibihugu byombi.

Inama mpuzamahanga mu by’ubwikorezi bw’indege iheruka kubera i Kigali uyu mwaka, Umuyobozi Mukuru wa Qatar Airways, Akbar Al Baker, yavuze ko bari mu rugendo rwo kwagurira ibikorwa byayo muri Afurika.

Uretse Qatar Airways ivuzweho ko ishaka kugura imigabane muri RwandAir, hashize igihe bivuzwe ko Ethiopian Airlines nayo yifuje kuguramo imigabane ariko nta kiragerwaho, nta n’ubwo byigeze bitangazwa ko ibiganiro byaba byarahagaze.

Qatar Airways ishobora kugura imigabane muri RwandAir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza