Prof Sam Rugege wigeze kuyobora urukiko rw’Ikirenga yashyizwe mu bahuza ba mbere bigenga b’inkiko

Yanditswe na Ferdinand Maniraguha
Kuya 18 Kanama 2020 saa 11:18
Yasuwe :
0 0

Prof Sam Rugege wahoze ari Perezida w’Urukiko rw’Ikirenga ni umwe mu bantu 51 bari ku rutonde rw’abahuza cyangwa abunzi bigenga, bagiye kujya bifashishwa n’abagana inkiko bashaka ko ibibazo byabo birangizwa mu bwumvikane.

Hashize imyaka umunani mu nkiko hashyizweho uburyo bw’ubwunzi, aho ababuranyi bashobora guhitamo kurangiza ibibazo bafitanye bitabaye ngombwa ko hitabazwa umucamanza.

Itegeko rigenga uko bikorwa ryagiye rivugururwa. Mbere abanditsi b’inkiko nibo bari bemerewe guhuza ababuranyi mu nama ntegurarubanza ku buryo iyo bishoboka kandi babishaka, bungwa mu bwumvikane.

Itegeko ryaravuguruwe kugeza n’ubwo umucamanza yemerewe kuba yatangiza uburyo bw’ubwunzi urubanza rugezemo hagati mu gihe ababuranyi babyemera.

Umwaka ushize nibwo hashyizweho amabwiriza ya Perezida w’Urukiko rw’Ikirenga yerekeye ubwunzi mu manza z’imbonezamubano, iz’ubucuruzi, iz’umurimo n’iz’ubutegetsi, hemezwa ko hajyaho n’abunzi bigenga bashobora kwitabazwa n’ababuranyi.

Tariki 28 Nyakanga 2020, hagiye hanze urutonde rw’abantu 51, ruriho amazina y’abemerewe kuba abahuza cyangwa abunzi bigenga bazajya bunganira abanditsi b’inkiko n’abacamanza mu gihe ababuranyi babahisemo.

Mu rutonde rwashyizwe hanze, higanjemo impuguke mu mategeko n’abandi b’inararibonye mu ngeri zitandukanye. Harimo nka Prof Sam Rugege wigeze kuba Perezida w’urukiko rw’ikirenga, Umuyobozi w’urugaga rw’abavoka mu Rwanda, Kavaruganda Julien Gustave, Umuyobozi w’urugaga rw’inzobere mu bwubatsi mu Rwanda, Papias Kazawadi Dedeki n’abandi.

Umuvugizi w’inkiko z’u Rwanda, Harrison Mutabazi yabwiye IGIHE ko aba bahuza batoranyijwe nyuma yo gusanga bujuje ibisabwa birimo gukurikirana amahugurwa yemewe n’Urwego rw’Ubucamanza no kuba bakurikira amahugurwa ahoraho mu bwunzi.

Yavuze ko aribo bahuza ba mbere bigenga bagiyeho ku birego byaregewe inkiko, bakaba bitezweho kuzamura umubare w’ibirego birangizwa mu bwumvikane aho kurangizwa n’inkiko.

Ati “Twabonye akazi inkiko zifite ari kenshi kuko ntabwo tuburanisha imanza mbonezamubano gusa, tugira imanza nshinjabyaha n’izindi. Hari igihe ubona ubwinshi bw’akazi bafite no guha umwanya uhagije ubwunzi bishobora kudakunda.”

“Bizajya bifasha ko umwanya abacamanza bari kumara bari mu bwunzi, bakomeza n’izindi manza. Twiteze ko amakimbirane atuma abantu batana azagabanyuka. Niba abantu barazaga mu rukiko barebana ay’ingwe umwe agatsinda undi agatsindwa, umwe agenda areba undi nabi n’abamukomokaho bikaba uko ariko iyo abantu bahujwe bakungwa, bihita bituma ubumwe bugaruka.”

Prof Sam Rugege, umwe mu bagizwe abahuza yabwiye IGIHE ko ubusanzwe iyo abantu bagiye mu rukiko, hari umwanya badahabwa wo gusobanura neza ikibazo cyabo nyamara mu bunzi bahabwa umwanya uhagije.

Yagize ati “Ikigamijwe ni uko umuhuza abashyira hamwe bakavuga ibibazo byabo, bakaganira bagamije kugera ku mwanzuro bari bwishimire bombi. N’aho batakwishima ijana ku ijana bagira kumvikana hakagira umwe ibyo yigomwa n’undi ariko bakavamo hari icyo bakuyemo, atari ngo umwe yatwaye byose undi agenda ubusa.”

Yakomeje agira ati “Ubundi mu rukiko ntiwemerewe kuza kugaragaza amarangamutima yawe, baragucecekesha ariko mu bwunzi umuntu ashobora kuza akavuga ibiri ku mutima byose, uwo baburana akabyumva wenda akaba yahindura n’uko yabitekerezagaho.”

Mutabazi yavuze ko hari n’izindi nyungu ziba mu kurangiza ikibazo mu bwumvikane nko kuba umwanya abantu bamaraga mu rukiko bawukoresha ikindi, kuba amabanga y’abantu aguma hagati yabo aho kujya ku karubanda n’ibindi.

Yavuze ko nko mu bihugu byateye imbere gukemura ibibazo hifashishijwe abahuza mu nkiko ari ibintu bikoreshwa cyane.

Prof Rugege yavuze ko nko mu gihe abantu bari kuburana imanza za gatanya, hari amabanga menshi baba batifuza ko ajya hanze, nyamara iyo bageze mu rukiko ntibia bishobotse kuko biba biri ku karubanda, mu gihe iyo bagannye umuhuza biba ibanga.

Guhera mu 2012, imanza zose hamwe zarangiye mu nzira z’ubwunzi cyangwa zumvikanishijwe n’abanditsi b’inkiko hamwe n’ abacamanza ni 899.

Ni umubare muto ugereranyije n’imanza zinjira mu nkiko, ariyo mpamvu Mutabazi avuga ko biteze umusaruro ufatika ku bahuza bashya bashyizweho.

Yagize ati “Turumva bazadufasha mu bukangurambaga kuko abenshi ni abanyamategeko. Abantu bamenyereye ko mu nkiko ari ukuburanisha gusa no gufata icyemezo nta kindi. Turifuza ko bazabatugerezaho ubukangurambaga, babwira ababagana ko imanza zarangira no mu bwumvikane.”

Prof Rugege yavuze ko gukemura ibibazo hifashishijwe abahuza mu nkiko, nubwo ari bishya mu Rwanda ariko bizatanga umusaruro.

Yasabye abanyamategeko kubigiramo uruhare bumvisha abo bunganira kugana abahuza kuko aribyo bifite inyungu. Abajijwe niba hatari abanyamategeko bazajya babuza abo bunganira kugana abahuza kugira ngo bakomeze mu nkiko bibonere amafaranga, Prof Rugege yavuze ko bishoboka, gusa bidakwiriye.

Ati “Abavoka bagomba kudufasha bakabigira ibyabo, ntibumve ko ari ukubakuraho akazi. Hari abantu baba bashaka kwigira mu bahuza ariko abavoka bakabaca intege. Ngira ngo ni ukutabimenyera, kuko iyo bagiye mu bahuza n’ubundi barishyurwa.”

“Nubwo batari bukomeze mu nkiko zitandukanye ariko urubanza nirurangizwa mu buhuza uhita ufata abandi. Hari n’imanza zinanirana mu bahuza bagakomeza mu nkiko. Bakwiriye kumva ko kujya mu bahuza ari byo byaba ibya mbere byananirana akaba ari bwo bajya mu nkiko.”

Hashyizweho igiciro kizajya gitangwa n’abahuza mu nkiko, gusa Mutabazi yijeje ko bitazaba biremereye ubushobozi bw’ababuranyi.

Mu gihe ababuranyi bumvikanye bigizwemo uruhare n’umuhuza, bishyikirizwa urukiko bigaterwaho kashe bikaba itegeko.

Prof Rugege yavuze ko gukemura ibibazo hifashishijwe abahuza mu nkiko, nubwo ari bishya mu Rwanda ariko bizatanga umusaruro.
Mutabazi yavuze ko abahuza mu nkiko bitezweho kuzamura umubare w’ibirego birangizwa mu bwumvikane aho kurangizwa n’inkiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .