Perezida Kagame yagaragaje ko hari ibibazo bitarabonerwa ibisubizo mu kurwanya Coronavirus muri EAC

Yanditswe na Ferdinand Maniraguha
Kuya 11 Kamena 2020 saa 08:12
Yasuwe :
0 0

Perezida Paul Kagame yagaragaje ko hari ibibazo bigikeneye gushakirwa ibisubizo mu Muryango wa Afurika y’Iburasirazuba (EAC) kugira ngo icyorezo cya Coronavirus kirandurwe burundu.

Yabitangaje kuri uyu wa Kane tariki 11 Kamena 2020 mu nama yakozwe mu buryo bw’ikoranabuhanga yahuje Inama Nyobozi y’Umuryango wa Afurika Yunze Ubumwe (AU), abayobozi b’imiryango y’ubukungu ihuza uturere dutandukanye muri Afurika n’intumwa zidasanzwe za AU haganirwa ku bufatanye n’ingamba zigamije guhashya icyorezo cya Coronavirus.

Perezida Kagame yashimye ubufatanye n’ibindi bikomeje gukorwa ku rwego rwa Afurika mu gushakira hamwe ingamba zigamije guhashya Coronavirus.

Yavuze ko muri EAC, ibihugu bikomeje gukorera hamwe hashyirwaho ingamba zigamije koroshya ubucuruzi ari nako hakomeza izo kurinda ubuzima bw’abaturage.

Umukuru w’Igihugu yavuze ko bijyana no gukoresha ikoranabuhanga no guhuza amabwiriza ajyanye no gupima icyo cyorezo.

Icyakora Perezida Kagame yavuze ko hari ibitaranozwa bikeneye gukemurwa kugira ngo icyo cyorezo kirandurwe.

Yagize ati “Turacyafite ibibazo bike byo gukemura ariko tuzakomeza gushakira hamwe umuti ngo tugire imyumvire imwe y’ingaruka mbi z’iki cyorezo n’uburyo bwo kubikemura. Turacyafite ikibazo cyo guhuza no kumva kimwe ingamba zikwiriye gufatwa ariko tuzakomeza kubikoraho.”

Mu ntangiriro za Kamena, Guverinoma y’u Rwanda ku bufatanye n’ibihugu bya Uganda na Kenya byatangije uburyo bwo gupima Coronavirus no guha ibyangombwa abashoferi b’amakamyo bambukiranya imipaka, mu rwego rwo kwirinda ikwirakwiza ry’icyo cyorezo.

Icyo gihe u Rwanda rwumvikanye n’ibihugu bya Uganda na Kenya gushyiraho uburyo bwo gusuzuma, guhanahana amakuru, gushyiraho aho abashoferi bahagarara n’ibindi.

Buri mushoferi ugiye gufata urugendo azajya abanza gupimwa byemezwe ko ari muzima kandi bikorwe na laboratwari yemewe, ahabwe icyemezo kimara iminsi 14 yitwaza.

Nubwo byakozwe gutyo, ibihugu bya Tanzania, u Burundi na Sudani y’Epfo ntabwo byari byakumvise kimwe iyo mikorere, gusa u Rwanda rwavuze ko ruri kuganira n’ibindi bihugu kugira ngo ubwo buryo bwo gusuzuma, guherekeza no guhanahana amakuru naho butangire kubahirizwa neza.

Perezida Kagame kuri uyu wa Kane yongeye kugaragaza akababaro ko kuba u Burundi, umwe mu banyamuryango ba EAC buherutse kubura Perezida wabwo, Pierre Nkurunziza witabye Imana azize guhagarara k’umutima. Yaboneyeho kwihanganisha umuryango we, n’Abarundi bose muri rusange muri ibi bihe.

Perezida Paul Kagame yagaragaje ko hari ibibazo bitarabonerwa ibisubizo mu kurwanya icyorezo cya Coronavirus mu Karere ka Afurika y’Iburasirazuba
Iyi nama y'Inama Nyobozi y’Umuryango wa Afurika Yunze Ubumwe (AU), abayobozi b’imiryango y’ubukungu ihuza uturere dutandukanye muri Afurika n’intumwa zidasanzwe za AU yize ku bufatanye n’ingamba zigamije guhashya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .