OMS yashyize indwara zitandura mu zahitanye benshi mu 2019

Yanditswe na Dufitumukiza Salathiel
Kuya 26 Ukuboza 2020 saa 03:12
Yasuwe :
0 0

Raporo y’Ishami ry’Umuryango w’Abibumbye ryita ku Buzima(OMS), igaragaza ko indwara zitandura zirimo iz’umutima, ubuhumekero na kanseri ziza mu za mbere zateje impfu nyinshi mu mwaka wa 2019.

Icyakora iyo raporo ivuga ko abaturage bo mu bihugu bikiri mu nzira y’amajyambere bugarijwe cyane n’indwara zandura zirimo Malaria, virusi itera SIDA n’impiswi kurusha izitandura.

Nk’uko OMS ibisobanura, ibyo ahanini biterwa no gutinda gufata ingamba zo kurwanya no kwirinda ibintu bigaragara ko byakongera ibyago byo gukwirakwiza no kwanduza izo ndwara.

Ku rundi ruhande, iyo raporo nshya yerekana ko malaria, igituntu na SIDA zishe abantu bake. Urugero, impfu zatejwe na SIDA zagabanutseho 59% mu 2019 ziba 161,000, mu gihe mu 2000 zari 395,000. Ibyo byatumye iva ku mwanya wa munani mu zateye impfu nyinshi mu 2000, igera ku mwanya wa 19 mu 2019.

Indwara ziterwa n’impiswi nka Cholera n’impiswi zishyirwa imbere mu mpamvu zateye impfu nyinshi mu bihugu bikiri mu nzira y’amajyambere, aho ziza muri eshanu za mbere.

Nubwo bimeze bityo, imibare y’impfu ziterwa n’izo ndwara yaragabanutse, iva kuri miliyoni 2.6 mu 2000, igera kuri miliyoni 1.5 mu 2019.

OMS ivuga kandi ko uburyo abana bo mu bihugu bikiri mu nzira y’amajyambere bavukamo n’aho bavukira bwakomeje kuba impamvu iteza impfu cyane mu 2019, nubwo ku rwego rw’Isi bigaragara ko byagabanutse.

Abana miliyoni 2.4 batararenza iminsi 28 bavutse nibo bapfuye mu 2019, biturutse ku buryo bavutsemo n’aho bavukiye, nko kuvuka igihe kitageze, kuvuka badafite umwuka uhagije, indwara z’ibihaha, kuvuka bafite ubumuga bw’ingingo, impiswi ndetse na Malaria.

Ni mu gihe mu 2000 habarurwaga abana miliyoni 3.2 bapfuye batarengeje iminsi 28 kubera impamvu nk’izo.

Raporo ya OMS inagaragaza ko diabète yavuye ku mwanya wa 15 mu 2000 ikagera ku wa cyenda mu zateje impfu nyinshi mu 2019, mu bihugu bifite ubukungu buringaniye.

Abasaga miliyoni 1.3 nibo iyo ndwara yahitanye mu 2019, bavuye ku bihumbi 700 yishe mu 2000.

Indwara zitandura ziza ku isonga mu guhitana benshi ku isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .