00:00:00 IGIHE NETWORK KN KINYARWANDA EN ENGLISH FR FRANCAIS

Nyaruguru: Barashimira itangazamakuru ryagize uruhare mu gutuma bishyurwa miliyoni 28 Frw

Yanditswe na Prudence Kwizera
Kuya 4 May 2022 saa 08:43
Yasuwe :

Ba rwiyemezamirimo bashoye imari mu mavuriro y’ibanze azwi nka Postes de Santé mu Karere ka Nyaruguru, barashimira itangazamakuru ryabakoreye ubuvugizi bakishyurwa amafaranga agera muri miliyoni 28 Frw.

Mu 2019 mu Karere ka Nyaruguru hari ba Rwiyemezamirimo bahawe Postes de Sante mu mirenge ya Ruheru, Kivu, Muganza na Busanze kugira ngo batange serivise z’ubuvuzi ku baturage.

Icyo gihe bagiranye amasezerano n’Akarere ka Nyaruguru batangira kuvura abaturage biganjemo abakoresha ubwisungane mu kwivuza, mituelle de santé.

Nyuma yaho mu 2020 batangiye kugaragaza ikibazo cy’uko bari mu gihirahiro kuko iyo basabye kwishyurwa amafaranga y’ubwishingizi bw’abaturage, Akarere atari ko kazishyura.

Icyo gihe umwe muri bo yabwiye IGIHE ko bamaze amezi agera kuri 12 bavura abaturage kandi bagiranye amasezerano n’Akarere ka Nyaruguru ariko bakaba batarishyurwa.

Ati “Ni ukuvuga ngo twakoze umwaka wose tuvura abaturage, akarere karatubwiye ko atari ko kazatwishyura.”

Bagaragaje ko bafitanye inyandiko n’Akarere ka Nyaruguru ibemerera gukora ariko uko kutishyurwa byabahombeje n’ubwo batahagaritse gutanga serivise.

Icyo kibazo cyavuzwe mu itangazamakuru ndetse ubuyobozi bw’Akarere ka Nyaruguru bwemeza ko bugiye kubishyura.

Icyo gihe uwari Umuyobozi w’Agateganyo w’Akarere ka Nyaruguru, Gashema Janvier, yabwiye IGIHE ko nyuma yo gusesengura icyo kibazo biyemeza kwishyura ayo mafaranga.

Ati “Nk’abaturage bacu twemeye kubishyurira, izo nyemezabwishyu twarazisuzumye tubona umwenda ugera mu mafaranga miliyoni 28 Frw tugomba kubishyura. Inama Njyanama yamaze kwemeza uwo mwenda, igisigaye turimo kuyashaka mu ngengo y’imari y’akarere kugira ngo yishyurwe. Nabamara impungenge ko bazayabona vuba.”

Bari mu byishimo ko bishyuwe

Kuri ubu abo ba rwiyemezamirimo bashoye imari mu mavuriro y’ibanze bari mu byishimo ko bishyuwe, bagashimira itangazamakuru ubuvugizi ryabakoreye ndetse n’ubuyobozi bwabumvise.

Burindwi Elia uyobora ivuriro rya Bukore mu Murenge wa Muganza yavuze ko ashima itangazamakuru ryabafashije kumenyekanisha ikibazo cyabo.

Ati “Turashimira cyane itangazamakuru kuko ryadufashije kumenyekanisha ikibazo cyacu kikumvwa kikaba cyarakemutse, bamaze kutwishyura.”

Mugenzi we yavuze ko bari barandikiye inzego zitandukanye ntibasubizwa ariko itangazamakuru ribafashije kumenyekanisha ikibazo cyabo barishyurwa.

Ati “Nkatwe twari twaragiye twandika ariko ukabona ko bidahita bihabwa agaciro ariko itangazamakuru aho ridusuriye rikabona ko hari ikibazo dufite ryatumye n’abayobozi babasha kubyumva kuko itangazamakuru ritugerera aho tutabasha kugera.”

Bashimiye n’Ubuyobozi bw’Akarere ka Nyaruguru bwumvise ikibazo cyabo burabishyura.

Habumugisha Faustin ucunga ivuriro rya Kirarangombe ati “Ndashimira ubuyobozi bw’Akarere bwatubaye hafi ntitwacika intege mu gutanga serivise kandi n’ubu turacyayitanga neza.”

Muri rusange bavuga ko bakimara kwishyurwa ayo mafaranga byabafashije kwishyura imiti bari barafashe muri za farumasi ndetse no guhemba abakozi babo, kuri ubu imikorere ikaba imeze neza.

Kuva amasezerano abo ba Rwiyemezamirimo bari bafitanye n’Akarere ka Nyaruguru yarangira mu Ukwakira 2020, kuri ubu abafite mu nshingano izo Postes de Santé bahise basinyana andi na RSSB ku buryo nta kibazo cy’imikorere bafite.

Barashimira itangazamakuru ryagize uruhare mu gutuma bishyurwa miliyoni 28 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .