00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Hagaragajwe ibishobora kugumura abaturage

Yanditswe na Prudence Kwizera
Kuya 23 May 2022 saa 07:35
Yasuwe :

Ibibazo birimo gusiragiza abaturage, ruswa, ubukene, imirire mibi no kugwingira kw’abana ni bimwe mu byagaragajwe ko bishobora gutuma abaturage batishimira ubuyobozi, bityo abayobozi b’inzego z’ibanze bakaba basabwe kubishakira ibisubizo birambye.

Byagarutsweho kuri iki Cyumweru tarki ya 22 Gicurasi 2022 ubwo Abanyamuryango ba RPF Inkotanyi bahagarariye abandi muri buri cyiciro mu Karere ka Nyanza bateranaga bagamije kurebera hamwe uko babyutsa ubukangurambaga bugamije gukemura ibibazo bibangamira imibereho myiza y’abaturage.

Hagaragajwe ko hakiri abayobozi baka ruswa, abatanga serivisi zitanoze n’abatita ku babazo by’abaturage.

Umuyobozi w’Akarere ka Nyanza, akaba na Chairperson w’Umuryango wa RPF Inkotanyi muri ako Karere, Ntazinda Erasme, yavuze ko ibibazo bishobora gutuma abaturage batishimira ubuyobozi bigihari kandi ko bigomba gushakirwa ibisubizo.

Ati “Tugiye kwita cyane ku isuku, imirire mibi ndetse no kugwingira kw’abana ariko kandi hari n’ikibazo cy’umutekano tugomba kwitaho cyane, tukareba n’ikijyanye n’amakimbirane mu miryango.”

By’umwihariko yavuze ko amakimbirane yo mu miryango usanga ariyo ntandaro y’ibibazo birimo gutwita imburagihe kw’abangavu, uburere buke, ubuzererezi ndetse n’imirire mibi.

Ati “Ibyo byose turagira ngo mu mirenge n’utugari baze kuba bafite ishusho nyayo noneho bagende tuvuga ngo icyo tugiye gukemura ni iki.”

Mu Karere ka Nyanza hamaze iminsi humvikana abashakanye bicana batemanye, bigatuma abana babo baba imfubyi.

Mu minsi ishize, ku wa 17 Gicurasi 2022 umugabo wo mu Murenge wa Kigoma mu Karere ka Nyanza yatemye umugore we n’umwana ndetse n’inka yari iri mu rugo, biturutse ku makimbirane ashingiye ku mitungo no gucana inyuma.

Bukeye bwaho, umugabo wo mu Murenge wa Ntyazo yishe umugore we amutemye ijosi ubwo umuhesha w’inkiko yabagabanyaga umutungo.

Ku rundi ruhande, imibare igaragaza ko mu Karere ka Nyanza abana bagwingiye bari ku ijanisha rya 32,4.

Mu myaka itatu mu Karere ka Nyanza habarurwa abangavu batewe inda imburagihe basaga 700. Nyamara abazibatera bashyikirijwe ubutabera baracyari ku gipimo cyo hasi aho imibare yerekana ko batarenze 25.

Ruyombyana Alexis wo mu Murenge wa Muyira yavuze ko hakiri abayobozi bahesha isura mbi Umuryango wa FPR-Inkotanyi kubera kutuzuza inshingano zabo, bigatuma ibibazo biba byinshi mu baturage.

Ati “Hari abantu bari mu nzu zitameze neza, hari abakirarana n’amatungo, hari abana bagwingiye, hari abaturage batagira aho kuba, hari n’abataragezwaho amazi meza. Hari abayobozi batuvangira bikagira ingaruka z’uko umuturage atishima akaba atanishimira ubuyobozi.”

Murekatete Aline na we yavuze ko ibibangamiye imibereho y’abaturage bifuza kubikemura kugira ngo babeho bishimye.

Ati “Dufite ibabazo byinshi bibangamiye imibereho y’abaturage harimo imirire mibi, abadafite ibibatunga bihagije. Kuko rero Umuryango [wa FPR-Inkotanyi] ari moteri ya Guverinoma, niyo mpamvu turi hano kugira ngo twicare tubishakire ibisubizo.”

Hari hashize imyaka ibiri nama y’ubukanguramba y’Abanyamuryango ba RPF-Inkotanyi idaterana mu Karere ka Nyanza kubera icyorezo cya Covid-19.

Umuyobozi w'Akarere ka Nyanza, akaba na Chairperson w'Umuryango wa RPF Inkotanyi muri ako Karere, Ntazinda Erasme, yavuze ko ibibazo bishobora gutuma abaturage batishimira ubuyobozi bigihari
Serivisi zitanoze zihabwa abaturage zagaragajwe nk'izishobora gutuma bigumura
Abanyamuryango ba FPR-Inkotanyi mu Karere ka Nyanza biyemeje gukemura ibibazo bibangamiye abaturage
Hari hashize imyaka ibiri nama y'ubukanguramba y'Abanyamuryango ba RPF-Inkotanyi idaterana mu Karere ka Nyanza kubera icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .