Ntawunguka wa FDLR nadataha azaba nka Mudacumura-Gen Major Alexis Kagame

Yanditswe na Mukwaya Olivier
Kuya 31 Werurwe 2020 saa 06:17
Yasuwe :
0 0

Umuyobozi w’Ingabo mu Ntara y’Uburengerazuba, Gen Maj Alexis Kagame, yavuze ko Gen Ntawunguka Pacifique alias Omega usigaye ayoboye FDLR nadataha mu gihugu cye azasoza nabi nka Mudacumura Sylvestre yasimbuye.

Yabitangaje kuri uyu wa Mbere mu rugendo yagiriye mu Karere ka Rubavu mu nama n’abayobozi kuva mu mudugudu kugeza mu murenge.

Gen Maj Alexis Kagame yabwiye abayobozi ko umubano w’u Rwanda na Repubulika Iharanira Demokarasi ya Congo umeze neza ku buryo imitwe igamije guhungabanya umutekano w’u Rwanda na FDLR irimo, itazihanganirwa.

Yavuze ko FDLR itabangamiye u Rwanda gusa kuko no mu mashyamba ya RD Congo aho ifite ibirindiro, yica abaturage, igasahura ikanafata abagore ku ngufu.

Ati “Nabo bafashe icyemezo cyo kuyirwanya kandi byagenze neza. Mwarabyumvise mu makuru ko hari abayobozi ba FDLR bagwa iyo mu mashyamba, ba Mudacumura, ba Jean Michel ba RUD Urunana, hari n’abafashwe bazanwa Mutobo batagira ingano.’’

Yakomeje anenga abanga gutaha kubera ingengabitekerezo y’urwango barimo Gen Ntawunguka Pacifique [Omega] usigaye ayobora FDLR. Gen Ntawunguka yigeze kuvuga ko azagaruka mu Rwanda nta Mututsi ukirurimo.

Gen Maj Alexis Kagame yavuze ko Ntawunguka nadahindura imyumvire ngo atahe mu gihugu cyamubyaye, bizarangira apfuye nkuko byagendekeye Mudacumura yasimbuye.

Ati “Mudacumura wiyitaga General urumva aho yaguye, Jean Michel wa RUD Urunana na we ni uko kandi ufite igihugu kikwakira kikaguha n’amafaranga yo kwiteza imbere ukanga gutaha kubera ingengabitekerezo yabahezemo y’urwango. Na Mudacumura niko yavugaga ngo ntiyahemukira Habyarimana. Abakiri mu mashyamba ba Ntawunguka Pacifique wiyita ngo ni Omega ukorera hano za Nyamuragira, nadataha niko azapfa, na we azagwa hariya.’’

Muri Nzeri 2019 nibwo ingabo za Repubulika ya Demokarasi ya Congo, FARDC, zishe Lieutenant General Sylvestre Mudacumura wayoboraga umutwe wa FDLR, mu gitero zagabye ku birindiro by’uwo mutwe mu gace ka Bwito mu Ntara ya Kivu y’Amajyaruguru.

Guverineri w’Intara y’Uburengerazuba, Munyentwari Alphonse, yashimiye abaturage b’imirenge yegereye umupaka ugabanya u Rwanda na Congo muri Rubavu, uko bari kwitwara mu kubungabunga umutekano.

Yabasabye ko ari nako babigenza ku cyorezo cya Coronavirus cyugarije Isi muri iki gihe, bagatahiriza umugozi umwe.

Imirenge ikora ku mupaka irimo uwa Busasamana yagiye ikunda kwibasirwa n’ibitero by’umutwe wa FDLR. Igitero giheruka ni icya tariki 10 Ukuboza 2018 ubwo abarwanyi ba FDLR bakigabaga mu Murenge wa Busasamana ahitwa Kanyesheja abagera ku icyenda bakahasiga ubuzima, umuturage umwe agakomereka.

Gen Maj Alexis Kagame yavuze ko Gen Ntawunguka Pacifique alias Omega usigaye ayoboye FDLR nadataha mu gihugu cye azasoza nabi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .