00:00:00 IGIHE NETWORK KN KINYARWANDA EN ENGLISH FR FRANCAIS

Nta gahinda nko kuribwa n’uwakagutamitse

Yanditswe na Musangwa Arthur
Kuya 4 May 2022 saa 07:13
Yasuwe :

Burya koko ukwibyara gutera ababyeyi ineza! Buri mubyeyi aterwa ishema no kubona abo yibarutse, cyangwa se yareze, bakura bakavamo abagabo n’abagore basobanutse, biteza imbere badasize igihugu cyabo. Muri rwa rugendo rwa muntu, igihe kiragera umubyeyi agacika intege, yaba yarareze neza akizera ko urubyaro rwe ruzamubera amaboko rukamusindagiza agasaza atandavuye, bikaba umugisha w’uburere yatanze mu gihe cye.

Ushobora kugira imitungo nka Mirenge ku Ntenyo, ukagerekaho imbaraga n’icyubahiro by’agatangaza, ariko nta murage mwiza waha umwana wawe nk’uburere bwiza, ari nabyo Umunyarwanda yari ashatse kuvuga ubwo yagiraga ati “Uburere buruta ubuvuke.”

Niba ubihakana, ushobora kwifashisha ubushakashatsi buzwi cyane bwiswe ‘Parenting and its Effects on Children: On Reading and Misreading Behavior Genetics’ bwakozwe na Eleanor E. Maccoby.

Bugaragaza ko imyitwarire y’ababyeyi ishobora kugira uruhare ruri hagati ya 20% na 50% ku myitwarire y’abana babo mu gihe bakuze. Urundi ruhare rugirwa n’ibyo umwana yirirwamo birimo ishuri, bagenzi be, imiterere ye karemano n’ibindi bitandukanye.

Kwemeza uruhare rw’umubyeyi mu burere bw’umwana we ni ikintu kigoye cyane kukigaragaza mu buryo bufatika, burimo nk’ibipimo by’imibare, ariko ikizwi cyo ni uko iyo umwana yitaweho akiri muto agahabwa uburere bwiza, akura afite imyitwarire myiza nka cya giti cyagorowe kikiri gito.

Ku rundi ruhande, uwiba ahetse aba yigisha uwo mu mugongo! Niba umubyeyi agira imico mibi, umuryango ugahoramo ibibazo, biba bishobora kuzagira ingaruka zikomeye ku bana mu bihe bazaba bakuze.

Iyo umwana yagize ibikomere mu bwana bwe birimo nko gutandukana kw’ababyeyi, ihohoterwa n’ibindi nk’ibyo, umwana uzamukomokaho aba afite ibyago byikubye gatandatu byo kuzagira ibibazo by’imitekerereze n’imibanire n’abandi, nk’uko ubushakashatsi bwa Anne-Marie Conn bubigaragaza.

Ibi nibyo biri kuba kuri Paul Rusesabagina, umugabo wiyambitse urubwa akaba ari gusarura ku mbuto zarwo.

Rusesabagina ni umuntu wabayeho neza mu buzima busanzwe, abona icyubahiro acyongeraho amafaranga, ariko yahisemo gusaza yanduranya, anarenga aho yica abantu nk’uko inkiko zabimuhamije. Kuri ubu ari kuryozwa ayo mabi yakoze aho yakatiwe imyaka 25 y’igifungo.

Nk’uko twabigarutseho mu ntangiriro, mu bihe bikomeye nk’ibi nibwo Rusesabagina yakabaye akeneye ko umuryango we umuba hafi kurushaho.

Uyu mugabo uri mu za bukuru afite ibibazo by’ubuzima bikeneye kwitabwaho, mu gihe kwakira igikomere cyo kwisanga i Madrid (nk’uko benshi basigaye bahita, ariko ni i Mageragere kuri gereza ya Nyarugenge) warigeze kwambikirwa umudari i Washington muri White House atari ikintu cyoroshye.

Izi kimwe n’izindi mpamvu zakabaye imbarutso yo kwegerwa no gushyigikirwa n’umuryango we, harimo n’umukobwa we, Carine Kanimba.

Ku mwana warezwe, ubundi iyi yakabaye intego ya mbere yo gusigasira ubuzima bw’umubyeyi uri kugana mu za bukuru, ariko byaba ku wundi utari Kanimba, kuko yahisemo gukoresha izina rya se n’umubabaro, mu kurushaho kwagura inyungu ze bwite.

Carine Kanimba akunze kwigaragaza nk'ufitiye umubyeyi we impuhwe ariko byose bigasa nka za mpuhwe za bihehe

Kuronkera mu marira y’umubyeyi

Itabwa muri yombi rya Rusesabagina ryari inkuru mbi ku banzi b’u Rwanda kuko uyu mugabo yari ku ruhembe rw’ibikorwa bigamije guhungabanya umutekano w’Abanyarwanda n’ubutegetsi bitoreye, ari nabyo byatumye yijandika mu bikorwa by’iterabwoba byahitanye inzirakarengane mu turere twa Nyaruguru na Nyamagabe.

Ku rundi ruhande ariko, ntawavuga ko ifungwa ry’uyu mugabo ryabaye inkuru mbi kuri bose, kuko hari bamwe mu bakoranye na we bahise babona neza ko aya ari andi mahirwe yo guharabika u Rwanda bifashishije izina rye mu nyungu zabo bwite.

Uretse u Rwanda, aba banabonye neza ko iri fungwa rya Rusesabagina ari nka ya manu yamanukiye Abayisiraheli, kuko gucuruza ibinyoma byabo bifashishije izina rye ari nko ’kuzimya buji (bougie)’, na cyane ko ari ikimenyabose iyo muri Amerika n’u Burayi.

Icyakora kugira ngo ibi byose bigerweho, hasabwaga ikintu kimwe gikomeye: umuntu wo mu muryango wa Rusesabagina wagombaga kuyobora ibi bikorwa, uzi kwiriza ay’ingona ku buryo aho atakiye hose bagira impuhwe, abamena urufito bakabikora batikanyiza.

Aha niho Carine Kanimba aziramo. Uyu mukobwa w’amashagaga, ntiyatinze kumva neza inyungu ziri mu ifungwa rya Rusesabagina, kuko nawe yari abonye amahirwe y’imbonekarimwe yo kubaka izina rye no ’kurya amafaranga y’abazungu yigaramiye.’

Kanimba ni umukobwa usobanukiwe kandi wize, akamenya kudidibuza indimi z’amahanga nk’uwazivukiyemo, akagira ishyaka n’inyota byo kwicarana n’abakomenye, kandi akamenya no kubigendera dore ko ari ’photogenic’ kubi.

Ibi byose bimugira umukandida wuzuye muri uyu mugambi, aho yagombaga kuyobora ibikorwa byo gukoresha akababaro ka Se mu rwego rwo kwigwizaho akayabo.

Ifungwa rya Rusesabagina ryatumye Kanimba aganira n’abayobozi bakomeye mu bihugu by’ibihangange ku rwego rw’Isi, ku buryo bigoye ko yari kugira aya mahirwe iyo Se atajya mu buroko.

Uyu mukobwa kandi yahawe umwanya kuri televiziyo n’ibinyamakuru bikomeye ku rwego rw’Isi, ahantu ubusanzwe bitoroshye kubona umwanya utari umuntu usanzwe ufite izina riremereye mu cyiciro runaka.

Ejo bundi aha yanifotoreje muri White House.

Mu mugambi we wo kwimenyekanisha no gushaka indonke, Carine Kanimba aheruka muri White House

Ubwo uyu mukobwa kandi aheruka muri ibi bikorwa byo gushinyagurira Se uri mu buroko, mu kiganiro cyateguwe n’Umuryango ‘Robert F. Kennedy Human Rights’, cyari gifite insanganyamatsiko yo gusaba ko Rusesabagina arekurwa (#FreeRusesabagina).

Muri icyo kiganiro, Kanimba yavuze ko umubyeyi we amaze igihe afunzwe mu buryo bunyuranyije n’amategeko, bityo ko hakenewe ubufasha mpuzamahanga.

Yagize ati "Umubyeyi wanjye amaze iminsi irenga 580 muri gereza afunzwe mu buryo bunyuranyije n’amategeko. Tumaze iminsi irenga 580 tutamwifuriza kugira ijoro ryiza, tutamuhobera, tutanareba amaso ye n’umubiri we. Duhangayikishijwe cyane n’umutekano ndetse n’ubuzima bwe. Abantu benshi batubaza impamvu data ari hariya [muri gereza], yakoze iki? Ikintu cyonyine data yakoze kwari ukurwanya akarengane."

Urebeye inyuma, ubona neza impamvu Kanimba yari umukandida uhiga abandi muri uyu mugambi mutindi wo kurira mu kababaro ka Se.

Ni umukobwa uvuga atuje, akamenya neza kwerekana agahinda ku isura ye, agashyira ibitekerezo bye ku murongo kandi akamenya gusubiza vuba atariye indimi, ku buryo rwose byakugora kuvumbura ko ari kuvuga ibinyoma cyangwa ko hari ikindi kibyihishe inyuma.

Ni intyoza rwose tuzamugaye ikindi! Icyakora yaba intyoza yagira, burya ak’ibinyoma ntikiburira.

Hari ubwo agira atya akinyuramo, uretse ko ibi bidahabwa agaciro kuko na televiziyo aba ari kuganiriza ziba zimubogamiyeho, ku buryo nta kosa ryo kumurogoya no kumubaza ibibazo byinshi rishobora kubaho.

Muri icyo kiganiro, hari aho avuga ko badaheruka amakuru y’umubyeyi wabo, ubundi akongera ati "Ararwaye, ararembye, ntabwo yigeze ahabwa imiti akeneye mu minsi irenga 580 ishize. Dukeka ko yagize ‘stroke’ kandi nta gihe dufite ari nayo mpamvu dukeneye ubufasha bwanyu. Dukeneye ubufasha bw’umuryango mpuzamahanga, dukeneye ubufasha bw’Isi kugira ngo agaruke muri twe [umuryango we]."

Nyuma yo kubakira izina muri iyi mikino, Kanimba n’umuryango we, nk’uko byari byitezwe, bahisemo kugana inkiko aho bareze Leta y’u Rwanda bifuza ko ’itanga miliyoni 400$’ nk’impozamarira y’ibyabaye kuri Se.

Ubajije buri muntu wese wakurikiranye imyitwarire y’uyu mukobwa na bagenzi be, azakubwira ko ingingo yo gusaba amafaranga ari yo yari yitezwe nk’iherezo ry’ibyifuzo byabo, ikikwereka nyine ko byose byari amaco y’inda nta rukundo ruri aho.

Ni mu gihe kandi kuko ntawe utanga icyo adafite, kuko uru rukundo rwakwa Kanimba atarubona atararuhawe mu burere bwe.

Ukuri kwamizwe n’indamu

Ubundi ukuri kwagakwiriye gutsinda igihe cyose, ariko ku bantu batarezwe neza, ‘ukuri kuragatsindwa imbere y’indonke.’

Ibivugwa na Kanimba ni ibinyoma byambaye ubusa, na cyane ko ibimenyetso bishinja uyu mugabo biri hose kuva mu nzego z’ubutasi za Amerika n’u Bubiligi, kugera kuri YouTube n’Ijwi rya Amerika.

Byongeye kandi, urubanza rwe rwaburanishijwe mu ruhame aho yashinjwe n’abo bakoranye kugeza ubwo ikimwaro kimwishe akarwikuramo.

Ibi byose ariko ntacyo bivuze imbere y’umuntu uri gushaka indonke, kuko aba yiteguye guhindanya ukuri ariko agakunda akaramuka kabiri.

Mu by’ukuri ushobora kwibaza ubuvugizi bw’imiryango mpuzamahanga nk’uyu wa ‘Robert F. Kennedy Human Rights’ ivuga ko irengera ‘uburenganzira bwa muntu.’

Kenshi usanga imiryango nk’iyi iba yuzuyemo ba rusahurira mu nduru, bagamije gusa gucungacunga aho byahiye kugira ngo bajye gutamira, batitaye ku byangirikira muri uko kwikunda kwabo.

Iyi miryango iba ikeneye amafaranga y’inkunga aturuka mu bigo by’ubucuruzi, ibigo bya Leta, abantu ku giti cyabo n’ibindi.

Kugira ngo babone ayo mafaranga, bagaragaza ko ibintu byacitse muri Afurika, aho uburenganzira bwa muntu bwirengagizwa, ari nayo mpamvu hakenewe inkunga yo kubuzahura. Byahe byo kajya!

Benshi mu batuye iyo mu Burayi usanga batazi neza uko ibintu bihagaze muri Afurika, ku buryo iyo bumvise ibintu nk’ibyo babyemera badaciye ku ruhande, bagatanga amafaranga yabo bazi ko bari kugira uruhare mu guhindura Isi nziza kurusha uko bayisanze, kandi nyamara bari gukuza imifuka ya ba rusahurira mu nduru babihishemo.

Ifungwa rya Rusesabagina ni urugero rwiza cyane rwo gusabisha amafaranga, kuko noneho abayatanga berekwa urugero rufatika rw’umuntu bazi uri mu bagizweho ingaruka mbi n’imiyoborere yo muri Afurika.

Ibi kandi bituma n’abajyaga bagira akangononwa cyangwa se bakibaza ikoreshwa ry’amafaranga atangwa, batuza kuko izina nka Rusesabagina riba ari ikintu kigaragarira bose.

Ibi bituma bya bimenyetso bishinja Rusesabagina twavugaga byose byirengagizwa uko byakabaye, ari nayo mpamvu uzakomeza kumva abantu bavuga ko Rusesabagina arengana, nubwo mu by’ukuri basobanukiwe neza cyane ko ibyo yakozwe ari amahano, ndetse ko uwakoze ibisa nka byo iwabo akanirwa urumukwiye rimwe na rimwe rugera no ku rupfu.

Ikibabaje ni uko muri aka gashinyaguro kose hagaragaramo Carine Kanimba, wakabaye afasha umubyeyi we guhangana n’ibihe bikomeye arimo, yanaba imfura akitandukanya n’ibikorwa bye ndetse akanabisabira imbabazi, akabaho ari umukobwa utunzwe n’umusaruro w’ibyuya bye aho kurira ku mubyeyi we uri mu kababaro yashyizwemo n’ibyaha bye.

Gusa ibi biragoye kuko gusaba imbabazi no kurya akagabuye bisaba uburere, kandi niba Rusesabagina yaratinyutse kwifashisha amateka akomeye nka Jenoside yakorewe Abatutsi mu nyungu ze bwite, binyuze mu gukabiriza uruhare yagize mu kurokora abahungiye muri Hotel des Milles Collines, birumvikana ko umukobwa we atari kubura kumwigiraho.

Akaba ari nabyo arimo gukora ubu, akungukira mu kababaro k’umubyeyi we. Ni ibintu bitagakozwe n’umukobwa ufite uburere bukwiriye.

Aka wa mugani w’Umunyarwanda, Rusesabagina ari gusoma urwo yishigishiye, kandi koko akebo kajya Iwamugarura!

Kanimba n'umuryango we bakoresheje ifungwa rya Rusesabagina mu nyungu zabo bwite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .