00:00:00 IGIHE NETWORK KN KINYARWANDA EN ENGLISH FR FRANCAIS

Niger: Abanyarwanda n’inshuti zabo bibutse Abazize Jenoside yakorewe Abatutsi, basaba amahanga guhangana n’abayipfobya

Yanditswe na Iradukunda Olivier
Kuya 10 June 2024 saa 02:08
Yasuwe :

Abanyarwanda, abahagariye ibihugu byabo, abakozi b’imiryango mpuzamahanga n’inshuti z’u Rwanda baba muri Niger, bibutse ku nshuro ya 30 Abazize Jenoside yakorewe Abatutsi mu 1994, basaba amahanga gukomeza guhangana n’abayipfobya.

Ni igikorwa cyabereye mu Murwa Mukuru wa Niger, Niamey, ku wa Gatandatu tariki ya 8 Kamena 2024, mu gihe u Rwanda n’Isi yose bikomeje igikorwa cy’iminsi 100 cyo Kwibuka Abazize Jenoside yakorewe Abatutsi barenga miliyoni.

Umunyamabanga wa mbere muri Ambasade y’u Rwanda muri Niger wari uhagarariye Ambasaderi ufite Icyicaro muri Nigeria, Nkuriyingoma François, yibukije ko Jenoside yakorewe Abatutsi mu 1994 itari impanuka.

Yagize ati “Jenoside yakorewe Abatutsi mu 1994 ni indunduro y’urwango n’amacakubiri ashingiye ku moko yabibwe n’abakoloni, atizwa umurindi n’ubuyobozi bubi, Abatutsi barenga miliyoni bicwa bazira ubwoko bwabo amahanga arebera.’’

“Turi kwibuka ku nshuro ya 30 Jenoside yakorewe Abatutsi, duha icyubahiro abayiburiyemo ubuzima ariko kandi tunashima ubutwari n’ubudaheranwa bw’abayirokotse. Turishimira iterambere igihugu cyacu kimaze kugeraho kubera amahitamo meza cyakoze ku bw’imiyoborere myiza ya Perezida wa Repubulika Paul Kagame. Aha ndavuga ubumwe n’ubwiyunge bw’Abanyarwanda no kugira igihugu gifite icyerekezo n’intego.”

Nkuriyingoma kandi yasabye amahanga kuba maso no guhagurukira rimwe akamagana ndetse akanahana abagihembera ingengabitekerezo ya Jenoside hijya no hino ku Isi ndetse n’abapfobya n’abahakana Jenoside yakorewe Abatutsi mu 1994.

Abatanze ubutumwa bose bavuze ko u Rwanda rwageze kure habi hashoboka kandi bashima aho rugeze rwiyubaka. Muri abo harimo Attaher Maiga uhagarariye Ishami ry’Umuryango w’Abibumbye ryita ku Buhinzi n’Ubworozi muri Cote d’Ivoire (FAO), akaba yarakoreye no mu Rwanda.

Mu butumwa yatanze mu buryo bw’ikoranabuhanga rya ‘Video’ yagize ati “Abanyarwanda ntibaheranywe n’icurabundi rya Jenoside yakorewe Abatutsi, bariyubatse, bakorera hamwe biyubakira Igihugu. U Rwanda ni igihugu cy’intangarugero ku Isi mu bijyanye n’ubumwe n’ubwiyunge n’iterambere ryihuse.”

Yongeyeho ati “Ikindi ibikorwa by’iterambere n’imibereho myiza y’abaturage si amagambo ahubwo ubwabyo birivugira. Nk’urugero, u Rwanda rwazamutseho (hejuru ya 7%) mu bijyanye n’ubukungu.”

Prof. Issoufou Katambé, wabaye umwalimu muri kaminuza zitandukanye n’umuyobozi mu nzego bwite za Leta ya Niger yavuze ko yamenye u Rwanda n’Abanyarwanda kuva mu 1976.

Ati “Nagiye nkurikiranira hafi amateka y’u Rwanda. Gusa muri 2014-15 nibwo natembereye neza mu Rwanda, by’umwihariko mu Mujyi mwiza kandi usukuye wa Kigali. Icyo gihe nibwo nanzuye ko imbaraga z’Abanyarwanda ziri mu gukora cyane, iterambere ryarwo, imiyoborere myiza no kurwanya ruswa n’akarengane.”

Umuyobozi w’Umuryango w’Abanyarwanda baba muri Niger, Dr. Gloriose Uwayirege Dauda, yibukije ko buri mwaka bifatanya n’inshuti n’abavandimwe mu Kwibuka abazize Jenoside yakorewe Abatutsi mu 1994 n’urugendo rwo kwiyubaka.

Ati “Buri mwaka twibuka abazize Jenoside yakorewe Abatutsi mu 1994, tuzirikana imyaka myinshi batotejwe kugeza mu 1994. Mu gihe cy’amezi atatu hishwe abarenga miliyoni bazize ubwoko bwabo.”

Gusa yongeyeho ko ubu ibintu byahindutse, ati “Ubu twishimira ko twese turi Abanyarwanda. Dushingiye ku muco wacu, twishatsemo ibisubizo byo kwiyubaka duhereye ku muyonga, aho u Rwanda rwasizwe na Jenoside yakorewe Abatutsi, kugeza aho rugeze ubu. Muri ibyo bisubizo navuga nk’Inkiko Gacaca, Ubudehe, Umuganda, Umushyikirano n’ibindi byinshi.”

Abitabiriye iki gikorwa cyo kwibuka ku nshuro ya 30 Jenoside yakorewe Abatutsi, baboneyeho no gufata umwanya wo cucana Urumuri rw’Icyizere cy’ejo hazaza h’Abanyarwanda.

Abanyarwanda n'inshuti zarwo batuye muri Niger bibutse ku nshuro ya 30 Jenoside yakorewe Abatutsi
Igikorwa cyo Kwibuka Jenoside yakorewe Abatutsi mu Rwanda gisanzwe kiba buri mwaka
Abitabiriye uyu muhango bacanye Urumuri rw'Icyizere
Abanyarwanda bigiriye icyizere nyuma y'amahano yabaye mu 1994
Buri wese wafashe ijambo yashimye intambwe u Rwanda rwateye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .