00:00:00 IGIHE NETWORK KN KINYARWANDA EN ENGLISH FR FRANCAIS

Ni gute FC Barcelone ‘ikennye’ iri kubasha kugura abakinnyi bakomeye?

Yanditswe na Iradukunda Olivier
Kuya 25 July 2022 saa 09:51
Yasuwe :

Muri Kanama y’umwaka ushize, imwe mu nkuru yatunguranye mu mupira w’amaguru ku rwego rw’Isi, yatangarijwe i Catalonia muri Espagne, aho FC Barcelone yatangaje ko izatandukana na kabuhariwe Lionel Messi, wari umaze imyaka 21 muri iyo kipe yatwariyemo Ballon d’Or zirindwi, agahigo yihariye wenyine ku Isi.

Ubuyobozi bw’iyi kipe bwatangaje ko butazongerera Messi amasezerano kuko iyi kipe itari ifite ubushobozi bwo gukomeza kumuhemba, nyuma y’ibihe bikomeye by’ubukungu byayigwiririye, bigizwemo uruhare na Covid-19 yaje yiyongera ku bihombo n’imyenda iyi kipe yari ifite, igera kuri miliyari 1.3$, ibiyigira ikipe ya mbere ifite umwenda munini ku rwego rw’Isi.

Nyuma yaho, iyi kipe yakoze impinduka zikomeye, zirimo gusaba abakinnyi bayo kugabanya imishahara, abandi basabwa gushaka andi makipe mu gihe abakinnyi baguzwe babaga ari abakinnyi badahenze, rimwe na rimwe batari ku rwego rw’abari basanzwe bagurwa n’iyi kipe mu bihe byayo byiza.

Umusaruro wavuyemo ni uko iyi kipe yatangiye kutitwara neza mu kibuga, aho yasezerewe mu mikino ya UEFA Champions League mu matsinda, ikintu cyaherukaga mu myaka 17 yari yarabanje. Mu guhatanira ibikombe by’imbere mu gihugu, nabwo ntabwo FC Barcelone yigeze itanga akazi gakomeye kuri mukeka Real Madrid, ari nayo yegukanye igikombe cya Shampiyona muri icyo gihugu.

Amakuru yavugaga ko ibi bihe bikomeye by’ubukungu FC Barcelone irimo bishobora kuzamara imyaka myinshi, ndetse bikavugwa ko iyi kipe yahagaritse umushinga wo kuvugurura Stade yayo ya Camp Nou, igomba gusanwa ikanongererwa imyanya y’abafana, ku buryo abarenga ibihumbi 105 bazajya bareba imikino y’iyi kipe bicaye neza muri Stade itwikiriye hose. Igikorwa cyo kuvugurura iyi Stade ntabwo ari ikintu gito, kuko gishobora kuzatwara arenga miliyari 1.3$.

Icyakora mu buryo bwatunguranye cyane, iyi kipe iri mu makipe ari kwitwara neza ku isoko ry’igura n’igurisha ry’abakinnyi mu Burayi, aho yabashije kugura abarimo nka Robert Lewandowski wavuye muri Bayern Munich kuri miliyoni 48$ na Rafinha wavuye muri Leeds kuri miliyoni 63.8$. Aba bonyine bamaze gutangwaho arenga miliyoni 100$.

Ku rundi ruhande, iyi kipe imaze gusinyisha abarimo Franck Kessié wavuye muri AC Milan ku buntu na mugenzi we Andreas Bødtker Christensen wavuye muri Chelsea nawe waje ku buntu, nyuma y’uko aba bombi bamaze gusoza amasezerano yabo mu makipe barimo. Biravugwa ko abarimo César Azpilicueta na Marcos Alonso bo muri Chelsea FC nabo bari mu biganiro bishobora kuberekeza muri iyi kipe, mu gihe abarimo nka Ousmane Dembele na Gavi babashije kongera amasezerano bari bafitanye na FC Barcelone.

Ubu bushobozi budasanzwe iyi kipe iri kwerekana ku isoko ry’abakinnyi mu Burayi nibwo bwatumye abantu bibaza aho yakuye amafaranga, na cyane ko byavugwaga ko idafite n’ubushobozi bwo kwandikisha abakinnyi yamaze kugura, ku buryo kumva ko iri kugura abandi byakanze abatari bake, barimo na Nka Julian Nagelsmann, Umutoza wa Bayern Munich.

Uyu aherutse kwibaza uburyo FC Barcelone iri gukoresha mu rwego rwo kugura abakinnyi, kandi ari yo yagiye ku karubanda ikavuga ko ubukene buyugarije, ati “Iriya niyo kipe yonyine kw’Isi idafite amafaranga, ariko bakabona buri mukinnyi wese bakeneye.”

Ibi ntabwo byakiriwe neza n’uruhande rwa FC Barcelone, rwasabye uyu mutoza kwitonda akamenya iby’ikipe ye ibindi akabiharira bene byo.

Uburyo FC Barcelone iri gukoresha mu kugura abakinnyi

Nubwo FC Barcelone ari ikipe iri mu bihe bibi, yaba mu buryo bw’umusaruro wo mu kibuga ndetse no mu buryo bw’amikoro, ni ikipe isanzwe ikunzwe ku rwego mpuzamahanga, kandi abakinnyi benshi bakaba barakuze bifuza kuyikinamo.

Abakinnyi bariho uyu munsi, bari mu kigero kiri munsi y’imyaka 30, bakuze babona FC Barcelone iri mu bihe byiza cyane, kuva mu myaka ya za 2005 kugera muri za 2017. Muri ibyo bihe, aba bakinnyi bashobora kuba barahize kuzakinira FC Barcelone mu buzima bwabo, bakabigira inzozi bifuza kuzageraho, ku buryo iyo FC Barcelone ije gukomanga ku muryango wabo, benshi bemera batazuyaje.

Nk’urugero, abarimo Pierre-Emerick Aubameyang, ubwo yarekurwaga na Arsenal, yemeye kujya gukina muri iyi kipe nubwo byasabye ko agabanya umushahara we hafi inshuro eshatu zose. Uyu mugabo winjizaga ibihumbi 361$ buri cyumweru muri Arsenal, ubu ari kwinjiza ibihumbi 115$ gusa, kandi amakuru akavuga ko hari andi makipe yifuzaga kumuha umushahara urenze uwo FC Barcelone imuha, ariko akayahakanira.

Uru rukundo FC Barcelone ifitiwe n’abakinnyi benshi ruri mu bituma igumana ubushobozi bwo gukomeza kubona abakinnyi mu buryo busa nk’ubuhendutse, wenda binyuze nko mu kubagura bagahembwa make, cyangwa se ikababona biyoroheye, mu gihe barangije amasezerano mu yandi makipe bari basanzwe bakinira.

Ibi byabaye ku barimo nka Franck Kessié na Andreas Bødtker Christensen, bombi bemeye kujya muri FC Barcelone nubwo amakipe yabo yari yabemereye umushahara mwiza. Ku rundi ruhande, myugariro Jules Kounde wa FC Seville, yanze kwerekeza muri Chelsea imaze imyaka irenga itatu imwirukaho, amakuru akavuga ko ashobora gusinyira FC Barcelone mu minsi ya vuba.

Ikindi kintu kiri gufasha FC Barcelone kubona amafaranga ni ingamba zikomeye iherutse gushyiraho zagize uruhare mu kongera igishoro cyayo. Nk’urugero, iyi kipe iherutse gushyiraho uburyo butuma abafana bayo ku Isi yose, barenga miliyoni 250, aho iri ku mwanya wa kabiri mu kugira abafana benshi, bashobora guhabwa amakarita abemeza nk’abanyamuryango bayo, ingingo yakunze gukurura impaka cyane.

Ubusanzwe FC Barcelone ni ikipe itunzwe n’abanyamuryango bayo barenga ibuhumbi 10 banditswe mu buryo buzwi. Mu myaka yashize, wasangaga abantu bemererwa kwitwa abanyamuryango bayo ari abantu ba hafi b’iyi kipe, cyane cyane abakomoka mu miryango yagize uruhare mu kuyishyiraho, abatangamo agatubutse n’abandi bantu bakomeye, kandi benshi bakaba bakomoka mu gace ka Catalonia ikomokamo.

Ni kenshi abafana b’iyi kipe basabye ko bahabwa uburenganzira bwo kuyigiramo ijambo no kuyitera inkunga binyuze mu kwishyura amafaranga y’ubunyamuryango, ariko ubuyobozi bw’iyi kipe bukamagana iki cyifuzo. Gusa koko ngo ‘Amage arisha umugabo ikivuza;’ ubukene bwaranze butuma iyi kipe iva ku izima, yemerera n’abafana ba kure kwinjira mu banyamuryango bayo.

Iyi kipe kandi iherutse gufata ingamba zikomeye, aho yacuruje uburenganzira bungana na 25% bw’amafaranga izinjiza nk’ikiguzi yishyurwa na televiziyo zerekana imikino yayo muri Shampiyona ya Espagne, LaLiga.

Ubu burenganzira bwaguzwe n’ikigo cy’Abanyamerika kizwi nka ‘Sixth Street’ mu gihe cy’imyaka 25 iri imbere, aho cyishyuye miliyoni 305$. Ibi bivuze ko mu mafaranga iyi kipe yagombaga guhabwa ku mikino yayo Shampiyona LaLiga yerekanwa kuri televiziyo, 25% azajya ahabwa ‘Sixth Street’ mu kimeze nko kwiguriza.

Hari abavuga ko ubu buryo buzatuma FC Barcelone ikemura ikibazo ifite uyu munsi ariko bikaba bishobora kuyishyira mu mazi abira mu bihe biri imbere, gusa abandi bakavuga ko niramuka iguze abakinnyi bashoboye igakomeza kwitwara neza mu kibuga, bizayihesha amafaranga menshi bityo kwishyura bikoroha.

FC Barcelone kandi iherutse kugirana amasezerano na Spotify azatuma izajya yandikwa ku myambaro yayo. Izina ry’iyi Stade, ryari risanzwe ari Camp Nou, ryatangiye kwitwa ‘Spotify Camp Nou’ kuva kuwa 1 Nyakanga. Iri zina naryo FC Barcelone yari yararikomeyeho cyane, gusa miliyoni 308$ zatanzwe na Spotify mu gihe cy’imyaka ine iri imbere zatumye ubuyobozi bwayo butekereza kabiri.

Umuyobozi wa FC Barcelone, Joan Laporta aherutse kuvuga ko bamaze iminsi bakora amavugurura mu bijyanye n’ubukungu, ku buryo byabahaye ubushobozi bwo kugura abakinnyi, anavuga ko bagiranye ibiganiro na banki bafitiye umwenda kugira ngo bavugurure amasezerano.

Ati “Mu gihe kirenga umwaka, iyi kipe yari imeze nabi cyane. Twahinduye imiterere y’imyenda tubereyemo amabanki, turi kwizigama bikomeye, twagenzuye amafaranga dukoresha turayagabanya kandi twongera amafaranga twinjiza."

Mu mwaka utaha w’imikino, byetezwe ko iyi kipe izaba iri gutanga akazi gakomeye kuko ari imwe mu zifite abakinnyi bafite uburambe mu Burayi, cyane cyane mu busatirizi bwayo. Ikindi ni uko ari imwe mu makipe afite abakinnyi bakiri bato batanga icyizere barimo nka Ansu Fati, Pedri na Gavi bose bakiri munsi y’imyaka 20, ariko bari gutanga umusaruro ushimishije.

Ku rundi ruhande, Laporta yavuze ko ‘afitiye umwenda ukomeye Lionel Messi’ wavuye muri iyi kipe mu buryo butakunzwe n’abafana, aca amarenga ko iyi kipe ishobora kongera kumusinyisha ubwo azaba arangije amasezerano afitanye na Paris Saint Germain yo mu Bufaransa, agomba kurangira mu mpeshyi yo mu 2023.

Robert Lewandowski wavuye muri Bayern Munich kuri miliyoni 48$ ni umwe mu bakinnyi bakomeye baguzwe na FC Barcelone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .