Muhanga: Batatu bafunzwe kubera guhisha imibiri y’abazize Jenoside

Yanditswe na Mukwaya Olivier
Kuya 20 Kanama 2020 saa 04:05
Yasuwe :
0 0

Abagabo batatu barimo umushumba w’itorero rya ADEPR Gahoko bari mu maboko y’urwego rw’igihugu rushinzwe ubugenzacyaha (RIB) aho bakurikiranweho kubaka urusengero hejuru y’imibiri y’abazize Jenoside yakorewe abatutsi mu 1994.

Abafunzwe ni Pasiteri Munyankindi Landouard wafashwe tariki 16 Kanama 2020 naba Diyakoni Mugabarigira Narcisse wafashwe tariki 18 Kanama ndetse na Nzabonimpa Crysostome wafashwe tariki 19 Kanama 2020 bakaba bafungiye kuri Sitasiyo ya RIB ya Nyamabuye.

Umuvugizi w’umusigire wa RIB, Dr. Murangira Thierry, yemeje aya makuru avuga ko bafashwe kubera kubaka urusengero hejuru y’imibiri y’abazize Jenoside yakorewe abatutsi no guhisha amakuru.

Ati “Bakurikiranweho icyaha cyo kuzimiza cyangwa gutesha agaciro ibimenyetso cyangwa amakuru yerekeye Jenoside. Iri fungwa rifitanye isano n’imibiri y’abazize Jenoside yakorewe abatutsi yabonetse ubwo hubakwaga ikigega cy’amazi ku rusengero rwa ADEPR/Gahogo.”

“Mbere bubaka urusengero babonye iyo mibiri barayimura barayihisha, ejobundi barimo gusana ikigega nibwo yabonetse. Hari abatangabuhamya bavuga ko bayibonye ejobundi nabwo bababujije ngo baceceke’’.

Ingingo ya 8 mu Itegeko ryerekeranye n’icyaha cy’ingengabitekerezo ya jenoside n’ibyaha bifitanye isano nayo ivuga ko Umuntu, ku bushake, uhisha, wangiza, usibanganya cyangwa utesha agaciro ibimenyetso cyangwa amakuru byerekeye jenoside, aba akoze icyaha.

Iyo ahamijwe n’urukiko gukora kimwe mu bikorwa bivugwa mu gika cya mbere cy’iyi ngingo, ahanishwa igifungo kitari munsi y’imyaka irindwi (7) ariko kitarenze imyaka icyenda (9) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .