00:00:00 IGIHE NETWORK KN KINYARWANDA EN ENGLISH FR FRANCAIS

Mu Rwanda hagiye gutangizwa ubuvuzi bwo gusimbuza impyiko

Yanditswe na Ntabareshya Jean de Dieu
Kuya 1 June 2022 saa 09:49
Yasuwe :

Ibitaro byitiriwe Umwami Faisal byatangaje ko biri kwitegura gutangiza ubuvuzi bwo gusimbuza impyiko bukunze gutwara akayabo abifuza izo serivisi, kuko butabonekaga mu Rwanda.

Kuri uyu wa 1 Kamena 2022 nibwo ubuyobozi bw’ibitaro byitiriwe Umwami Faisal byatangaje ko bigiye gutangiza gahunda y’ubuvuzi bwo gusimbuza impyiko cyane ko babona ko hari umubare munini w’Abanyarwanda bakeneye guhabwa ubwo bufasha, bikabasaba kujya hanze y’u Rwanda.

Ubu buvuzi buzatangira gutangwa muri ibi bitaro nibura mu mpera z’uyu mwaka kandi bizaba ari ku nshuro ya mbere bikorewe mu Rwanda, bishimangire iterambere ry’ubuvuzi bw’u Rwanda.

Umuyobozi ushinzwe Ibikorwa by’Ubuvuzi mu bitaro byitiriwe Umwami Faisal, Dr. Sendegeya Augustin, yavuze ko mu gihe cya vuba ibi bitaro bizaba byatangiye gutanga ubu buvuzi.

Dr. Sendegeya yavuze ko banasanzwe bafite ubuvuzi bwo gukurikirana abafite ibibazo by’impyiko ariko bakenera gukorerwa amasuku ibizwi nko kuyungurura amaraso.

Yakomeje agira ati “Nubwo tuvuga ngo kwirinda biruta kwivuza, tugomba gushyiraho n’uburyo iyo ibibazo byavutse izo ndwara twajya tuzivuriza mu gihugu. Nk’uko mubizi, iyo abarwayi bajya hanze ni ubuvuzi buhenze cyane. Niyo mpamvu ku bufatanye n’abafatanyabikorwa batandukanye, twatangiye kubaga indwara z’umutima.”

Yongeyeho ati “Ahandi turi kwitaho cyane ni ibyerekeye indwara z’impyiko. Murabizi ko abantu bafite uburwayi bw’impyiko buhoraho bisaba ko hakoreshwa uburyo bwo kuyungurura amaraso yabo n’imashini, twari dufite imashini 10 dukoresha ariko mu minsi iri imbere tuzaba dufite 20, tubijyanisha na gahunda dufite yo gutanga ubuvuzi bwo gusimbuza impyiko mu buryo buhoraho.”

Dr Sendegeya yavuze ko igiteye impungenge kurusha ibindi ari uko usanga no mu Banyarwanda bafite ibibazo by’impyiko, higanjemo abakiri bato mu gihe ahandi abakunze kugira ibibazo nk’ibyo baba ari abarengeje nibura imyaka 70.

Ati: “Iki ni ikibazo navuga ko gikomeye, ni ukubera impamvu biri kuba mu bakiri bato kandi byari bisanzwe biba ku bantu bakuru bafite imyaka 70 y’amavuko kuzamura.”

Yongeyeho ko nibura abantu 50 bakenera serivisi zo kuyungurura amaraso yabo buri kwezi.

Kugeza ubu umuntu ufite ikibazo cyo kuyunguruza amaraso, abikora inshuro eshatu mu cyumweru kandi nibura ubikora bimusaba gutanga hagati y’ibihumbi 100 Frw n’ibihumbi 110 Frw ku nshuro imwe, bivuze ko mu cyumweru, ikiguzi kibarirwa hagati y’ibihumbi 200 Frw na 300 Frw.

Kubera ko ubu buvuzi buhenze, Dr. Sendegeya yavuze ko hari gahunda yo gufasha Abanyarwanda kugira ngo babone uko bivuza, bigakorwa binyuze mu bufatanye bw’ibitaro bya Faisal n’Urwego rw’Ubwiteganyirize, RSSB, aho hashobora gukoreshwa Mutuelle de Santé.

Umuyobozi Mukuru w’ibitaro byitiriwe Umwami Faisal, Prof Miliard Derbew, yavuze ko hari abaganga babiri ibi bitaro byamaze kohereza muri Bresil kwihugura mu bijyanye no gusimbuza impyiko, kugira ngo bazahugure na bagenzi babo.

Bigenda bite ngo ibyiko zangirike

Abantu benshi bakunze kwibaza uko bishobora kugenda kugira ngo umuntu agire impyiko idakora neza cyangwa se ahure n’ibibazo bishobora kuzangiza, ariko Dr. Sendegeya asobanura zimwe mu mpamvu zishobora gutuma umuntu agira ibibazo bifitanye isano n’impyiko n’uburyo bwo kuzirinda kwangirika.

Agaragaza ko hari ibibazo ibintu bitatu by’ingenzi bishobora gutera kwangirika kw’imbyiko, birimo indwara zitandura nka Diabete n’umuvuduko w’amaraso.

Hari kandi abashobora kuvukana icyo kibazo, akavuka impyiko zidakora neza. Abahanga bagaragaza ko uburwayi bw’impyiko kandi bushobora no kuba uruherekane rwo mu miryango.

Mu rwego rwo kwirinda iyangika ry’impyiko, abaturarwanda bagirwa inama yo kurya indyo yuzuye no gukora neza siporo cyane ko ari ingirakamaro ku mikorere y’umubiri w’umuntu.

Hari kandi gukoresha neza umuti yandikiwe na muganga bigendanye n’uburwayi runaka yasanzwemo, by’umwihariko ku ndwara zitandura.

Ikindi abantu babwirizwa kwirinda mu rwego rwo kubungabunga impyiko zabo, ni ukwirinda kunywa itabi cyane ko riri no mu bishobora gutera kwangirika kwazo.

Bimwe mu bimenyetso by’uko umuntu afite ikibazo cy’impyiko harimo kuruka, kubura ‘appetit’, kugira umunaniro n’intege nke bihoraho, kunyara buri kanya cyangwa gake gashoboka, umuvuduko w’amaraso, kuribwa imitsi n’ibindi bitandukanye.

Kwagura ibikorwa by’ubuvuzi mu bitaro byitiriwe umwami Faisal bishobora kongera umubare w’abitabira ubukerarugendo bushingiye ku buvuzi cyane ko u Rwanda rwifuza kuzamura uru rwego binyuze mu gutanga ubuvuzi budakunze kuboneka henshi muri Afurika.

Umuyobozi Mukuru w’ibitaro byitiriwe Umwami Faisal, Prof Miliard Derbew, yavuze ko hari abaganga babiri ibi bitaro byamaze kohereza muri Bresil kwihugura mu bijyanye no gusimbuza impyiko
Inyubako ivurirwamo abarwayi b'abanyacyubahiro
Ibitaro by'Umwami Faisal biri hafi biri hafi gutangira gutanga serivisi zo gusimbuza imbyiko
Imyiteguro irakomeje ku bitaro by'Umwami Faisal
Ibitaro by'Umwami Faisal bifite ibikoresho bigezweho bidapfa kuboneka ahandi mu Rwanda
Abanyamakuru basobanuriwe gahunda z'ibitaro by'Umwami Faisal

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .