MTN Rwanda yibutse Jenoside yakorewe Abatutsi, urubyiruko rusabwa kugendera kure abayipfobya

Yanditswe na Ntabareshya Jean de Dieu
Kuya 20 Mata 2021 saa 03:12
Yasuwe :
0 0

Sosiyete y’Itumanaho mu Rwanda MTN Rwanda, yibutse Jenoside yakorewe Abatutsi 1994 biciwe mu yahoze ari kiliziya yahinduwe Urwibutso rwa Nyamata mu Karere ka Bugesera.

Iki gikorwa cyo kwibuka ku bakozi ba MTN Rwanda cyitabiriwe n’abakozi bake muri gahunda yo kubahiriza amabwiriza yo kwirinda Covid-19 bibera ku rwibutso rwa Nyamata ruri mu karere ka Bugesera mu Murenge wa Nyamata.

Umuhango watangijwe no gushyira indabo no kunamira imibiri y’abatutsi basaga ibihumbi 45 biciwe mu yahoze ari Kiliziya Gatolika ya Nyamata kuri ubu yahinduwe urwibutso kubera ibikorwa bya kinyamaswa byokoremo.

Umukozi ushinzwe abakozi muri MTN Rwanda, Luyenzi Enock yavuze ko kwibuka ku ruhande rwa MTN bikorwa mu rwego rwo kwifatanya n’abanyarwanda muri ibi bihe.

Yavuze ko kandi nka MTN badateze guceceka mu rwego rwo kugaragariza amahanga ibyabaye ndetse no kurwanya abapfobya Jenoside yakorewe Abatutsi bivuye inyuma.

Ati “Nka MTN dukorera mu bihugu bigera kuri 20 muri Afurika, tugomba kubivuga n’abandi bakabimenya ko mu Rwanda habaye Jenoside yakorewe abatutsi tugamije ko bitazongera kuba n’ahandi ku Isi.”

Luyenzi yavuze ko urubyiruko rukwiye kuba icyizere cy’ejo hazaza kandi rugashyira imbaraga mu kurwanya umuntu wese ushobora kuruyobya.

Yagize ati “Urubyiruko nicyo cyizere cy’igihugu, nicyo cyizere cy’iyi Isi mu gihe tugezemo uyu munsi. Urubyiruko rugomba kureba ibyabaye mu Rwanda nk’icyitegererezo gikomeye cyane kugira ngo ntihazagire uzagerageza kubabeshyabeshya yongera kubashora mu gikorwa nk’iki kibi.”

Umukozi mu ishami ryo kwamamaza muri MTN Rwanda, Wibabara Gisele Fanny, yavuze ko kwibuka bikwiye kubabera isomo rikomeye n’umukoro wo guhangana n’abakigagaraho gupfobya Jenoside yakorewe abatutsi.

Yagize ati “Jenoside yakorewe Abatutsi muri iki gihugu ntabwo ikwiye kumenyerwa n’uwari we wese. Iyo turi hano twibutswa impamvu duhora twibuka, kugira ngo nk’urubyiruko tubirebereho tumenye ko bitazasubira ukundi haba mu Rwanda ndetse n’ahandi ku Isi. Ni naho kandi dukwiye gushyira imbaraga cyane aho guta umwanya ku bidafite umumaro kugira ngo abazadukomokaho bazagire uruhare mu kubaka igihugu aho kugisenya.”

Yavuze ko uburyo bushoboka urubyiruko rwakoresha mu kurwanya abapfobya n’abafite ingengabitekerezo ya Jenoside ari uko rwakigishanya mu matsinda rubarizwamo, rukarangwa no guhugurana bityo ibitekerezo bibi bikarandurwa muri bagenzi babo.

Umuyobozi mukuru wa MTN Rwanda Mitwa Kaemba Ng’ambi mu ijambo rigufi, yagarutse ku butwari u Rwanda rwagaragaje mu rugendo rwo kwiyubaka ashimangira ko amahanga akwiye kurwigiraho.

Incamake ku rwibutso rwa Nyamata…

Aho uru rwibutso rwubatswe ubusanzwe hahoze hari kiliziya gaturika ya Nyamata. Ubwo ibikorwa byo kwica no kumenesha abatutsi mu 1959 byatangiraga, bamwe bagiye bahungira mu nsengero bazi ko bari buharokokere.

Abahungiye mu nsengero bumvaga ko ariho hantu heza ho kwihisha no kubonera amahoro muri ibyo bihe by’amage bari barimo.

Kuva muri ibyo bihe kuri iyi kiliziya hagendaga hicirwa abantu mu bihe bitandukanye, ndetse byageze aho muri 1992 abatutsi batari bake bicwa n’abari abasirikari kuri leta yariho icyo gihe.

Mu 1994 byahumiye ku mirari ubwo abatutsi benshi bahungiye muri iyi kiliziya ariko ababahigaga bakomeza kubagenza ndetse bagerageza kwihagararaho ariko biba ngombwa ko abasirikari baza gutanga umusanzu ku nterahamwe, bica abari bari mu kiliziya bose hatitawe ku ngano yabo.

Ubuhamya bugaragara ku nkuta z’amateka muri uru rwibutso bigaragara ko hari abarokokeye aho ngaho nubwo ababahigaga batifuzaga ko hagira n’umwe urokoka.

Hari n’abaje gukwira imishwaro bava aho mu kiliziya berekeza mu bigunda no mu bishanga ariko n’ubundi interahamwe zikabasangayo zikabica urubozo abandi bakajugunywa mu mugezi wa Akagera.

Muri 1997 iyi kiliziya yambuwe umugisha wo gusengerwamo kubera ibikorwa bitari ibya kimuntu byakorewemo n’abakoze Jenoside maze hahindurwa urwibutso kugira ngo ayo mateka asigasirwe.

Kugeza ubu nta mubare uzwi neza w’imibiri ishyinguwe muri uru rwibutso ariko bavuga ko abiciwemo mu bihe bitandukanye barenga 45.000 barimo abagabo, abagore n’abana.

Aba bakozi bashyize indabo ku mva mu rwego rwo guha agaciro abiciwe mu Kiliziya ya Ntarama
Hitabiriye abakozi bake mu rwego rwo kubahiriza amabwiriza yo kwirinda Covid -19
Aha abakozi ba MTN Rwanda basobanurirwaga ibiri ku nkuta z'amateka agaragaza abiciwe muri iyi kiliziya ya Ntarama
Umuyobozi mukuru wa MTN Rwanda Mitwa Kaemba Ng'ambi yavuze ko u Rwanda rukwiye kuba icyitegererezo kugira ngo Jenoside itazongera ukundi
Umuyobozi mukuru wa MTN Rwanda Mitwa Kaemba Ng'ambi
Wibabara Gisele Fanny yavuze ko urubyiruko rukwiye guhugurana no guhashya ingengabitekerezo ya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .