00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Intebe yatashye ku mugaragaro ibikorwaremezo by’iterambere birimo Ibitaro bya Munini

Yanditswe na Prudence Kwizera
Kuya 4 July 2022 saa 07:30
Yasuwe :

Minisitiri w’Intebe Dr Ngirente Edouard, yashyikirije abaturage bo mu Karere ka Nyaruguru impano y’ibikorwaremezo bemerewe na Perezida Kagame kuri uyu munsi u Rwanda rwizihiza ku nshuro ya 28 Isabukuru yo Kwibohora.

Ibyo bikorwaremezo birimo Ibitaro bya Munini byuzuye bitwaye amafaranga agera kuri Miliyari 9 Frw; Umudugudu w’Icyitegererezo wa Munini (Munini IDP Model Village) ugizwe n’inzu zatujwemo imiryango 48; ishuri rya G.S Munini rifite ibyumba 18 byo kwigiramo, laboratwari ebyiri, icyumba cy’ikoranabuhanga, icyumba cyo kuriramo cyakira abantu 1000, igikoni n’ibyumba bitatu byigiramo abana b’incuke.

Hari kandi Ikigo Mbonezamikurire y’Abana bato cya Munini; Agakiriro; aho gucururiza n’ibindi birimo ubusitani, uturima tw’igikoni, amazi meza, amashanyarazi, imihanda n’ingurane ku baturage. Byose byatwaye asaga miliyari 15 Frw.

Hatashywe n’umuhanda wa kaburimbo Huye-Kibeho-Munini-Ngoma ureshya n’ibilometero 66 watwaye asaga Miliyari 72 Frw.

Bamwe mu baturage bo mu Karere ka Nyaruguru babwiye IGIHE ko ibikorwaremezo bahawe byatangiye kubahindurira ubuzima.

Musabyimana Alphonsine ati “Ndashimira Perezida Paul Kagame wita ku mfubyi n’abapfakazi akareba abafite ibibazo akabibakemurira."

Umuturage witwa Martha Ntakirutimana wo mu Murenge wa Ruheru yatanze ubuhamya avuga ko bari mu rugendo rw’iterambere bubakiye ku bikorwaremezo bahawe.

Yavuze ko inyongeramusaruro zirimo ishwagara bahawe zatumye umusaruro w’ibihingwa wiyongera ku buryo basigaye basagurira n’isoko.

Ati “Twakorewe amaterasi y’indinganire, duhabwa n’imbuto nziza none ubu tubona umusaruro ushimishije.”

Umuyobozi w’Akarere ka Nyaruguru, Murwanashyaka Emmanuel, yavuze ko hari byinshi bamaze kugeraho mu rwego rwo kwiteza imbere kandi urugendo rwo kwiyubaka barukomeje bafatanyije.

Ati "Turashima Ubuyobozi bukuru bw’Igihugu cyacu bwamenye igikwiriye ubutaka bwa Nyaruguru bukatwoherereza abashoramari mu kongera ubuso duhingaho icyayi bwavuye kuri hegitari 3834 bugera ku 6500 mu gihe cy’imyaka 10 kandi buzakomeza kwiyongera."

Yavuze ko bafite inganda eshatu zitunganya uwo musaruro kandi icyayi cya Nyaruguru gihagaze neza ku isoko mpuzamahanga.

Ati "Turashimira kandi inyongeramusaruro twahawe zirimo ishwagara, ifumbire n’imbuto nziza kandi biriho nkunganire ya Leta, byatumye umusaruro w’ubuhinzi wiyongera kuburyo bufatika. Urugero twatanga ni ibirayi, umusaruro wavuye kuri kuri toni 14 ugera kuri toni 26 kuri hegitari. Ibi ni na ko bimeze ku bindi bihingwa ngandurarugo."

Yavuze ko bishimira ko 89% by’abaturage b’Akarere ka Nyaruguru bafite amazi meza kandi bayabona badakoze urugendo rurerure. Abaturage 93,3% bagerwaho n’amashanyarazi harimo abagera kuri 41,6% bafite akomoka ku muyoboro mugari na 51,7% ava ku ingufu z’izuba.

Minisitiri w’Intebe Dr Ngirente yabasabye gufata neza impano y’ibikorwaremezo bagenewe n’Umukuru w’Igihugu, kugira ngo bibateze imbere kuko ari cyo kiba kigamijwe.

Ati "Nagira ngo mbabwire ko naje hano n’abandi bayobozi twazanye kugira ngo tubagezeho impano y’ibikorwaremezo mwagenewe na Nyakubahwa Perezida wa Repubulika ndetse akaba yarifuje ko tubibashyikiriza ku mugaragaro kuri iyi tariki ya 4 Nyakanga ku Munsi wo Kwibohora.”

Yakomeje agira ati “Ndagira ngo mbasabe gufata neza iyi mpano, tubifate neza twumve ko ari ibyacu, tubigire ibyacu ariko tunabibyaze umusaruro utuganisha ku iterambere.”

Yababwiye ko nta wukwiye kurwara ngo ahere mu rugo kandi baregerejwe ibitaro n’andi mavuriro; ko abatwara ibicuruzwa bakwiye kubikora neza kuko umuhanda uhari kandi abana bakajya kwiga kuko amashuri na yo bayegerejwe.

Ati “Mu by’ukuri ni impano idakwiye kudupfira ubusa ahubwo izunganira wa musingi twavuze w’iterambere tumaze kugeraho mu myaka 28 ariko urugamba rw’iterambere nk’uko mubizi ntirurangira ahubwo rurakomeje.”

Yabijeje ko uko ubushobozi buzajya buboneka ibikorwa bizajya byongerwa.

Mu gihugu hose kuri uyu wa Mbere hatashywe ibikorwa birimo imidugudu cy’icyitegererezo, amavuriro, inzu zubakiwe abatishoboye, amashuri, imihanda, amazi, amashanyarazi n’ibindi byatwaye asaga miliyari 191 Frw.

Umuhanda wa kaburimbo Huye-Kibeho-Munini-Ngoma ureshya n’ibilometero 66
Mu marembo ya Nyaruguru ni uku hameze
Hubatswe n'ibiraro bikomeye ku buryo imodoka zitambuka nta nkomyi
Iki kigo cy’ishuri cyubatswe ku Minini kizigamo abana bagera ku 1630 mu mashuri y’inshuke, abanza n’ayisumbuye
Ibitaro bya Munini biri mu bikorwaremezo byatashywe ku mugaragaro mu Karere ka Nyaruguru
Kimwe mu bice bigize Ibitaro bya Munini byatashywe ku mugaragaro
Minisitiri w'Intebe Dr Ngirente Edouard, yashyikirije abaturage bo mu Karere ka Nyaruguru impano y’ibikorwaremezo bitandukanye bahawe na Perezida Kagame abasaba kuyifata neza
Minisitiri w'Intebe ubwo yasuraga Ikigo Mbonezamikurire y’Abana bato cya Munini
Minisitiri w'Intebe, Dr Ngirente Edouard aramukanya n'Umuyobozi w'Akarere ka Nyaruguru, Murwanashyaka Emmanuel
Abana bo mu Karere ka Nyaruguru basigaye bigira ahantu heza kuva bakiri bato
Abanyeshuri basabwe kwiga bashyizeho umwete
Bafite abarezi beza batojwe kubigisha bakiri bato
Bashimye uburyo abana bigishwa neza
Dr Ngirente areba mudasobwa zagenewe abanyeshuri muri GS Munini
Abatujwe muri uyu mudugudu basabwe kuwufata neza
Uyu mudugudu w'icyitegererezo wa Munini wubakiwe imiryango itishoboye
Uyu mudugudu wagenewe imiryango 48 igizwe n’abantu 164 barimo abari bamaze igihe basembera abatagira aho kuba, abafite amacumbi ashaje n’abari batuye mu manegeka
Abaturage bo mu Karere ka Nyaruguru bishimiye ibikorwaremezo bahawe n'Umukuru w'Igihugu
Abaturage bo mu Karere ka Nyaruguru bizihije isabukuru yo kwibohora mu byishimo
Abayobozi bakurikiye uko abana bigishwa ikoranabuhanga
Abayobozi basuye ibiraro by'ingurube zahawe abatujwe mu Mugududu wa Munini
Abayobozi basabwe gukomeza kuba hafi y'abaturage kugira ngo impano bahawe ibagirire akamaro
Dr Ngirente aganira na Minisitiri w'Ubuzima Dr Ngamije Daniel mu Bitaro bya Munini
Martha Ntakirutimana wo mu Murenge wa Ruheru yatanze ubuhamya avuga ko bari mu rugendo rw'iterambere bubakiye ku bikorwa remezo bahawe
Minisitiri w'Intebe Dr Ngirente aganira na Minisitiri w'Ubutegetsi bw'Igihugu Gatabazi Jean Marie Vianney
Minisitiri w'Intebe Dr Ngirente ari kumwe n'abandi bayobozi basuye ibikorwa remezo byahawe abaturage mu Karere ka Nyaruguru
Minisitiri w'Intebe Dr Ngirente ubwo yari ageze mu Mudugudu w'Icyitegererezo wa Munini
Bahawe ingurube nziza zitezweho kuzamura iterambere ryabo
Aho abanyeshuri bicara mu isomero bahawe
Aho abanyeshuri barira naho harateguye kandi hameze neza
Dr Ngirente yasobanuriwe imitangire ya serivise mu Bitaro bya Munini
Buri nzu irimo ibyangombwa by'ibanze birimo intebe n'ameza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .