00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Intebe yagaragaje amahoro arambye nk’inzozi mu gihe ibibazo by’abaturage bitakemurwa

Yanditswe na Kanamugire Emmanuel
Kuya 8 July 2022 saa 03:12
Yasuwe :

Minisitiri w’Intebe, Dr Edouard Ngirente, yavuze ko amahoro arambye ibihugu biririmba adashobora kugerwaho mu gihe bimwe mu bibazo bishegesha abaturage byaba bititaweho ngo bibonerwe ibisubizo.

Ni ubutumwa yatanze kuri uyu wa 8 Nyakanga 2022, ubwo yafunguraga ku mugaragaro Inteko Rusange ya 47 y’Inteko Ishinga Amategeko y’Ibihugu Bikoresha Igifaransa (Assemblée Parlementaire de la Francophonie: APF), imaze iminsi ibera mu Rwanda.

Yitabiriwe n’abagera kuri 300 bahagarariye Inteko Zishinga Amategeko zo mu bihugu bigera kuri 90 bibarizwa muri ’Francophonie’, kuva ku wa 5-9 Nyakanga 2022.

Inteko Rusange ya APF iterana inshuro imwe mu mwaka. Uyu mwaka ibereye mu Rwanda ku butumire bw’Inteko Ishinga Amategeko y’u Rwanda nyuma y’imyaka ibiri yari imaze ititabirwa imbonankubone kubera ingamba zo kurwanya Covid-19.

Ni urubuga abayitabira baganiriramo kandi bagafata imyanzuro ku bibazo bikomereye isi n’ibihugu byo mu Karere ka ’Francophonie’ by’umwihariko.

Minisitiri w’Intebe, Dr Edouard Ngirente, yagaragaje ko imiyoborere myiza ari inkingi ikomeye mu gukemura ibibazo byugarije abaturage ndetse ikaba imbarutso y’iterambere.

Ati “Hatariho imiyoborere myiza n’inzego zihamye kandi zidaheza, imbaraga dushyira mu guharanira iterambere n’amahoro arambye zaba ari impfabusa.”

Yakomeje agira ati “Amahoro arambye tuvuga ntashobora kugerwaho mu gihe bimwe mu bibazo by’imibereho y’abaturage bidakemuwe. Urugero natanga ni nk’ibijyanye no kubona ibiribwa bihagije, uburezi no kwita ku rubyiruko mu buryo budaheza, kugira inzego z’ubuzima zikomeye n’ibikorwaremezo biboneye.”

Dr Ngirente yagaragaje ko abadepite nk’intumwa za rubanda bagira uruhare rukomeye mu ishyirwa mu bikorwa rya politiki zibagenewe [abaturage], bakaba inkingi n’abarinzi b’ibihugu bigendera ku mategeko na demoakarasi.

Ati “Ni ngombwa gushimangira ubufatanye bw’ubutegetsi nyubahirizategeko n’Inteko Zishinga Amategeko mu rwego rwo guhangana n’ibibazo byugarije isi.”

Dr Ngirente yavuze ko ibizaganirwaho bizafasha buri nteko igira icyo yigira ku yindi, bikazatanga umusanzu mu gushyigikira politiki y’imiyoborere myiza mu bihugu bikoresha Igifaransa.

Yongeyeho ko ibibazo by’ubuzima ku rwego rw’isi byatewe na Covid-19 byagize ingaruka zikomeye ku mibereho myiza n’ubukungu ku batuye isi bose ariko ko byasize amasomo akomeye.

Ati “Urugero, icyorezo cya Covid-19 cyatweretse akamaro ku kwegera abaturage no gufatanya guhangana na cyo.Twongeye kumva ko tugomba gukomeza kwegera abaturage bacu by’umwihariko abafite intege nke kurusha abandi muri sosiyete.”

Ku Rwanda iyi nteko ya APF ngo iziye igihe kuko mu ntangiriro z’iki cyumweru ari bwo u Rwanda rwizihije isabukuru ya 28 yo kwibohora hishimirwa intambwe yatewe n’igihugu mu myaka 28 ishize.

Muri uru rugendo ngo ubumwe n’ubwiyunge byabaye inkingi ikomeye mu kongera kubaka amahoro n’umutekano.

Perezida w’Inteko Ishinga Amategeko y’u Rwanda, Umutwe w’Abadepite, Donatille Mukabalisa, yashimiye abagize uruhare mu itegurwa ry’iyi Nteko Rusange byatumye ibaho mu mudendezo.

Nubwo Inteko yafunguwe uyu munsi, ibikorwa byayo bimaze iminsi itatu bikorerwa muri za Biro, Amahuriro y’Abagore n’Urubyiruko bari mu Nteko Zishinga Amategeko ndetse na za Komisiyo zihoraho.

Depite Mukabalisa yavuze ko uyu ari umwanya mwiza wo gusangira ubunararibonye nk’abahagarariye abaturage bavuye mu bihugu bitandukanye bya Francophonie harebwa uko basubiza ibyo ababatoye babitezeho.

Ni umwanya kandi wo gutekereza no kuganira ku ruhare abagize inteko zishinga amategeko bagomba kugira mu kwimakaza amahoro n’umutekano mu Karere bahuriyeho.

Yasabye abitabiriye kubyaza umusaruro iyi nama no kumvikanisha ijwi ryabo ku bibazo byugarije Francophonie binyuze mu myanzuro bazayifatiramo.

Ati "Nizeye ko iyi nama izagera ku ntego zayo kandi igatanga umusaruro ushimishije."

Perezida wa APF akaba na Perezida w’Inteko Ishinga Amategeko ya Cote d’Ivore, Adama Bictogo, yijeje ko azagera ikirenge mu cya Amadou Soumahoro yasimbuye [aherutse kwitaba Imana] mu kwimakaza ubufatanye bw’abanyamuryango ba APF.

Yavuze ko mu bibazo byugarije ibihugu binyamuryango harimo ubukene, ingaruka za Covid-19, abimukira bagwa mu nyanja, ubushomeri mu rubyiruko, abagore bakumirwa mu nzego zifata ibyemezo n’ingaruka z’intambara hagati y’u Burusiya na Ukraine.

Hari kandi inzego z’ubutegetsi na politiki zigejageja bigaragazwa n’itembagazwa ry’inzego zatowe n’abaturage harimo n’Inteko Zishinga Amategeko.

Yavuze ko Inteko Zinshinga Amategeko zigomba gufata ingamba zikomeye zigamije gushakira abaturage ibisubizo bakeneye.

Insanganyamatsiko y’ibiganiro igira iti “Imiyoborere ku rwego rw’Isi: Uruhare rw’Inteko Zishinga Amategeko ku kwimakaza amahoro arambye”.

Uretse abari mu Nteko Zishinga Amategeko, iyi nama yanitabiriwe n’abahagarariye ibihugu byabo ndetse n’abaminisitiri.

Minisitiri w’Intebe, Dr Edouard Ngirente, yavuze ko imiyoborere myiza ari umusingi w'amahoro arambye n'iterambere ry'abaturage
Perezida w’Inteko Ishinga Amategeko y’u Rwanda, Umutwe w’Abadepite, Donatille Mukabalisa, ubwo yahaga ikaze abitabiriye Inteko Rusange ya APF
Perezida wa APF akaba na Perezida w’Inteko Ishinga Amategeko ya Cote d’Ivore, Adama Bictogo, ubwo yagezaga ubutumwa ku bitabiriye Inteko Rusange ya APF
Senateri Innocent Nkurunziza wahuzaga ibiganiro ubwo hafungurwaga ku mugaragaro Inteko Rusange ya APF
Perezida wa APF akaba na Perezida w’Inteko Ishinga Amategeko ya Cote d’Ivore, Adama Bictogo, aganira na Minisitiri w'Intebe w'u Rwanda, Dr Edouard Ngirente
Perezida wa APF akaba na Perezida w’Inteko Ishinga Amategeko ya Cote d’Ivore, Adama Bictogo (iburyo), Minisitiri w'Intebe, Dr Edouard Ngirente na Perezida w'Umutwe w'Abadepite, Mukabalisa Donatille
Inteko Rusange ya APF yafunguwe ku mugaragaro kuri uyu wa Gatanu muri Kigali Convention Centre
Visi Perezida wa Sena, Nyirasafari Esperance
Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascene asuhuza bamwe mu bitabiriye inama
Minisitiri w'Ubutegetsi bw'Igihugu, Gatabazi Jean Marie Vianney na we ari mu bitabiriye iyi nama
Inteko rusange ya APF iteraniye mu Rwanda nyuma y'imyaka ibiri bidashoboka ko iba imbonankubone
Bamwe mu basenateri bo mu Nteko Ishinga Amategeko y'u Rwanda bitabiriye Inteko Rusange ya APF
Abitabiriye iyi nama bakigera mu myanya bari bateguriwe bafataga akanya bakaganira
Visi Perezida w'Inteko Ishinga Amategeko y'u Rwanda, Umutwe w'Abadepite, Harelimana Musa Fazil (iburyo) aganira n'umwe mu bitabiriye inama
Visi Perezida w'Umutwe w'Abadepite, Musa Fazil Harelimana
Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascene asuhuza bamwe mu bitabiriye inama

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .