Minisitiri Mutimura yagaragaje uburyo abiga Siyansi bakwigishwa bikazamura ireme ry’uburezi

Yanditswe na Evariste Nsengimana
Kuya 6 Gashyantare 2020 saa 07:38
Yasuwe :
0 0

Minisitiri w’Uburezi Dr Eugène Mutimura yagaragaje ko kugira ngo abanyeshuri babone ubumenyi bubafasha gukemura ibibazo byugarije iterambere ry’ubukungu ari uko abarezi bahindura uburyo bw’imyigishirize bakanahanga udushya dufasha kuzamura ireme ry’uburezi, bakagira ubumenyi bukenewe ku isoko ry’umurimo.

Ni ubutumwa yahaye abayobozi mu mashami ya Kaminuza y’u Rwanda n’abarimu bigisha Siyansi kuri uyu wa 5 Gashyantare 2020 mu nama bagiranye igamije kujya inama ku buryo bwo guteza imbere imyigire n’imyigishirize hagamije guteza imbere ireme ry’uburezi.

Abitabiriye iyi nama babanje gutanga ibitekerezo bitandukanye by’uburyo babona ubumenyi baha abanyeshuri bwarushaho kugira ireme no kubafasha gusubiza ibibazo byuganirije iterambere ry’ubukungu.

Muri ibyo bitekerezo bagarutse ku kongera ikigero cy’imikoreshereze y’ururimi rw’Icyongereza mu mashuri, kongera ibikorwa remezo bifasha abarezi guha abanyeshuri ubumenyi bubafasha guhangana ku isoko ry’umurimo, kubafasha kwimenyereza umwuga, gukora ubushakashatsi, kongera amasuzumabumenyi bahabwa n’ibindi.

Umwarimu muri Kaminuza y’u Rwanda, Dr Rusine Jean Baptiste yavuze ko abanyeshuri kugira ngo barusheho kurangiza bafite ubumenyi bufite ireme bagomba gutegurwa guhera mu mashuri abanziriza Kaminuza kuko hari abagerayo ugasanga bafite icyuho mu bumenyi butangirwa mu mashuri abanza.

Ati “Ikindi umunyeshuri yigishwe n’abarimu ariko na we yiyigishe, ubu ikoranabuhanga riratuma abasha kujya muri za mudasobwa, mu masomero kahavoma ubumenyi bwisumbuye. Umunyeshuri w’umuhanga uzi icyo ashaka, arenga ubumenyi yahawe, akiha umukoro umunsi ku wundi.”

Minisitiri Mutimura yababwiye ko bakwiye guhindura uburyo bw’imyigire n’imyigishirize kugira ngo ireme ry’uburezi barangizanya rirusheho gutera indi ntambwe.

Ati “Icy’ingenzi ni uburyo duha abanyeshuri amasomo. Hari uburyo bwinshi bw’imyigishirize. Nk’inzobere icyo twababwira ni uko dukeneye ko abanyeshuri bacu bagira ubumenyi bukenewe nyuma y’uko bigishwa.”

Minisitiri Mutimura yavuze ko kugira ngo ibyo bigerweho ari uko hejuru yo gukunda umwuga bagomba no kurangwa n’udushya mu myigishirize.
Ati “By’umwihariko mukabaha amahirwe yo kuvumbura, gukorera hamwe n’amarushanwa.”

Ibi ngo bifasha abanyeshuri batari abahanga cyane kwigira ku bahanga kugira ngo barusheho kurangiza bafite ubumenyi bubafasha guhangana ku isoko ry’umurimo.

Minisitiri Mutimura yavuze ko abanyeshuri barangije kwiga Kaminuza by’umwihariko amasomo ya Siyansi bagira uruhare mu guteza imbere inganda n’umusaruro zitanga.

Ati “Leta hari byinshi turimo gukemura kugira ngo abana bige neza bagire ubushobozi bityo bidufashe guteza imbere inganda zacu n’iterambere ry’igihugu cyacu.”

Abayobozi b’amashami ya Kaminuza y’u Rwanda n’abashinzwe amasomo atandukanye kandi basabwe kwegera abanyeshuri kugira ngo barusheho kumenya imbogamizi bahura nazo no kubagira inama zitandukanye ziganisha igihugu ku kubaka ubukungu bushingiye ku bumenyi nk’uko biri mu cyerekezo Guverinoma yihaye.

Ati “Twabasaba kwegera abanyeshuri bakabagaragariza intumbero y’igihugu yo kugira ngo bahindure, bavugurure imyigishirize kugira ngo tugere ku cyo twifuza koko nk’u Rwanda, bareke gutegereza ngo byikore batabigizemo uruhare rufatika.”

Kongera abize bafite ubumenyi, ishingiro ry’iterambere

Minisitiri Mutimura yavuze ko uburyo nyabwo bwo guteza imbere igihugu ari ukongera umubare w’abize kandi bakarangiza bafite ubumenyi bukenewe ku isoko ry’umurimo.

Ati “Mu myaka 10 cyangwa 20, abantu batekerezaga ko uburyo nyabwo bwo guteza imbere inganda ari ukubaka imihanda ya gariyamoshi, imihanda, amateme n’ibindi bikagufasha kwihutisha iterambere ry’ubukungu no kureshya abashoramari. Ibyo bitandukanye n’uyu munsi kubera ko mu by’ukuri uburyo nyabwo ni uguhugura abantu benshi, ukabaha ubumenyi nkenerwa bubafasha guhangana ku buryo abikorera n’abanyenganda baza basanga bafite ubumenyi bubafasha kuganisha inganda mu cyerekezo bifuza bikanihutisha iterambere ry’ubukungu.”

Minisitiri yijeje ko Guverinoma izakoneza gukora ibishoboka byose kugira ngo abanyeshuri bo muri Kaminuza y’u Rwanda n’andi mashuri makuru babashe kubona ubumenyi bufite ireme.

Dr Mutimura yavuze ko kuvugurura imyigishirize bizagira uruhare mu kuzamura ireme ry'uburezi muri za Kaminuza
Abarimu n'abayobozi batandukanye batanze ibitekerezo ku kuzamura ireme ry'uburezi mu biga siyansi
Umwe mu bitabiriye arimo gutanga igekerezo
Umuyobozi wa Kaminuza y'u Rwanda, Prof. Philip Cotton ari gutanga ikiganiro
Dr Mutimura ari kuganiriza abayobozi n'abarimu ba Kaminuza y'u Rwanda
Minisitiri w'Uburezi n'Umuyobozi wungirije wa Kaminuza y'u Rwanda ushinzwe Igenamigambi n'Ubutegetsi, Dr Musafiri Papias Malimba bari muri iyi nama

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .