Minisitiri Munyangaju yasabye abagabo kudasiga abagore n’abana mu buriri igihe bagiye muri Siporo

Yanditswe na Iradukunda Serge
Kuya 9 Gashyantare 2020 saa 08:50
Yasuwe :
0 0

Minisitiri wa Siporo Aurore Munyangaju Mimosa yasabye abaturage bo mu karere ka Musanze bitabiriye siporo rusange ngarukakwezi kuyigira iy’umuryango ntibajye basiga inyuma abagore n’abana inyuma.

Ni siporo yitabiriwe n’abaturage bo mu Ntara y’Amajyaruguru barenga ibihumbi bitanu biganjemo abo mu karere ka Musanze.

Nyuma yo kugenda ibirometero bitanu, Minisitiri Munyengaju Mimosa wari n’umushyitsi mukuru yafashe umwanya ashimira ingeri z’abantu batandukanye barimo basaza n’abakecuru.

Ati “Harimo abakecuru nabonye, ntabwo ari iy’urubyiruko gusa, abasaza barimo abana bikaba bishimishije cyane, mu ntara y’Amajyaruguru siporo yageze no mu mirenge ariko noneho turifuza cyane ko igera no mu midugudu.”

Minisitiri wa Siporo yasabye ko siporo yaba iy’umuryango “ariko noneho bikarushaho bikaba siporo y’umuryango ntihakaze umugabo gusa ajye abyuka n’umugore n’abana bose baze muri siporo kandi nkurikije morale mufite, ndumva ibyo byoroshye kuri mwebwe, ni ukubakoraho gusa”

Abitabiriye iyi siporo bakoze urugendo rwa kilometero eshanu baboneraho n’amahirwe yo gupimwa indwara zitandura zirimo Kanseri, umuvuduko w’amaraso n’iz’umutima.

Guverineri w’intara y’Amajyaruguru Gatabazi Jean Marie Vianney yavuze ko izi mpanuro za Minisitiri bagiye kuzigira umukoro.

Ati “Iyo Minisitiri aduhaye impanuro akaduha n’umurongo bihita bihinduka gahunda. Dufite imiryango iza gukora siporo yuzuye abo ngabo babaye imbarutso ariko no mu tundi turere tuzabasaba bibe amabwiriza ariko bibe amabwiraza y’ubukangurambaga kuko burya siporo hazamo ubushake cyane kurusha amategeko”.

Umwe mu bitabiriye iyi siporo yavuze ko ifasha abantu bakuze kongera kumva bameze neza.

Ati “cyane cyane ku bantu bakuze ingingo zirarambuka cya gihe uba waraheze mu buriri, utabasha kugenda, ugenda wunamye. Iyo ugiye muri siporo umugongo urarambuka, imitsi igakora ugasanga wongeye kuba umuntu mushya”.

Mu 2017 mu kwezi k’Ukuboza nibwo intara y’Amajyaruguru yatangirije mu karere ka Musanze igikorwa cya Siporo kuri bose, ubu ikaba igeze ku rwego rwo kuba kabiri mu kwezi.

Abagize inzego z'umutekano ni bamwe mu bitabiriye iyi siporo ngarukakwezi
Abari n'abategarugori basabwe kudasigara mu rugo igihe abagabo bagiye muri siporo
Guverineri Gatabazi na Minisitiri Mimosa bagize n'umwanya wo kunyonga igare
Iyi siporo yari yitabiriwe n'abayobozi mu nzego zitandukanye
Minisitiri Munyengaju yasabye ko siporo yahinduka iy'umuryango
Minisitiri wa Siporo Munyengaju Mimosa yifatanyije n'abaturage b'akarere ka Musanze muri siporo rusange
Ni siporo yitabiriwe n'umubare munini w'abatuye i Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza