Minisiteri y’Umutungo Kamere (MINIRENA) n’ibigo biyishamikiyeho birimo ikigo cy’ igihugu cy’ibidukikije (REMA), n’ikigo cy’igihugu cy’umutungo Kamere (RNRA), basuye Urwibutso rwa Ntarama mu karere ka Bugesera, banasura umwe mu miryango y’abarokotse Jenoside yakorewe Abatutsi.

Mukandekezi Mediatrice umupfakazi wa Jenoside yakorewe Abatutsi wasuwe utuye mu mudugudu wa Nyiramatuntu, yatangaje ko ari igikorwa cyiza kimwubakamo icyizere. Ati “Ndabashimiye mwese uko mwaje kuntera inkunga no kumba hafi. Inkunga mumpaye izamfasha kugura ibikoresho byo mu nzu.”

Uyu mubyeyi yari afite abana icyenda mu 1994. Yatangaje ko batandatu bishwe muri Jenoside, avuga ko n’abarokotse babayeho mu bikomere bya Jenoside kuko bagize ihungabana rikomeye mu buzima bwabo.

Kayigire Odette Umunyamabanga Nshingwabikorwa wa AVEGA Agahozo, yavuze ko kwibuka bijyana no gutekereza ku barokotse Jenoside. Avuga ko hari aho usanga inzu zidasannye ahandi zarangiritse. Ati «muri Bugesera ubu dufite abapfakazi 469, muri bo cumi na babiri nta macumbi bagira.”

Yanavuze ko 12 bandi ari incike, abasaga 133 bakeneye gusanirwa amazu kandi iyo babayeho nabi, bakaba mu mazu yangiritse atizewe umutekano, bikomeza kubongerera ihungabana. Agira ati “Ibikorwa byo kubafasha no kubaba hafi bifasha mu kwiyubaka no kwiyubakamo icyizere.”

Minisitiri w’ umutungo kamere Stanislas Kamanzi yagize ati “Hari imiryango y’Abarokotse Jenoside batabayeho neza, babayeho inzu zarangiritse. Tugomba kubaba hafi, tugomba kubafasha kugirango tubamare agahinda.”

Yashimangiye ko mu myaka 19 nyuma ya Jenoside yakorewe Abatutsi bitari bikwiye ko uwayirokotse abaho nabi kandi aturanye n’abantu.

MINIRENA muri iki gikorwa cyo kubasura no kubasanira yatangaje ko yatanze amafaranga asaga miliyoni n’ibihumbi magana arindwi (1,797,000 frws), arimo ayo gusanira inzu Mukandekezi Mediatrice na Kakuze hamwe no kubagurira ibikoresho, n’ayahawe urwibutso rwa Ntarama mu rwego rwo kurufasha mu kurutunganya no kubungabunga ibimenyetso bya Jenoside yakorewe Abatutsi.