00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni 700 Frw zashowe mu ikoranabuhanga rizagabanya imfizi zitumizwa hanze

Yanditswe na Ayera Belyne
Kuya 1 June 2024 saa 08:53
Yasuwe :

Binyuze mu Kigo cy’Igihugu gishinzwe guteza imbere ubuhinzi n’ubworozi (RAB) n’ikigo mpuzamahanga cy’ubushakashatsi (ILRI), hamuritswe umushinga uzashorwamo miliyoni 700 Frw ugamije guhangana n’ibibazo by’ubworozi bw’inka by’umwihariko ubw’imfizi nke.

Uyu mushinga wamuritswe ku wa Kane, tariki ya 30 Gicurasi 2024 uzashyirirwa mu bikorwa mu turere twose tw’igihugu kugeza mu 2026.

Kimwe mu bibazo biza ku isonga mu bworozi bw’inka ni ukuba mu Rwanda hatari inka z’imfizi zihagije ku buryo biba ngombwa ko hari izikurwa hanze ndetse n’ingano y’umukamo ikaba ikiri hasi.

Bamwe mu borozi b’inka mu bari bice bitandukanye by’igihugu bazagerwaho n’ikoranabuhanga rizajya ribafasha kumenya amakuru y’ibanze ku bworozi n’ubumenyi bujyanye no kwita ku nka mu buryo bwose nk’uko byashimangiwe n’Umuyobozi w’uyu mushinga, Dr. Shumbusho Félicien.

Umuyobozi mukuru wungirije ushinzwe ubworozi muri (RAB), Dr. Uwituze Solange, yavuze impamvu y’umushinga, uko uzashyirwa mu bikorwa ndetse n’ingengo y’imari yawushowemo.

Yagize ati “Ni umushinga uzadufasha kujya dufata amakuru y’aborozi cyane cyane ab’inka. Muri iyi minsi habaho kwitana ba mwana ku borozi, inka zabyara zigakamwa litiro eshatu n’ibindi ariko biterwa no kuba imyororere itanoze.”

“Tuzajya dufata amakuru dukoresheje telephone zisanzwe ukanze akanyenyeri (*), ntabwo uzaba ukeneye ‘internet’ [...]. Umworozi azajya abona ubutumwa bugufi namara gutererwa intanga na Veterineri, anamubwire igihe inka ye izabyarira. Umushinga ufite agaciro ka miliyoni 700 Frw.”

Dr. Uwituze yongeyeho ko uyu mushinga uzagira uruhare mu gufasha umworozi kwita ku nka ze mu bihe bitandukanye kugira ngo umukamo wayo wiyongere. Uzafasha kandi mu guhangana n’ikibazo cy’imfizi zigitumizwa hanze y’u Rwanda.

Umworozi wo mu Karere ka Gicumbi, Nshimiyimana Jean Bosco yavuze ko ubu buryo bugiye kubafasha kuvugurura ubworozi bwabo bita ku mibereho yazo.

Ati “Amakuru dutanga akanatugarukira bidufasha kwitegura umutavu uzavuka, bakaguha inama z’uko uzita kuri nyina mu gihe y’itegura kubyara kugira ngo itazabyara yananiwe ndetse kandi izabashe no kuguha n’umusaruro mwinshi.”

Kugeza ubu mu Rwanda habarurwa inka zingana na 1.436.676 aho 60% yazo zingana na 864.654 zamaze gushyirwa muri iyi sisitemu, intego ikaba ari ukuzishyiramo zose.

Ingamba za Minisiteri y’Ubuhinzi n’Ubworozi (MINAGRI) zigaragaza ko mu rwego rwo guhaza isoko ryo mu gihugu n’iryo mu mahanga, hagati ya 2024-2029 umukamo w’amata ugomba kwiyongera ku rugero rwa 75%.

Imibare ya RAB kandi igaragaza ko umusaruro w’umukamo ku nka wiyongereye ukava kuri litiro zisaga miliyoni 142 mu 2005, ukagera ku zisaga miliyari 1,06 mu 2023. Byitezwe ko zizagera ku zisaga miliyari 1,27 mu 2024.

Umuyobozi mukuru wungirije ushinzwe ubworozi muri (RAB), Dr. Uwituze Solange, yavuze ko umushinga uzatwara miliyoni 700 Frw
Inzego za leta n'abikorera zigiye guhangana n'ikibazo cyo gufata nabi amatungo by'umwihariko inka
Abaveterineri bagiye kujya bafasha aborozi ku ikoranabuhanga
Hatangijwe umushinga wo kwita ku bworozi bw'inka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .