Menya abazita ingagi amazina barimo Niringiyimana wamaze imyaka itatu akora umuhanda wenyine

Yanditswe na Cyprien Niyomwungeri
Kuya 5 Nzeri 2019 saa 04:20
Yasuwe :
0 0

Umusore witwa Niringiyimana Emmanuel w’imyaka 23 wakoze igikorwa kidasanzwe cyo gukora umuhanda ureshya na Kilometero zirindwi (7Km) wenyine abyibwirije, yashyizwe mu bazita abana b’ingagi amazina mu muhango uzaba kuri uyu wa Gatanu.

Kwita Izina ni umuhango witabirwa n’abashyitsi baba abo ku rwego rw’igihugu na mpuzamahanga, aho ingagi ziba zavutse buri mwaka zihabwa izina, mu mugenzo umaze kumenyerwa kandi ufite uruhare mu kumurikira amahanga ibyiza u Rwanda rufite mu bukerarugendo.

Umunsi ngarukamwaka wo Kwita Izina muri uyu mwaka uzaba kuwa 6 Nzeri, aho abana 25 b’ingagi ari bo bazahabwa amazina, mu muhango ugiye kuba ku nshuro ya 15 mu Karere ka Musanze.

Mu bazita abana b’ingagi amazina harimo Niringiyimana wo mu Murenge wa Murambi mu Karere ka Karongi, wabaye ikimenyabose nyuma yo gutangazwa ko yakoze umuhanda wenyine.

Niringiyimana agaragara akora uwo muhanda yifashishije isuka. Avuga ko igitekerezo cyo kuwukora cyamujemo mu 2016 ubwo yarimo ahinga akabona abantu bagenda babangamirwa n’ibihuru.

Ati “Nari naje guhinga mbona igihuru gitangira abahetsi barimo batambuka bigatuma bahagwa, icyo gihuru ntangira kugitema, umuhanda ntangira kuwukora gutyo.”

Uyu musore avuga ko yaheraga saa moya za mu gitondo, saa tanu akajya kuruhuka akongera kugaruka saa cyenda kugera saa kumi n’ebyiri z’umugoroba.

Abandi bazita ingagi amazina ni Hailemariam Desalegn Boshe, wahoze ari Minisitiri w’Intebe wa Ethiopia, akaba n’inshuti ya hafi y’u Rwanda. Hari Amina Mohammed, Umuyobozi wungirije wa Loni, akaba yarahoze ari Minisitiri w’Ibidukikije wa Nigeria.

Hari Paul Milton & Luke Bailes bafite Singita Kwitonda Lodge, HRH Princess Basma Bint Ali, Dame Louise Martin, Perezida w’ishyirahamwe ry’imikino rya Commonwealth, Tony Adams w’imyaka 52 yakiniye Arsenal yo mu Bwongereza imyaka 19 hagati ya 1983 na 2002 aba na kapiteni wayo imyaka 14.

Ron Adams, ambasaderi wa Israel mu Rwanda, Niklas Adalberth, rwiyemezamirimo wo muri Suède akaba yaranashinze Norrsken, Jeremy Jauncey, washinze akaba n’umuyobozi mukuru wa Beautiful Destinations na Otara Gunewardene, umucuruzi wo muri Sri Lanka akaba n’umugiraneza.

Abandi bazita amazina ingagi ni; Ronan Donovan, umufotozi wa National Geographic, Louis Van Gaal, watoje Ajax, Barcelona, Bayern Munich na Manchester United, Naomi Campbell, Madeleine Nyiratuza, ukora muri UNDP Rwanda, Marco Lambertini, uyobora ikigega mpuzamahanga cyo kwita ku bidukikije n’umubyinnyi Sherrie Silver.

Hari kandi umuhanzi Shaffer Chimere Smith uzwi nka Ne-Yo, Ngabo Médard Jobert (Meddy), Umufaransa Philippe Douste-Blazy, Anthony Nzuki, uyobora abarinda pariki mu Akagera, Robert Twibaze, uyobora ba mukerarugendo muri Pariki y’ibirunga akaba abimazemo imyaka 12.

Ibarura ryakozwe mu 2016 ryerekanye ko umubare w’ingagi ukomeje kwiyongera mu gice cy’ibirunga, aho habarurwaga ingagi 604 ziba mu miryango 41, bingana n’izamuka rya 26% kuko zavuye kuri 480 zabarurwaga mu mwaka wa 2010.

Iki ni ikimenyetso cy’intambwe ikomeye yatewe mu kubungabunga ingagi, ku buryo ziheruka kuvanwa mu mubare w’inyamaswa zugarijwe n’ibyago byo gukendera.

Amina Mohammed, Umuyobozi wungirije wa Loni azita ingagi izina
Hailemariam Desalegn Boshe, wahoze ari Minisitiri w’Intebe wa Ethiopia, akaba n’inshuti ya hafi y’u Rwanda azita izina
Umuhanzi Meddy azita izina ingagi mbere yo gukora igitaramo
Umuhanzi Ne-Yo azita izina ingagi nyuma akore n'igitaramo
Umubyinnyi Sherrie Silver azita izina ingagi
Louis Van Gaal watoje amakipe arimo Manchester United nawe azita ingagi izina
Ronan Donovan, umufotozi ufata n'amashusho muri National Geographic
Naomi Campbell azita ingagi izina kuri uyu wa Gatanu
Tony Adams wakiniye Arsenal akanayibera kapiteni
Dame Louise Martin uyobora ishyirahamwe ry'imikino muri Commonwealth
HRH Princess Basma Bint Ali
Niringiyimana wamaze imyaka itatu akora umuhanda azita izina ingagi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .