00:00:00 IGIHE NETWORK KN KINYARWANDA EN ENGLISH FR FRANCAIS

Mbappe yigaramye Real Madrid, asinyira PSG ku kayabo k’amafaranga

Yanditswe na Mihigo Saddam
Kuya 21 May 2022 saa 08:54
Yasuwe :

Rutahizamu w’Umufaransa, Kylian Mbappe, yongereye amasezerano y’imyaka itatu muri Paris Saint Germain (PSG), nyuma y’igihe kinini uyu musore w’imyaka 23 bivugwa ko yamaze kumvikana na Real Madrid yo muri Espagne.

Mbappe ufite agahigo ko kuba ari we mukinnyi wa kabiri uhenze ku Isi, aho yaguzwe miliyoni 263$ mu 2018 avuye muri AS Monaco, yongereye amasezerano nyuma y’imbaraga zidasanzwe zakoreshejwe n’impande zose kugira ngo uyu musore atava i Paris.

Kugira ngo Real Madrid ibone amahirwe yo kumusinyisha, yari yaremeye gukora ibintu itari yarigeze ikorera undi mukinnyi mbere ye, birimo kumuha uburenganzira bwuzuye bwo gutwara amafaranga yose aturutse mu gucuruza ishusho ye (image rights), mu gihe abandi bakinnyi bose ba Real Madrid bemererwa gutwara 50% gusa by’ayo mafaranga.

Madrid kandi yari yaremeye guha Mbappe miliyoni 140$ zo kuba yemeye kubasinyira gusa, mu gihe yari kuzajya ahembwa miliyoni 26$ ku mwaka havuyemo imisoro.

Icyakora aya mafaranga ni agatonyanga mu nyanja ugereranyije na miliyoni 62$ PSG izajya ihemba Mbappe buri mwaka nyuma y’imisoro, hakiyongeraho miliyoni 124$ azahabwa kubera gusa ko yemeye kongera amasezerano ye.

Hejuru y’ibyo kandi, uyu musore azajya ahabwa uduhimbazamusyi ku bitego atsinze, gutsindira ibihembo nka Ballon d’Or, gutwara ibikombe nka Champions League n’ibindi bitandukanye.

Ni ubwa kabiri Mbappe yanga gusinyira Real Madrid, nubwo avuga ko ari yo kipe akunda kurusha izindi ku Isi. Iyi kipe yari yanamwifuje mu 2017 mbere yo kwerekeza muri PSG nk’intizanyo.

Amakuru avuga ko Mbappe yari yamaze kwemeranya na Real Madrid, ariko uruzinduko akubutsemo muri Qatar rugakekwaho kuba intandaro y’icyemezo cye cyo gusinyira PSG, dore ko ba nyirayo n’ubundi bakomoka muri icyo gihugu.

Bivugwa ko ari we wafashe icyemezo cyo guhamagara Perezida wa Real Madrid, Florantino Perez, akamubwira ko yahinduye ibitekerezo, agiye kongera amasezerano muri PSG. Real Madrid yari yifuje gusinyisha uyu musore kuri miliyoni 212$ ku munsi wa nyuma w’igura n’igurisha ry’abakinnyi mu mwaka ushize.

Isinywa ry’uyu musore ryari ryarabaye inkuru ikomeye cyane ku buryo na Perezida w’u Bufaransa, Emmanuel Macron, yasabye uyu musore kuguma muri PSG, akazafasha iyi kipe kwegukana Champions League, irushanwa iyi kipe itarakozaho imitwe y’intoki, nubwo ifite ibikombe bine muri bitanu biheruka muri Shampiyona y’u Bufaransa.

Icyakora amafaranga n’ubusabe bwa Perezida Macron ntabwo byari bihagije, kuko PSG yanemereye Mbappe ububasha bwo kujya agira uruhare mu byemezo by’ikipe, nko mu gihe yifuza umukinnyi cyangwa umutoza. Amakuru avuga ko iyi ngingo yeretse Mbappe ko PSG ifite gahunda ikomeye yo kumugumana, bigatuma ahindura ibitekerezo. Mu Nama y’ubutegetsi ya PSG, Mbappe azajya agira uruhare mu byemezo ifata.

Muri uyu mwaka w’imikino, Mbappe wabaye umukinnyi mwiza muri Shampiyona y’u Bufaransa, aho amaze gutsinda ibitego 25 mu gihe yatanze imipira 17 yavuyemo ibitego.

Amakuru avuga ko uyu musore ari kwifuza gushinga Ikigo cy’ubucuruzi gikomeye, kizamufasha gukomeza kubaka izina no hanze y’ikibuga, nk’uko bimeze ku bakinnyi nka LeBron James ukinira Los Angeles Lakers muri Shampiyona ya Basketball muri Amerika (NBA), akaba abarirwa umutungo urenga miliyoni 720$, akesha ishoramari afite mu bigo nka RedBird Capital Partners n’ibindi.

Undi afatiraho urugero ni Cristiano Ronaldo ufite ishoramari rigari mu bijyanye na hoteli n’ibindi bitandukanye, akaba abarirwa umutungo urenga miliyari 1$, nk’uko byatangajwe na Forbes mu 2020.

Hagati aho, hatangiye kwibazwa byinshi ku bijyanye n’uburyo PSG, Ikipe bivugwa ko yahombye arenga miliyoni 700$, ishoboye kwishyura aka kayabo kuri Mbappe, aho byazamuye umutungo w’amafaranga izajya ihemba, yarenze miliyoni 650$ ku mwaka.

Perezida w’Ishyirahamwe ry’Umupira w’Amaguru muri Espagne, Javier Tebas Medrano, yavuze ko “Ibyo PSG iri gukora byo kongerera amasezerano Mbappe ku mafaranga menshi nyuma y’uko bahombye miliyoni 730$ kandi ikagira igahemba arenga miliyoni 630$, ni igitutsi ku mupira w’amaguru. [PSG] ni icyago [ku mupira w’amaguru] nka Super League.”

Amakuru avuga ko nyuma yo kongera amasezerano ya Mbappe, iyi kipe yifuza gutandukana n’umutoza Mauricio Pochettino ikamusimbuza kabuhariwe Zinedine Zidane, mu gihe kandi yifuza no gusimbuza Umuyobozi wayo mu bijyanye n’Imikino, Umunya-Brazil Leonardo.

Kylian Mbappe yongereye amasezerano y'imyaka itatu muri PSG

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .