Madamu Jeannette Kagame yashimye ubudaheranwa bwaranze abagize AVEGA Agahozo mu myaka 25 ishize

Yanditswe na Nkurunziza Ferdinand
Kuya 23 Gashyantare 2020 saa 10:34
Yasuwe :
0 0

Madamu Jeannette Kagame yashimye ibikorwa umuryango AVEGA Agahozo wagezeho mu myaka 25 ishize, ashimangira ko abanyamuryango bayo batanze umusanzu ukomeye mu gusana igihugu bakaba n’urugero rwiza rw’ubudaheranwa.

Madamu Jeannette Kagame yabigarutseho kuri iki Cyumweru, ubwo uyu muryango wizihizaga isabukuru y’imyaka 25 umaze.

AVEGA ni umuryango washinzwe n’abapfakazi ba Jenoside, ugira uruhare rukomeye mu kongera kubanisha abanyarwanda nyuma ya Jenoside, kwita kubapfakajwe nayo, kubaka amacumbi asaga 3000 no gusana agera ku 5000 y’abarokotse Jenoside batishoboye. Waharaniye kwita ku mpfubyi zari zisigaye nyuma ya Jenoside yakorewe Abatutsi, no kuzibera ababyeyi.

Madamu Jeannette Kagame yagize ati "Nubwo bikwiye ko umuntu abagirira impuhwe, ntabwo muziteye kuko murakomeye, mufite imbaraga. Muri Intwari."

Yagarutse ku nyandiko yanditse ubwo u Rwanda rwiteguraga Kwibuka ku nshuro ya 20 Jenoside yakorewe Abatutsi, aho aha icyubahiro abagore babashije guhangana n’umutwaro uremereye w’amateka, barimo abafashwe ku ngufu n’ibindi byago bikomeye bahuye nabyo.

Yagize ati "Dukomeze rero gufatanya kugira ngo turinde icyo cyaha cyo gufata ku ngufu, tubona ko kigenda cyototera abato. Turabizeza ko imbaraga mwagize zizadufasha no guherekeza abatarabyakira kugeza ubu."

Yashimye ubudaheranwa bwabaranze

Madamu Jeannette Kagame yavuze ko ubwo yatekerezaga ku ijambo yageneye uyu munsi, yabonye ubuhamya bw’umubyeyi witwa Anka warokotse Jenoside yakorewe Abayahudi, avuga ko burimo isomo rihura n’insanganyamatsiko umuryango AVEGA yihaye kuri iyi sabukuru, igira iti "Ingobyi y’Ubudaheranwa".

Mbere gato ya Jenoside yakorewe Abayahudi ngo hatanzwe itegeko ko umuntu wese utwite cyangwa ubyaye, agomba gusinya urupapuro ko umwana navuka bazamujyana mu nkambi y’urupfu. Anka we yanze gusinya urwo, umwana avutse agerageza kumuhisha, ariko agira ibyago nyuma y’imyaka ibiri apfa azize umusonga.

Yagize amahirwe yongera gusama, ashakisha uko yagera ku mugabo we wari wajyanwe mu nkambi ngo amubwire ko umuryango wabo utazazima, ko atwite kandi yiyemeje kuzarwana ku mwana we akabaho.

Ku bw’ibyago yageze mu nkambi asanga abagabo bari bafungiwemo bose bamaze kwicwa. Yaje kubyara umukobwa amwita Eva, bombi baza no kurokoka.

Madamu Jeannette Kagame yakomeje ati "Ubu buhamya kimwe n’ubundi bwanyu mwese nk’abanyamuryango ba AVEGA Agahozo, bugaragaza ukuntu umubyeyi ahora iteka ari we ngobyi n’isoko y’ubudaheranwa. Kwihangana no kwirenga ni umurage mwiza mwaduhaye, mwahaye abato benshi mwareze. Kandi tuzakomeza kuwugenderaho nk’igihugu. Tubashimira cyane ko mwemereye igihugu kubaho."

"Ubuvugizi bwakozwe bwasangaga mwebwe nk’abanyamuryango ba Avega Agahozo mufite ubushake bwo kubaho no kubeshaho abandi. Mwishyize hamwe, muregerana, murahozanya muriyubaka, muratabarana, murera imfubyi, murerera u Rwanda kandi mwubaka n’u Rwanda. Mwarakoze!"

Yabasabye gukomeza guhuza imbaraga n’abakiri bato kugira ngo bakomeze uwo murage w’ubudaheranwa. Yashimye intambwe zatewe mu myaka 25, abasaba kuzisigasira no gukomeza kuba hafi y’abanyamuryango cyane cyane ab’intege nke.

Bijyanye n’icyerekezo 2050 u Rwanda rwihaye, Madamu Jeannette Kagame yavuze ko asanga AVEGA Agahozo izaba ari isoko y’indangagaciro z’ubudaheranwa, abato bazigiraho maze bakumva ukuntu kugira igihugu bihenda, bityo baharanire kubumbatira u Rwanda no kuruhesha ishema.

Perezida wa AVEGA Agahozo, Mukabayire Valerie, yavuze ko kwizihiza iyi sabukuru ku nshuro ya 25 ari umwanya wo gusubiza maso inyuma bakareba urugendo n’ibikorwa byagezweho n’uyu muryango, ndetse hakarebwa ku cyerekezo kijyana n’icyo igihugu cyihaye mu iterambere rigera ku banyarwanda bose.

Yashimiye abaterankunga bose bababaye hafi mu bihe bikomeye byo gutangira umuryango AVEGA Agahozo ndetse n’abo bakiri kumwe kuko babafashije gushyira mu bikorwa intego bari bihaye.

Minisitiri w’Uburinganire n’Iterambere ry’Umuryango, Solina Nyirahabimana yagaragaje ko ubushake bwa Leta y’u Rwanda mu kongera kwiyubaka no kubaka umuryango nyarwanda bihura neza n’umurongo AVEGA Agahozo yihaye, kandi bitanga icyizere cyo kwishakamo ibisubizo bishoboka mu muryango nyarwanda.

Ati "Ubu dutewe ishema n’Umuryango AVEGA Agahozo kuko ubu umunyamuryango wawo nubwo agifite ibibazo bimwe na bimwe, yavuye mu bwigunge ndetse ashobora kubaho afatanya n’abandi guteza igihugu cyacu imbere."

Yakanguriye abanyamuryango ba AVEGA gukomeza gusigasira ibyagezweho no kwishakamo ibisubizo ku mbogamizi zikiriho, kuko bizabafasha kugera ku cyerekezo cy’iterambere rihuriweho.

Muri ibi birori kandi hatanzwe ikiganiro cyagarutse ku mateka yaganishije u Rwanda kuri Jenoside, ibikorwa bitandukanye byakozwe n’ababyeyi bo muri AVEGA Agahozo ndetse n’isomo urubyiruko rukwiye kubigiraho.

Umunyabanga uhoraho muri Minisiteri y’Urubyiruko n’Umuco, Eduard Bamporiki yavuze ko ubutwari bwaranze ababyeyi bari muri AVEGA Agahozo bukwiye gukomeza kuba urumuri rumukira urubyiruko rw’ubu, kuko bagaragaje gukomera mu bihe bitoroshye.

Ati "Mukwiye kubonsa mubatamitse u Rwanda, kuko mwagaragaje ko na nyuma y’ibikomeye, umuntu ashobora gukomera."

Umunyabanga wa Leta muri Minisiteri y’Ubutegetsi bw’Igihugu, Nyirarukundo Ignacienne, we yavuze ko mu gihe abo babyeyi u Rwanda rukibafite, ruzakomeza guha agaciro ibikorwa byabo mu gushyigikira iterambere ry’u Rwanda.

Ati "Muzi neza ko hari intego u Rwanda rwihaye mu kuzamura ubukungu bw’abanyarwanda, namwe mukore uko mushoboye kose ntimuzabure mu mubare w’abazagerwaho n’ubwo bukungu kuko ibyo mwakoze nibyo byari bikomeye kuruta ibiri imbere."

AVEGA Agahozo yashinzwe ku wa 15 Mutarama 1995, bigizwemo igitekerezo n’abapfakazi ba Jenoside. Nyuma yo kubona benshi baraheranwe n’ubwigunge n’agahinda, bamwe mu babyeyi barokotse Jenoside bahisemo kwihuriza hamwe batangira gufashanya mu buzima bukomeye bari bari kunyuramo.

Kugeza ubu AVEGA Agahozo yubatse ibigo nderabuzima bitatu n’ivuriro rimwe byita ku banyamuryango ndetse n’abandi baturage basanzwe; hari kandi n’umubare utari muto w’abana uyu muryango wafashije kubona uburenganzira ku mitungo yasizwe n’ababyeyi babo, nka bimwe mu bikorwa by’iterambere bifasha abanyamuryango n’ababakomokaho.

Bamwe mu banyamuryango ba AVEGA mu ifoto y'urwibutso na Madamu Jeannette Kagame
Madamu Jeannette Kagame n'abayobozi ba AVEGA bishimiye imyaka 25 ishize uwo muryango ushinzwe
Hakinwe imikino igaragaza urugendo rwa Avega Agahozo mu myaka 25
Madamu Jeannette Kagame yashimye umurava n'ubudaheranwa byaranze abanyamuryango ba AVEGA Agahozo mu myaka 25 ishize
Madamu Jeannette Kagame yitegereza bimwe mu bikorwa by'ubukorikori by'abanyamuryango ba AVEGA
Ubuyobozi bwa AVEGA Agahozo bwashimiye madamu Jeannette Kagame uburyo yababaye hafi
Umuryango AVEGA Agahozo wishimiye imyaka 25 umaze ushinzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza