00:00:00 IGIHE NETWORK KN KINYARWANDA EN ENGLISH FR FRANCAIS

Leta imaze kwishyura 80% by’ibirarane by’abimuwe ku nyungu rusange

Yanditswe na Kanamugire Emmanuel
Kuya 20 Ukwakira 2022 saa 05:09
Yasuwe :

Minisitiri w’Ibikorwaremezo, Dr Nsabimana Erneste, yatangaje ko hafashwe ingamba zo kwirinda ibirarane by’ingurane z’imitungo y’abaturage ahanyujijwe ibikorwa by’iterambere, kuko nta mutungo w’umuturage uzongera gukorwaho ingurane itaraboneka ngo yishyurwe.

Yabigarutseho ku wa 18 Ukwakira ubwo yitabaga Inteko Ishinga Amategeko ngo asubize mu magambo ibibazo by’abadepite byagaragaye mu ngendo bakoreye hirya no hino mu turere tw’igihugu.

Ibyo bibazo birimo iby’abaturage bafite imitungo y’ahanyujijwe imiyoboro y’amazi n’amashyanyarazi ariko ntibahabwe ingurane ikwiye, nk’uko biteganywa n’amategeko.

Minisitiri Dr Nsabimana yavuze ko kuva mu mwaka w’ingengo y’imari wa 2016/2017 kugeza muri Nzeri 2022, REG n’ibigo biyishamikiyeho bakiriye amadosiye 96,735 asaba ingurane yari ifite agaciro ka miliyari 35,4 Frw.

Muri ayo madosiye, 81,2% yari afite agaciro ka miliyari 28, 2 Frw amaze kwishyurwa binyuze mu ngengo y’imari y’igihugu.

Yavuze ko hasigaye amadosiye 15,537 muri yo 585 afite agaciro ka miliyoni 151 Frw, akaba yarashyikirijwe Minisiteri y’Imari n’igenamigambi kugira ngo yishyurwe.

Ati "Dusigaranye amadosiye 14 952 afite agaciro ka miliyari 5,9 Frw arimo gusuzumwa mu Kigo gishamikiye kuri REG gishinzwe ibikorwaremez by’amashanyarazi (EDCL)mbere yo kugezwa muri Minisiteri y’Imari n’Igenamigambi."

Mu mbogamizi zituma habaho ibirarane by’igihe kirekire mu byo gutanga ingurane z’imitungo y’abaturage, harimo ibura ry’ingengo y’imari nk’uko Dr Nsabimana yakomeje abisobanura.

Ati "Imbogamizi zikunze kubaho ni ibura ry’ingengo y’imari, iyo yabonete ingurane zirishyurwa keretse ku madosiye arimo ibibazo. Rimwe na rimwe binadindiza imishinga y’iterambere kubera ko twamaze gufata icyemezo ko nta mutungo w’umuturage leta izongera gukoraho amafaranga atabonetse ngo yishyurwe."

Despite Nyirahirwa Veneranda yavuze ko mu gihe abaturage batinze kwishyurwa, bikwiye ko itegeko rigena imitangirwe y’ingurane ryubahirizwa aho riteganya inyongera ya 5% y’agaciro kayo.

Iryo tegeko rigena kwimura abantu ku bw’inyungu rusange ndetse bakagenerwa n’ingurane ikwiye rimaze imyaka 15 rigiyeho.

Ryagiyeho mu 2007 rivugururwa mu 2015. Ingingo yaryo ya 36 iteganya ko iyo indishyi ikwiye yemejwe irihwa bitarenze iminsi 120, urishywe na we akimuka bitarenze iminsi 120. Uwimura iyo atinze kwishyura abikora yongeyeho inyungu ya 5%.

Depite Nyirahirwa yagaragaje ko hari ikibazo ko usanga kuryubahiriza bidakorwa.

Ati "Ni iki cyakorwa kugira ngo umuturage abe ku isonga, uburenganzira bwe bwubahirizwe ahabwe ingurane ikwiye ku gihe?"

Minisitiri Nsabimana yavuze ko iyo nyongera ya 5% ikwiye kongerwaho mu gihe habayeho uburerwe kuko hari nk’aho usanga umuturage amaze umwaka yarabariwe imitungo ye ariko atarishyurwa.

Yakomeje avuga ko hafashwe ingamba ko nta muntu uzongera gukora ku mutungo w’umuturage ayo mafaranga atabonetse.

Mu iyubakwa ry'umuhanda wa Bugesera-Nyanza havuzwemo gutinda guha abaturage ingurane z'imitungo yabo yangijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .