Kwibuka26: Kuburira amakiriro mu nsengero byatumye hari abifuza ko havuka ‘Inkotanyi Church’ nyuma ya Jenoside

Yanditswe na Twarabanye Venuste
Kuya 12 Mata 2020 saa 03:35
Yasuwe :
0 0

Ntazinda Marcel warokotse Jenoside yakorewe Abatutsi akabona ibyabereye mu Kiliziya n’imyitwarire y’abo basenganaga, asanga iyo Inkotanyi zahagaritse Jenoside ziza gushinga Itorero ‘Inkotanyi Church’ ryari kuyobokwa cyane.

Mu Kiliziya, mu nsengero no mu bigo by’abihayimana ni ahantu Abatutsi bahungiye ari benshi muri Jenoside yakorewe Abatutsi, bahizeye amakiriro. Inyigisho z’iyobokamana zabemezaga ko ari ahera umuntu wese atatinyuka gukorera ikibi, bituma bahizera amakiriro.

Ibyo siko byagenze kuko aho hose haguye abatari bake. Ibyo byatumye nyuma ya Jenoside hari abatarashoboraga kwinjira mu nsengero no mu Kiliziya bagendeye ku byo bahabonye, imyitwarire y’abo basenganaga n’iya bamwe mu bihayimana.

Mu kiganiro cya RBA kivuga ku ruhare rw’Itorero mu Isanamitima, Ntazinda Marcel, warokotse Jenoside yavuze ko bari batuye i Rwamagana hafi ya Santarali (Centrale). Bajyaga mu misa buri Cyumweru babana n’abakirisitu n’abandi bo ku Kiliziya ndetse bajya no mu Muryango-remezo abona ‘umutima ari umwe’.

Yagize ati “Mu gihe gitoya kubona wa muntu mwahuriraga mu Kiliziya, wa muntu mwahuriraga mu muryango remezo ahindukira agafata umuhoro akakwicira abantu cyari ikintu kiremereye cyane cyadukomerekeje imitima. Bituma umuntu yibaza ati ese ndamutse ndokotse umuntu yazongera gusubira mu rusengero?”

Yavuze ko Jenoside imaze guhagarikwa atiyumvishaga aho yahera asubira gusenga. Itorero uwarokotse yashoboraga guhita yiyumvamo ngo ni iryari gushingwa n’Inkotanyi kuko arizo zonyine bari babonyeho urukundo bari baburiye ahandi hose barukekaga.

Ati “Buriya iyo nyuma ya Jenoside haza kubaho itorero bita ‘Inkotanyi Church’ twari kuriyoboka twese kuko twari twabonye ko aho twaburiye; abapasiteri, abapadiri, Inkotanyi arizo zari zarokoye abantu. Abantu bari bategereje ko nibura Inkotanyi zakora urusengero kuko arizo twari twabonanye umutima.”

Icyo Ntazinda yumvikanisha ni uko hari hakenewe aberekana itandukaniro n’abavugabutumwa ba mbere ya Jenoside. Ati “Hari hasigaye nibura ngo ubone ibikorwa bitandukanye n’imvugo z’abo wari uzi mbere ya 1994.”

Ntazinda kuri ubu usengera mu Itorero ry’Isanamitima rya Evangelical Restoration Church. Ni itorero yayobotse kuko ibyo yumvanaga umuyobozi waryo Apôtre Joshua Masasu byahuraga n’ubuzima bwe.

Umunsi wa mbere ajya gusenga, ngo ntibyari bimurimo; kwari ukugira ngo gusa arebe niba iryo tandukaniro rihari. Hari hakenewe ivugabutumwa ritarangwa n’amagambo gusa, kuko abarokotse bari bakeneye abababa hafi.

Pasiteri Karigirwa Liliose wo muri OMEGA Church, yavuze ko kugira ngo isanamitima rishoboke byasabaga kureba icyo umuntu akeneye kurusha gutekereza ko kumubwiriza ijambo ry’Imana gusa bimufasha.

Ati “Ni ukutihutira gutekereza ko ubutumwa bw’amagambo aribwo buza gukora [....] uwo muntu akeneye iki, ijambo ryiza ni mugenzi w’Imana, kumuganiriza, ukabanza kumwumva.”

Nyuma ya Jenoside gusenga byafashije kandi bituma abarokotse batihugiraho ngo banigunge.

Umwalimu muri Kaminuza y’u Rwanda, Dr. Hategekimana Célestin, avuga ko hari abagiye bahabwa imbaraga n’uburyo butandukanye bwo gusaba imbabazi bumviye mu rusengero.

Ati “Mu rusengero uhumva inkuru z’abantu basaba imbabazi. Ibyo bituma umuntu agira icyizere cy’ejo hazaza.”

Mu bikorwa amadini yagiye afatanya no gusenga bigafasha gukiza ibikomere no kugarura abarokotse mu buzima, birimo ubujyanama, gufasha abarokotse badafite imiryango mu bukwe, guhemba ababyaye n’ibindi.

Hari abifuzaga urusengero rw'Inkotanyi kuko ari zo zari zifitiwe icyizere nyuma ya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .