Ingaruka za Coronavirus ku bukungu bw’u Bushinwa n’Isi

Yanditswe na Iradukunda Serge
Kuya 11 Gashyantare 2020 saa 11:18
Yasuwe :
0 0

Kugeza ubu ingaruka za coronavirus ntabwo zikigaragarira mu mubare w’abantu imaze guhitana gusa ahubwo Abasesenguzi mu bukungu bagaragaza ko iki cyorezo cyashegeje n’urwego rw’ubucuruzi n’ubukungu ku Isi hose.

Ni icyorezo kimaze guhitana abagera ku gihumbi, mu gihe abanduye basaga ibihumbi 40. Nta muti wayo, nta n’urukingo ruraboneka kandi uko bwije n’uko bukeye, iyo virusi irushaho gukwirakwira.

Imibare y’ikigo cy’Ibarurishamibare cy’i Beijing, yerekana ko Umwaka ushize ubukungu bw’u Bushinwa bwazamutse ku kigero cya 6%, ikigero gito cyabayeho mu myaka 30 ishize kuko nko mu 2010 bwari bwazamutse ku kigero cya 10.2%.

Iki gihugu cyari gifite icyizere cy’uko umwaka wa 2020 uzaba uwo kongera kuzamuka ku kigero gishimishije nyuma y’intambara y’ubucuruzi bari barimo n’Ubuyobozi bwa Leta zunze Ubumwe za Amerika, buyobowe na Perezida Donald Trump.

Abasesenguzi mu by’ubukungu bavuga ko uyu mugambi ushobora kutagerwaho, ubukungu bukazamuka ku kigero cya 5% cyangwa bikajya munsi.

Umuyobozi mu kigo cy’u Bushinwa cy’Ubumenyi rusange, Zhang Ming yagize ati “Umusaruro mbumbe mu gihembwe cya mbere cya 2020 ushobora kuzamuka kuri 5%, kandi ntitwakuraho n’ibishoboka ko bwajya munsi ya 5%”.

Izi mpungenge z’uko ubukungu bw’u Bushinwa bushobora kutazamuka ku ntera bwari busanzwe buzamukaho ziterwa n’uko hari bimwe mu bigo by’ubucuruzi byahagaritse ibikorwa byabyo muri iki gihugu kubera icyorezo cya Coronavirus.

Muri ibi bigo byahagaritse ibikorwa byabyo harimo uruganda rukora indege rwa Airbus.

Airbus yahagaritse uruganda rwayo mu gace ka Tianjin, rwari rufite ubushobozi bwo gukora indege zo mu bwoko bwa Airbus A320, ibintu bishobora kuzagira ingaruka ku mubare w’indege uru ruganda rushyira ku isoko.

Si Airbus gusa kuko inganda zikora imodoka zirimo urwa Toyota, General Motors na Volkswagen nazo zahagaritse ibikorwa byazo mu Bushinwa zikaba zitaratangaza igihe bizasubukurirwa.

Ikindi kigo gikomeye cyafunze ibikorwa byacyo mu Bushinwa ni Apple isanzwe imenyerewe mu gukora amatelefoni agezweho na mudasobwa.

Ubwo Apple yafungaga amaduka yayo yose mu Bushinwa, yavuze ko izongera gusubukura ibikorwa byayo ku wa 9 Gashyantare ariko iyi tariki yamaze kwimurwa igezwa kuwa 15 Gashyantare.

Ifunga rya Apple rifatwa nk’imbogamizi ku bukungu bw’u Bushinwa kuko uru ruganda rutanga imirimo igera kuri miliyoni 4.8 muri iki gihugu.

Uretse ibi bigo by’ubucuruzi bikorera mu Bushinwa byagiye bihagarika cyangwa bigasubika ibikorwa byabyo, indi ngingo ikomeye yatumye ubukungu bw’Isi buhazaharira ni ukutabasha kugera ku isoko ryo muri iki gihugu gifite abaturage bangana na Miliyari 1.439

Uruganda rukora inkweto n’imyenda ya Siporo, Nike, rwatangaje ko rwafunze ½ cy’amaduka yarwo mu Bushinwa ndetse rugabanya n’amasaha bakoraga kubera ko umubare w’abantu babagana wagabanyutse kubera gutinya Coronavirus.

Nike ivuga ko ibi bizagira ingaruka ku bukungu bwayo kuko mu bihe bisanzwe isoko ry’u Bushinwa ryabinjirizaga angana na 17% by’amafaranga yose bacuruza mu gihe cy’umwaka.

Si Nike yafunze gusa kuko na Adidas bahora bahanganye ku isoko yatangaje ko yafunze amwe mu maduka yayo yari akomeye muri iki gihugu, mu gihe uruganda rwo muri Suède rukora imyenda rwa H&M narwo rwatangaje ko ifungwa ry’amaduka yarwo agera kuri 45 ryagabanyije cyane ingano y’ibyo bagurishaga.

Izindi nganda zikora ibijyanye n’imyenda n’inkweto zafunze amaduka yazo cyangwa zikagabanya amasaha zakoraga harimo Gap na Hugo Boss.

Mu gihe ibigo byinshi by’ubucuruzi byari bifite ibikorwa bikomeye mu Bushinwa biri kurira ayo kwarika, ikigo cyAbanyamerika gitunganya filimi, The Walt Disney Company cyatangaje ko kizahomba Amadorali miliyoni 280 nyuma y’uko gitegetswe gufunga ahantu hacyo nyaburanga habiri abantu bajyaga basohokera.

Kugeza uyu munsi McDonalds imenyerewe mu gutegura amafunguro yihuse azwi nka ’Fast Food’ nayo iherutse gutangaza ko yafunze restaurants zigera kuri 300 yari ifite hirya no hino muri iki gihugu, mu gihe Starbucks nayo imenyerewe mu gucuruza ikawa yavuze ko yafunze ibikorwa byayo bigera ku 4 100

Ingaruka za coronavirus kandi ntizasize urwego rw’ubukerarugendo nka rumwe mu zifatiye runini ubukungu bw’ibihugu byinshi.

Mu myaka yashize umubare wa ba mukerarugendo b’Abashinwa basura ibihugu byo hirya no hino ku Isi warazamutse bigaragara uva kuri Miliyoni 10.5 wariho mu 2000 ugera kuri miliyoni 150 mu 2019.

Kuba ibihugu bimwe na bimwe byarashyizeho ingamba zikumira abantu bavuye mu Bushinwa nk’ingamba yo kwirinda Coronavirus, bivuze ko n’umubare wa ba mukerarugendo b’Abashinwa bakiraga uzagabanuka.

Bimwe mu bihugu bizakorwaho ni iki gihombo ni u Bwongereza, kuko Imibare ya Visit Britain igaragaza ko mu 2018 iki gihugu cyasuwe n’Abashinwa ibihumbi 391, babinjirije agera ku mapawundi miliyoni 657, ariko uyu mwaka akaba azagabanyuka.

Ikigo gifasha abantu gukora ubukerarugendo bwo mu mazi bari mu bwato bunini kizwi nka ‘Royal Caribbean International’ giherutse gutangaza ko kizahomba Amadorali miliyoni 50 kubera umugambi cyafashe wo guhagarika ibyerekezo umunani cyajyagamo mu Bushinwa.

Ibikorwa by'ubucuruzi mu Bushinwa bisa nk'ibyahagaze nyuma y'uko coronavirus yibasiye icyo gihugu
Ibihugu byinshi byatangiye gukumira abashinwa kwinjira ku butaka bwabyo, bikaba bishobora kugabanya ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza