Imvura iherutse kugwa yangije ibihingwa, barindwi barakomereka

Yanditswe na Muhonzire Sylvine
Kuya 10 Mutarama 2021 saa 11:38
Yasuwe :
0 0

Imvura ikomeye yaguye kuwa Kane tariki 7 Mutarama yangije ibihingwa, ibikorwaremezo ndetse abantu barindwi barakomereka mu gihugu hose.

Minisiteri y’Ibikorwa by’Ubutabazi, yavuze ko iyi mvura yangije inzu 14, imyaka ihinze kuri hegitari 20, amashuri 4, umuyoboro w’amashanyarazi, umuhanda ndetse itwara ubuzima bw’amatungo 4.

Ibi byabereye mu Karere ka Nyamagabe, Gisagara, Gasabo, Kamonyi, Gatsibo, Rulindo, Nyanza na Kicukiro. Utundi turere twabereyemo ibiza byatewe n’iyi mvura ntabwo turatangazwa.

Abahinzi bangirijwe n’iyi mvura bavuze ko yabateje igihombo gikomeye nyuma y’uko imyaka yabo ihagendeye.

Perezida wa koperative y’abanzi yitwa KOABIGA mu Karere ka Gasabo, Emmanuel Ndagijimana, yabwiye New Times ko hegitari 14 z’imboga n’ibigori zangijwe n’iyi mvura mu murenge wa Kinyinya.

Iyi koperative yari yarahinze amashu, inyanya, amasaka, ibibiringanya, ibigori ndetse n’ibindi kuri hegitari 120.

Ndagijimana avuga ko uyu mwuzure uterwa n’imihanda idafite za ruhurura nzima ahegereye ibishanga. Yagize ati “Tugiye guhomba toni 20 z’inyanya, enye z’ibibiringanya ndetse na toni icumi z’amasaka.”

Uyu muhinzi kandi avuga ko bafite imbogamizi y’uko sosiyete z’ubwishingizi mu Rwanda zitemera kwishingira imyaka ihinzwe mu bishanga.

Gerard Habimana, Perezida wa koperative y’abahinzi yitwa ‘Jya Mbere Muhinzi Nyanza’ yo mu karere ka Nyanza, we yavuze ko urubura rwaguye muri iyo mvura, rwangije hegitari 10 z’insenda, enye z’imiteja, hegitari eshatu z’ibibiringanya, ebyiri z’inyanya, zirindwi z’ibigori, ebyiri z’ibishyimbo ndetse na hegitari 0.6 za soya mu murenge wa Rwabicuma.

Yavuze ko kandi abahinzi bababajwe nuko bagize ibihombo bibiri, icyo batewe n’iyi mvura ndetse n’icyo batewe n’abatwaye ibyo bahinze ntibabishyure mu mwaka ushize.

Habimana yagize ati “Turasaba guverinoma ko yadufasha guhangana n’ibi bihombo tukabona imbuto ndetse n’igishoro cyo gukoresha mu kindi gihembwe cy’ihinga.”

Ibi biza bije bikurikiye inama yatanzwe n’ikigo k’igihugu gishinzwe ubumenyi bw’ikirere, aho cyerekanye ko mu bice bimwe by’amajyepfo y’uburengerazuba bw’igihugu hazagwa imvura nyinshi kurusha ibindi bice bimwe by’igihugu.

Abahinzi bagirwa inama yo guca amaterase y’indinganire kugira ngo babungabunge umutekano w’imyaka yabo, mu gihe abaturage bo bagirwa inama yo kureka amazi ndetse bagaca imiyoboro myiza aho imvura izajya ica.

Ugendeye kuri raporo z’ibikorwa by’ubuhinzi byangijwe n’ibiza mu mwaka ushize, hakomeje kugwa imvura nyinshi mu mezi ari mbere ya Werurwe, Mata na Gicurasi bishobora guteza izamuka ry’ibiciro ku biribwa nk’uko byagenze umwaka ushize.

Abahinzi bavuga ko imyaka yabo yangijwe bikabije n'imvura imaze iminsi igwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .