00:00:00 IGIHE NETWORK KN KINYARWANDA EN ENGLISH FR FRANCAIS

Impungenge kuri gahunda yo koroshya urujya n’uruza rw’abavoka muri EAC

Yanditswe na Kanamugire Emmanuel
Kuya 25 Ukwakira 2022 saa 08:22
Yasuwe :

Inteko Ishinga Amategeko y’Umuryango wa Afurika y’Iburasirazuba (East African Legislative Assembly:EALA) yemeye ko mu byo uyu muryango ugifitemo intege nke harimo koroshya urujya n’uruza rw’abatanga serivisi mu by’amategeko.

Mu mpera z’umwaka ushize, Ihuriro ry’Ingaga z’Abavoka muri EAC (East African Legal Society: EALS) ryasohoye itangazo ritunga agatoki inzego za Kenya ko zibangamira urujya n’uruza rwa serivisi mu by’amategeko kubera gukumira abanyamategeko bakomoka mu Rwanda no mu Burundi.

Kenya yavugaga ko yemerera abavoka bakomoka mu Rwanda n’u Burundi gukorerayo ariko abenegihugu bayo bagakumirwa muri ibi bihugu uko ari bibiri bigatuma na yo ivuga ko icyemezo yafashe kizavaho ari uko byakoze amavugurura.

Nyamara yaba EALS n’Urugaga rw’Abavoka mu Rwanda bivuga ko ibi atari ko bimeze kuko hari umubare munini w’Abanyakenya b’abanyamategeko bakorera mu Rwanda no mu Burundi.

Mu byo inzego za Kenya zishingikirizagaho muri iri kumira ry’Abanyarwanda n’Abarundi harimo no kuba zikemanga ubushobozi bw’abize iby’amategeko mu Rwanda na ‘Système’ ubucamanza bw’u Rwanda n’u Burundi nk’ibihugu bukoreramo itandukanye n’iy’ibindi bihugu.

Mu kiganiro abagize Inteko Ishinga Amategeko ya EAC bari mu mirimo yabo mu Rwanda bagiranye n’itangazamakuru kuri uyu wa 25 Ukwakira, Perezida w’iyi nteko, Martin Ngoga, yemeje ko uru rwego rukirimo ikibazo gikomeye.

Ati “Aha turacyahafite ikibazo. Ibyiza ni uko habaho kwemerera abari muri uwo mwuga gukorera mu bihugu bitandukanye kuko ntabwo wahuza ubucuruzi udahuza serivisi zifite aho zihuriye na bwo. Serivisi mu by’amategeko ni ingenzi mu gutuma ubucuruzi bugenda neza. Ibikorwa mu by’amategeko ntabwo birimo bigenda neza. Turifuza ko hagira impinduka zikorwa. Niba turi guhuza serivisi z’ubucuruzi tukaba tutemerera kanaka gukorera mu Rwanda haracyari ikibazo gikomeye.”

Yakomeje acuga ko niba integanyanyigisho hamwe n’amabwiriza ajyanye n’iby’impamyabumenyi binakwiye ko abantu bemererwa gukorera muri buri gihugu kinyamuryango mu gihe bujuje ibisabwa. Ati “Ni rumwe mu nzego tudahagazemo neza.”

Umwe mu bagize EALA ukomoka muri Uganda, Susan Nakawuki, yavuze ko iki kibazo cyaganiriweho mu nteko ndetse abadepite bagira ibitekerezo batanga ku bijyanye na serivisi mu by’amategeko zambukiranya imipaka ndetse inama y’abaminisitiri bashinzwe uyu muryango bakagira ibyo bimeza nubwo bitaratanga umusaruro.

Mugenzi we, Kakooza James, yavuze ko hatabayeho kwemera urujya n’uruza rw’abantu, ibintu na serivisi, intumbero y’amasezerano ashyiraho umuryango wa EAC idashobora kugerwaho.

Inteko Ishinga Amategeko y’Umuryango wa Afurika y’Iburasirazuba (EALA) yatangiye imirimo yayo mu Rwanda ku wa 24 Ukwakira bika biteganyijwe ko izayisoza ku wa 5 Ugushyingo uyu mwaka.

Inteko ya EALA ibera ku Cyicaro i Arusha muri Tanzania ariko no muri buri gihugu kiri muri uyu muryango irahabera uretse ko hari hashize imyaka itatu bitagenda gutyo bitewe n’ibibazo byatewe na Covid-19 n’iby’ingengo y’imari.

Izaganira ku mishinga y’amategeko igera kuri ine, igezweho raporo za komisiyo umunani ndetse ifite n’ibikorwa izafatanya n’Inteko Ishinga Amategeko y’u Rwanda.

Perezida w'Inteko Ishinga Amategeko y'Umuryango wa Afurika y'Iburasirazuba, Martin Ngoga (hagati) ubwo yari ayoboye ikiganiro EALA yagiranye n'abanyamakuru
Inteko ya EALA yitabiriwe n'abadepite bo mu bihugu bigize EAC hatarimo Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .