Impanuro za Ntaganira, umunyeshuri rukumbi uherutse guhabwa impamyabumenyi y’ikirenga muri UR

Yanditswe na Twarabanye Venuste
Kuya 11 Ugushyingo 2019 saa 09:58
Yasuwe :
0 0

Dr. Vincent Ntaganira, ni we munyeshuri rukumbi wahawe impamyabumenyi y’ikirenga (Phd), mu barenga 9,000 basoje amasomo yabo mu byiciro bitandukanye muri Kaminuza y’u Rwanda tariki 8 Ugushyingo 2019.

Dr. Vincent Ntaganira yahawe imyamyabumenyi y’ikirenga mu by’Imitekerereze yagutse n’Ubuvanganzo ( Phd in Philosophy and Literature). Yakoze ubushakashatsi ku budasa bw’ubuhamya kuri Jenoside yakorewe Abatutsi, agamije gufasha abantu kubwumva no kubwisobanurira, no kugira ngo bube inzira yo gufasha abantu kwandika ubwabo.

Dr. Vincent Ntaganira ukora mu Biro bya Minisitiri w’Intebe, yahoze ari Umwarimu muri Kaminuza y’u Rwanda. Yavuze ko igikurikira ubwo bushakashatsi ari ugukomeza kwandika no kwigisha abantu.

Mu kiganiro cyihariye nyuma yo kwakira iyo mpamyabumenyi, yabwiye IGIHE ko ashimishijwe cyane n’intambwe yateye, agira ati “Iki ni ikivi nsoje, ndumva nsa nk’umuntu wari wikoreye ijuru akaritura hasi, ndishimye cyane, ndanyuzwe.”

Ku bijyanye n’ubushakashatsi yakoze ku budasa bw’ubuhamya bwa Jenoside yakorewe Abatutsi, yavuze ko mbere na mbere nk’umuntu wanyuze mu mateka adasanzwe ya Jenoside azi uko kuyandikaho bigora.

Ati “Kwandika ubuhamya biragora kuko ntabwo kamere muntu imenyereye kwandika ibisa na Jenoside, ni amateka adasanzwe muri kamere muntu. Kubyandika rero ntabwo byoroshye, n’amagambo yo kubivuga ntabwo aboneka, Abanyarwanda baravuze ngo umutima usobetse amaganya ntusobanura amagambo, hari icyo bivuze rero ariko birashoboka.”

Mu bushakashatsi bwe, Dr. Ntaganira yasomye ubuhamya bwanditswe kuri Jenoside yakorewe Abatutsi arabucengera. Yizeye ko uzabusoma buzamufasha kwandika ubuhamya bwe no kumva ubwo abandi banditse.

Ati “Nagerageje kubicengera ndabisoma, nsoma ubuhamya bwanditse ndeba uko bagiye babyandika ndeba icyo bahuriyeho, ndeba uko washobora kwandika nawe ibyawe, ku buryo usomye ibyo nanditse, byatuma na we ushaka kwandika byakorohera kwandika no kumva ibyo abandi banditse ukabyumva bikoroheye.”

Ubutumwa bwe ku rubyiruko

Dr. Ntaganira yasoje amasomo yo ku rwego rwo hejuru ariko mu bayasoje harimo n’urubyiruko. Yabwiye IGIHE ko iteka iyo abonye urubyiruko hari ubutumwa aruha.

Yagize ati “Ni ukubabwira ngo ni mwe mizero y’u Rwanda, ibyo dukora byose ni mwebwe bigomba gushingiraho, ni mwebwe muzasimbura twebwe dusaza, ni ukuvuga rero ngo nk’urubyiruko amahirwe ufite y’u Rwanda rwiza rw’uyu munsi, rubaha yo kwiga ukagera aho ushaka nta kuvangura, ni amahirwe bagomba gukoresha neza ntibajye mu biyobyabwenge, ntibajye mu nzoga bakaba abantu b’abagabo bafite indangagaciro nziza.”

Nubwo kubaha abakuru ari indangagaciro ikwiye kuranga abakiri bato, abwira urubyiruko ko gusuzugura umukuru ukwigisha amacakubiri nta kosa ririmo.

Ati “Umuntu mukuru uzagutoza amacakubiri uzamusuzugure nta cyaha uzaba ukoze [....] ikindi ni ukugira inzozi ndende zireba kure, nturebe hafi gusa ukareba u Rwanda ukareba Afurika, ukareba Isi ukaguka muri byose ukaba u Rwanda rugari rujya hose Isi yose tukayijagajaga neza tubashyira agaciro kacu n’indangagaciro zacu.”

Dr. Ntaganira ni umwe mu bantu 12 bashinze Umuryango w’Abanyeshuri barokotse Jenoside yakorewe Abatutsi (AERG) mu 1996 waje kuvukaho uwa bakuru babo, barangije amashuri (GAERG).

Abaheruka gusoza amasomo muri Kaminuza y’u Rwanda bahawe impamyabumenyi ku wa Gatanu ni 9,382 barimo ab’igitsina gabo 5,894 n’ab’igitsina gore 3,488.

Akanyamuneza kari kose ubwo Dr Ntaganira yahamaharwaga kwakira impamyabumenyi ye imbere y'imbaga yari iteraniye kuri Stade Huye
Umuyobozi w'Icyubahiro wa Kaminuza y'u Rwanda Patricia L. Campbell ashimira Dr. Vincent Ntaganira
Dr. Vincent Ntaganira asubiramo indahiro yo gukomeza gukora ibikorwa bifitiye Abanyarwanda akamaro no kuba umusemburo w'imibereho myiza
Ibyishimo byari byose kuri Kaminuza y'u Rwanda yatanze impamyabumenyi y'ikirenga no ku munyeshuri akaba yarahoze ari n'umwarimu wayo
Byari ibyishimo bikomeye ku muryango wa Dr. Vincent Ntaganira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza