Impamvu Pst Singirankabo yikomwe na RNC yamushinje kunekera u Rwanda muri Amerika yibereye i Kigali (Video)

Yanditswe na Musangwa Arthur
Kuya 20 Nzeri 2020 saa 10:49
Yasuwe :
0 0

Pasiteri Singirankabo Jean de Dieu ari mu bihumbi by’Abanyarwanda bafatiwe muri Uganda, bakorerwa iyicarubozo ry’inkazi ribabaza umubiri n’umutima bashinjwa kuba ba maneko b’u Rwanda.

Nyuma y’ibyumweru bitandatu ari mu maboko y’Urwego rwa Uganda Rushinzwe Iperereza rya Gisirikare, CMI, Pasiteri Singirankabo, yajugunywe ku mupaka wa Kagitumba ku wa 12 Kamena 2019, yari kumwe n’abandi Banyarwanda 20.

Muri icyo gihe cyose yakorerwaga iyicarubozo rikomeye mu Kigo cya Gisirikare cya Mbuya kugeza n’aho bamwangije ubugabo, bamuziza ko yanze kwifatanya n’Umutwe w’Iterabwoba wa RNC, uyoborwa na Kayumba Nyamwasa.

Pasiteri Singirankabo yabaga muri Uganda kuva mu 2006 ubwo yatangiraga kuhakorera ibwirizabutumwa, yaje no gukorana na ADEPR Pentecostal Church International.

Ibintu byaje kuzamba atangira guhigwa, mu cyo yise ubugambanyi bwa bagenzi be basangiye umurimo w’ivugabutumwa.

Yahowe ko mu nyigisho ze yakundaga kugusha ku gushishikariza Abanyarwanda gukunda igihugu cyabibarutse no kunyuranya n’abatacyifuriza ineza.

Pasiteri Singirankabo amaze umwaka n’amezi asaga atatu avuye muri Uganda, ariko itangazamakuru rya RNC ryakomeje kumugenza no kumwita maneko y’u Rwanda.

Mu biganiro bya Radio Itahuka ku wa 26 Kanama, yaburiraga Abanyarwanda baba mu mahanga yita ‘opozisiyo’, kuba maso kubera ko “u Rwanda rwohereje ba maneko bo kubashakisha no kubica mu bihugu baherereyemo.”

Mu kugaruka kuri abo ba maneko, uwatangaga ikiganiro wiyitaga “umunyapolitiki”, yavuze ko “Rev. Jean de Dieu Singirankabo wafungiwe na CMI muri Uganda umwaka ushize, yageze i Washington DC muri Amerika mu minsi mike ishize. Ntabwo nkora mu nzego z’umutekano za Uganda ngo menye ibyo yaziraga, ariko niba Uganda igushinje ubutasi cyangwa gukorana n’u Rwanda, dukwiye gushyira Imana ku ruhande tukagufata nk’umwanzi n’umunyabyaha!”

Pasiteri Singirankabo mu kiganiro cyihariye yabwiye IGIHE ko ibyamuvuzweho ntaho bihuriye n’ukuri kuko kuva yavuka atarurira indege.

Ati “Hari umuvandimwe nigeze gutwara mugeza ku Kibuga Mpuzamahanga cy’Indege cya Kigali i Kanombe. Ifoto twahifotoreje rero, ubanza ari yo yatumye bibeshya ko naba nagiye mu mahanga, kandi nyamara mu buzima bwanjye sindakandagira mu ndege. Wenda barabinyifuriza n’uko babikorana nabi banyita umwicanyi.’’

Akiri muri Uganda yumvaga inkuru z’Abanyarwanda bakorerwa iyicarubozo ariko akumva we nka pasiteri ibyo kwitwa maneko bitamureba.

Muri icyo gihe ariko yigeze yumva n’inkuru z’abavuga ko babanye mu gisirikare ariko atari byo.

Ati “Nanjye narabyumvise birantangaza [ibyo kuba maneko w’u Rwanda] cyane. Hari umuntu witwa Munyampeta Aloys wigeze kuvuga ko njye na we twabanye mu gisirikare, nyamara abeshya.’’

Pasiteri Singirankabo Jean de Dieu yavuze ko kuba RNC yamubeshyera ko yoherejwe kuba maneko y'u Rwanda muri Amerika nta gitangaza kirimo kuko isanzwe ikoresha icengezamatwara mu kuyobya abantu

Pasiteri Singirankabo akeka ko kwikomwa na RNC bifitanye isano n’ibikorwa by’ivugabutumwa yakunze kugaragaramo kuva mu myaka 26 ishize.

Yagize ati “Muri ADEPR natangije itsinda ryitwa “Ipfundo ry’Amahoro” ryahuzaga abanyamasengesho bo mu turere 30 tw’igihugu. Intego yaro ni ugusengera itorero (ADEPR) n’igihugu.’’

Iri tsinda ryakoraga amasengesho y’iminsi irindwi ategura Abanyarwanda gukomera mu bihe byo kwibuka Jenoside yakorewe Abatutsi no gusengera abanyeshuri ngo Imana ibahe ubwenge.

Yakomeje ati “Twabaga turi gusabira Abanyarwanda kugira umutima ukomeye, no kwihangana biciye mu mbaraga z’amasengesho. Abitabiraga ayo masengesho babaga baturutse mu turere twose tugize igihugu n’abandi babishaka babaga baturutse muri Uganda. Abenshi babaga ari urubyiruko, kandi icyo nabigishaga ni Ugukunda itorero n’igihugu. Narababwiga nti ‘Nimureke duhindure igihugu n’itorero neza kuruta uko twabisanze.’

Muri ayo masengesho bagiraga iyerekwa hakaba igihe, Imana ibereka ibigiye kubera mu gihugu no hanze yacyo.

Pasiteri Singirankabo yashinze Ipfundo ry’Amahoro mu 1996, ageze muri Uganda ahindura izina ry’iryo tsinda aryita ‘Prayer Worriers’ bisobanuye ‘Abarwanyi b’Abanyamasengesho.’

Ubwo ADEPR yafunguraga imiryango muri Uganda, yahise ayiyungaho bituma n’ibikorwa bye birushaho kwamamara hose.

Ati “Hari abapasiteri bo mu yandi matorero yari yariyise ADEPR yari asanzwe muri Uganda batangiye kujya baturegera abayobozi cyangwa se muri polisi bavugako turi intasi z’u Rwanda. Bari bafite ubwoba kuko babonaga tugiye kubatwara abayoboke kandi koko bahise bayavamo kuko bari bamaze kubona ADEPR nyayo.’’

RNC nk’umutwe ufite imizi muri Uganda hari abapasiteri wacengejemo amatwara kugeza aho banatanga imisanzu mu kuyishyigikira.

Pasiteri Singirankabo avuga ko we abo bapasiteri bamuziraga kuko yababuzaga ibyo bikorwa agereranya no kwikora mu nda.

Ati “Narababazaga nti “ese ko muri gutera inkunga RNC, nigura amabombe ikayatera mu Rwanda mutekerezako azarobanura agasiga ababyeyi banyu, abavandimwe cyangwa inshuti zanyu?”

“Abo bagabo bo muri RNC rero, bashobora kuba baranyikomye bavuga ko ndi kubafata ku munwa. Tumaze gufungwa muri CMI ku kagambane ka RNC, wasangaga baguhatira kuyinjiramo.’’

Icyo gihe babizezaga ko nibemera kuyoboka RNC bazabashakira ubuhungiro bakanabarindira umutekano.

Avuga ko yabahakaniraga kuko kuri we gutera igihugu cyawe “byari bimeze nka kumwe ingurube ibyara ibyana yasonza igahindukira ikabirya. Ntekerezako ari zo mpamvu zatumye bagenda banyikoma.’’

Pasiteri Singirankabo ateranira muri ADEPR muri Paruwasi ya Nyakabanda, nta zindi nshingano itorero riramuha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .