00:00:00 IGIHE NETWORK KN KINYARWANDA EN ENGLISH FR FRANCAIS

Imiryango igera ku 3000 igiye kwimurwa mu mushinga wo kwagura Pariki y’Ibirunga

Yanditswe na Claude Bazatsinda
Kuya 6 August 2022 saa 02:24
Yasuwe :

Urwego rw’Igihugu rw’Iterambere, RDB, rufite umushinga wo kwagura Pariki y’Igihugu y’Ibirunga ikava kuri hegitari 160 ikagera kuri 197,4 aho biteganyijwe imiryango igera ku 3000 yari ituye mu nkengero cyangwa ihakorera ubuhinzi izimurwa.

Mu biganiro byahuje Akarere ka Musanze n’abafatanyabikorwa mu byo kurengera urusobe rw’ibinyabuzima byatangajwe ko kwagura iyi pariki bizakorwa mu byiciro bitatu mu gihe cy’imyaka 15 yongerweho 23%.

Hazakorwa inyigo zizatuma Pariki irushaho kwinjiza umutungo habungabungwa n’imibereho y’imyamaswa no kurushaho kuzamura iterambere ry’abayituriye n’iry’igihugu muri rusange.

Umuyobozi w’Akarere ka Musanze Wungirije Ushinzwe Imari, Ubukungu n’Itarembere, Andrew Rucyahana Mpuhwe, avuga ko kuri ubu umushinga wo kwagura Pariki y’Igihugu y’Ibirunga ugiye gutangirana n’ukwezi kwa munani 2022 kandi ko uzakomeza kugenda unozwa kandi ko ikigamijwe ari uko uzazamura ubuzima n’imibereho y’abaturage.

Yagize ati “Muri uku kwezi kwa munani haratangira ibikorwa byo kunoza urutonde rw’imitungo iri ahagiye kwagurirwa Pariki, harebwa n’ibizasabwa kugira ngo abo baturage bimurwe, aho tuzakora ubukangurambaga, gukosoza ibibazo by’ubutaka butabanditseho tubakangurire kubwiyandikaho. Ni igikorwa kizageza mu kwezi k’Ukuboza 2022, mbere y’uko dutangira igikorwa cyo kwishyura imitungo kuri ba nyiri ubwite."

"Icyo dusaba abaturage ni ubufatanye kugira ngo uyu mushinga ugerweho, imiryango itari iya Leta yo ifite uruhare rukomeye mu kuzamura imyumvire y’abaturage babaha ubumenyi no kubafasha ubwabo gukora imishinga inyuranye yunganira kwaguka kwa pariki, ibyo byose bishobora gukorwa n’abantu bikorera bari muri sosiyete civile."

Rucyahana akomeza avuga ko bifuza ko Musanze iba santere y’icyitegererezo mu bukerarugendo kubera amahirwe y’ishoramari ifite, imiterere, ikirere n’icyerekezo cy’Igihugu.

Ati" Musanze dushaka ko iba santere y’icyitegererezo mu bukerarugendo urebye imiterere, amahumbezi, iterambere ryaho ndetse n’icyerekezo cy’igihugu kandi byose birashoboka."

Umuhuzabikorwa w’ihuriro ry’imiryango Nyarwanda iharanira kurengera ibidukikije no guhangana n’imihindagurikire y’ibihe (Rwanda Climate & Development Network/RCCDN), Vuningoma Faustin, yavuze ko kwimura abaturage ari kimwe mu bizarinda inyamaswa gutoroka Pariki kandi ko bikwiye gutegurwa, uturiye Pariki na we akarushaho kubona inyungu.

Umuyobozi wa Pariki y’Igihugu y’Ibirunga, Uwingeri Prosper, yavuze ko igihe kigeze ngo hakorwe ibikorwa byatuma ibyiza bya Pariki bikomeza kwiyongera aho gusubira inyuma.

Ati" Kwagura pariki bizatuma twongera ibyiza twayikuragamo haba ku ruhande rw’ubukerarugendo, haba ku ruhande rwo korengera urusobe rw’ibinyabuzima. Murabizi umutungo uturukamo ugira uruhare mu iterambere ry’igihugu haba nko kubaka ibikorwa remezo no guteza imbere imibereho myiza y’abaturage muri aka gace iherereyemo. Turifuza rero ko byiyongera."

Pariki y’Igihugu y’Ibirunga icumbikuye urusobe rw’ibinyabuzima birenga 400 ikagira umwihariko wo kuba muri ibyo binyabuzima harimo n’ingagi zo mu misozi mirere zikunze gusurwa cyane na ba mukerarugendo mu bihe bitandukanye bikinjiriza igihugu amadovize.

Kuva muri 2007, imiryango y’ingagi imaze kwikuba inshuro zirenga ebyiri aho yavuye ku 10, ikaba igeze kuri 24 igizwe n’ingagi zisaga 600. Kwagura Pariki bikaba bizatuma imibereho myiza y’ingagi ikomeza kuzamuka, hirindwa amakimbirane y’inyamaswa n’abantu, aho zimwe zitoroka zikajya mu baturage kubera ko aho ziba habaye hato.

Ubukerarugendo kimwe mu bifatiye runini ubukungu bw’igihugu kuko nko mu mwaka wa 2019 mbere y’uko Covid-19 yaduka ku Isi, bwinjije agera kuri miliyoni 498 z’Amadorali ya Amerika ariko nyuma buza gukomwa mu nkokora na Covid-19 biragabanyuka. Intego ni uko bwazajya bwinjiza miliyoni 800 z’Amadorali guhera muri 2024.

Muri ibi bihe Covid-19 itangiye gucisha make, ba mukerarugendo basura Pariki y’Igihugu y’Ibirunga bagenda biyongera kuko ubu hari kwakirwa abari hagati ya 100 na 120 ku munsi.

Umushinga wo kwagura Pariki y’Igihugu y’Ibirunga biteganyijwe kuba warangiye hagati y’imyaka 10 na 15 iri imbere. Kwishyura abaturage bizatwara miliyari zisaga 65 z’amafaranga y’u Rwanda.

Ibikorwa byo gusubiranya ubutaka bwari butuweho ahazaba haguriwe pariki bizatwara miliyari zisaga 24 Frw naho kubaka imidugudu izatuzwaho imiryango yari ituye n’iyahingaga ahazagurirwa pariki bizatwara miliyari 144 Frw.

Ibikorwa bizateza imbere abo baturage bizatwara miliyari zisaga 36 Frw naho ibyo guhanga imishinga izafasha abaturage kwibeshaho bizatwara asaga miliyari 27 z’amafaranga y’u Rwanda.

Muri rusange uyu mushinga uzatwara agera kuri miliyari zirenga 300 z’amafaranga y’u Rwanda.

Akarere ka Musanze katangiye kuganira n'abafatanyabikorwa bafite aho bahuriye no kurengera urusobe rw'ibinyabuzima
Pariki y'Igihugu y'Ibirunga icumbikiye ibinyabuzima birimo Ingagi zo mu misozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .