00:00:00 IGIHE NETWORK KN KINYARWANDA EN ENGLISH FR FRANCAIS

Imibiri 26 y’abishwe muri Jenoside yabonetse mu bitaro bya Kabgayi

Yanditswe na Akimana Jean de Dieu
Kuya 2 Gicurasi 2021 saa 04:21
Yasuwe :
0 0

Mu bitaro bya Kabgayi ahari gusizwa ikibanza kizubakwamo inzu y’ababyeyi (Maternité), habonetse imibiri 26 y’abishwe muri Jenoside yakorewe Abatutsi mu 1994.

Iyi mibiri yabonetse kuri iki Cyumweru tariki 2 Gicurasi nyuma y’iminsi hamenyekanye amakuru ko aha hagiye kubakwa inzu y’Ababyeyi igeretse haba harajugunywe imibiri y’abatutsi.

Bamwe mu batanze ubuhamya bari barahungiye i Kabgayi, bavuga ko hiciwe abatutsi benshi muri Jenoside ariko amakuru y’aho bagiye bajugunwa atarabasha gutangwa neza kugira ngo bashyingurwe mu cyubahiro.

Niyodusenga Thomas w’imyaka 60, umwe mu bari bahungiye i Kabgayi muri Jenoside, yashimangiye ko muri aka gace hiciwe abatutsi benshi.

Yagize ati"Nahungiye aha mvuye muri Komini ya Buringa ariko hano hari abatutsi benshi ndetse ubwicanyi butaraba bwinshi abicwaga nitwe twazaga kubajugunya hano hari ishyamba rigari . Ubwicanyi bwiyongereye twabuze uko tubigenza wasohoka nawe ntugaruke. Iyo wahuraga n’Interahamwe nawe zarakwicaga ariko nyuma haje abatabazi (Croix Rouge) akaba aribo baza gukuraho abishwe ari nabo dukeka ko baba barashyinguye aba turimo kubona aka kanya".

Uwayisenga Vestine na we warokokeye i Kabgayi akomoka mu karere ka Kamonyi akaba atuye mu murenge wa Byimana mu Karere ka Kamonyi.

Yavuze ko mu gihe cya Jenoside Abatutsi benshi bishwe bakanashyingurwa ahantu hatandukanye hatagiye hamenyekana.

Yagize ati"Muri Jenoside nahungiye hano i Kabgayi ariko abantu barishwe benshi nyuma Croix Rouge iraza itanga akazi ku barimo n’Interahamwe akaba aribo baza gushyingura abishwe ariko ntawamenye aho bashyizwe ariko turebye iyi mibiri bigaragara ko ari iy’abacu bishwe muri Jenoside.”

Perezida wa Ibuka mu karere ka Muhanga, Rudasingwa Jean Bosco yavuze ko hashize igihe hatangwa ubuhamya bw’uko i Kabgayi hapfiriye abatutsi benshi ariko hakabura abatanga amakuru y’aho imibiri yabo yashyizwe.

Yagize ati “Hashize igihe kirekire abarokotse batanga amakuru y’uko aha i Kabgayi hiciwe abatutsi benshi ariko ntitubashe kubona neza amakuru afatika ngo tunarebe aho gushakira abacu. Abazi amakuru turabasaba ko batwandikira ubutumwa bakabusiga ahantu bukabonwa bugaherwaho hashakishwa n’andi kuko abari barahungiye mu iseminari ntoya ya Kabgayi ,ahiswe muri CND no ku ishuri ribanza rya Kabgayi bose baricwaga bakagira n’aho bajugunwa hataramenyekana ariko ibi n’ibimenyetso by’uko dukomeje twabona benshi bishwe".

Umunyamabanga Nshingwabikorwa w’umurenge wa Nyamabuye, Nshimiyimana Jean Claude yavuze ko bishimiye kuba babonye imibiri y’abishwe muri Jenoside .

Kuba iyo mibiri byagaragaye ko yashinguwe muri shitingi, Nshimiyimana avuga ko ari ikimenyetso ko atari abarwayi bahashyinguwe nubwo hari abavugaga ko hahoze irimbi ry’ibitaro, ngo kuko ibitaro bitashyingura abantu muri ubwo buryo.

Yijeje ko bagiye gukomeza gushakisha kugeza ubwo abishwe muri Jenoside yakorewe Abatutsi bazashyingurwa mu cyubahiro.

Abarokokeye i Muhanga bavuga ko muri iki gice cy’amashyamba akikije ibitaro bya Kabgayi hiciwe abatutsi benshi barenga ibihumbi 50, bityo bagasaba ko hakorwa iperereza ryimbitse imibiri yose ikaboneka igashyingurwa mu cyubahiro.

Aho iyi mibiri yabonetse hagiye kubakwa Maternité
Iyi mibiri bigaragara ko yashyinguwe muri shitingi
Abarokokeye i Kabgayi bavuze ko hiciwe abatutsi benshi batarashyingurwa mu cyubahiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .