Imibare y’abana bata ishuri ikomeje kuzamuka, uruhare ni urwa nde?

Yanditswe na Evariste Nsengimana
Kuya 7 Ukwakira 2019 saa 08:40
Yasuwe :
0 0

Minisiteri y’Uburezi n’abafatangabikorwa bayo bakomeje gushakisha ingamba zihamye zo kugabanya no gukumira umubare munini w’abana bata ishuri ugenda wigaragaza uko imyaka ishira indi igataha.

Raporo Minisiteri y’Uburezi iheruka gutangaza igaragaza ko mu mwaka w’amashuri wa 2017/18, abanyeshuri baretse kwiga mu mashuri abanza bageze kuri 6.7% bavuye kuri 5.6% mu 2016/17 mu gihe mu 2015/16 bari kuri 5.7%.

Mu mashuri abanza iyi raporo igaragaza ko abahungu aribo baza imbere mu guta amashuri ugereranyije na bagenzi babo b’abakobwa naho mu yisumbuye abakobwa bakaza imbere.

Mu mwaka wa 2017/18 abahungu bataye ishuri bari 7% abakobwa ari 6.3%, mu 2016/17 abahungu bari 5.9% abakobwa ari 5.3% mu gihe mu mwaka wawubanjirije abahungu bari 6% abakobwa ari 5.4%.

Iyo raporo igaragaza ko mu mashuri yisumbuye abayavuyemo mu mwaka w’amashuri wa 2017/18 bageze kuri 5.8% bavuye kuri 4.4% mu 2016/17 mu gihe mu 2015/16 bari kuri 4.5%.

Bitandukanye no mu mashuri abanza, mu yisumbuye ho bigaragara ko abakobwa aribo bava mu ishuri cyane kurusha abahungu.

Mu mwaka wa 2017/18, abakobwa bavuye mu ishuri bari 6.1% abahungu ari 5.5%, mu 2016/17 abakobwa bari 4.7% abahungu ari 4% mu gihe mu 2015/16 abakobwa bari 4.8% abahungu ari 4.1% gusa.

Kuki abanyeshuri bava mu ishuri?

Zimwe mu mpamvu zikunze gushyirwa mu majwi ko zitera abana kuva mu ishuri harimo ko abana bajya mu mirimo ibabuza kwiga rimwe na rimwe bayoherezwamo n’ababyeyi, imyitwarire y’abana banga kujya ku ishuri bakirirwa bazerera, guteshuka ku nshingano kw’ababyeyi, amakimbirane yo mu miryango n’ibindi bituma abana bahinduka inzererezi.

Harimo kandi n’ubukene aho usanga ababyeyi bananirwa kugurira umwana ibikoresho by’ishuri bikaba byaca umwana intege, akarivamo.

Imwe mu mirimo ababyeyi boherezamo abanyeshuri harimo nko kurinda imyaka bayirinda konwa n’inyoni irimo nk’imiceri mu bishanga, hari n’aho bivugwa ko boherezwa mu mirimo ivuranye irimo ubucukuzi bw’amabuye y’agaciro, gusarura icyayi, imiceri n’ibindi.

Umuyobozi w’Urwunge rw’Amashuri rwa Bwira mu Murenge wa Bwira, Akarere ka Ngororero, Nkunzebose Jean Marie Vianney yabwiye IGIHE ko impamvu zibuza abana kwiga zirimo guteshuka ku nshingano kw’ababyeyi, ubukene, ibikorwa remezo bicye n’ibindi.

Ati “Hari ikibazo cy’ababyeyi bafite imyumvire iri hasi abana bakiga nta ntego aho kugira ngo amukurikirane akumva ko yarera umwana cyangwa agakurikirana amatungo aho ari. Ikindi usanga abana b’abakene babura ibikoresho bakarivamo. Hari abarivamo kubera ugendo rurerure bakora bajya ku ishuri.”

Yakomeje agira ati “Hari abakunda kujya mu mirimo itandukanye. Nk’ino aha[Ngororero] tugira abajya mu bucukuzi bw’amabuye y’agaciro. Hari n’uruhare rw’abarezi usanga badashishikariza abana gukunda ishuri ahubwo bakamutuka cyangwa bakamukubita.”

Mu mashuri abanza abahungu nibo bata ishuri cyane
Mu mashuri yisumbuye abakobwa nibo bata ishuri cyane

Hakorwa iki ngo abana bareke guta ishuri?

Nkunzebose yavuze ko kugira ngo abana bige kandi barangize badataye ishuri, n’abaritaye bagaruke bisaba uruhare rw’ababyeyi, ubuyobozi bw’amashuri, inzego z’ibanze, Leta n’abandi bafatanyabikorwa mu gukemura zimwe mu mbogamizi zituma abana bareka kwiga.

Ati “Ubuyobozi bw’ibigo dukwiye gushishikariza abarimu gukurikirana umunsi ku munsi abana kuko hari nk’igihe batinda gutanga raporo kubakurikirana bikagorana.”

Ku ruhanda rwa Leta, yavuze ko icyo isabwa ari ukubaka amashuri kugira ngo abana bakora urugendo rurerure bagabanuke.

Muri Miliyari 180Frw Leta iheruka kugurizwa na Banki y’Isi, Minisitiri w’imari n’igenamigambi, Dr Uzziel Ndagijimana yavuze ko mu byo azifashishwamo harimo kubaka ibyumba by’amashuri ibihumbi 11 n’ubwiherero 14.680, bingana na 50% by’ibikorwa remezo urwego rw’uburezi mu Rwanda rukeneye.

Inzego z’ibanze zikora iki?

Mu bukanguramba Minisiteri y’Uburezi ikora bugamije kuzamura ireme ry’uburezi, ireba ibintu by’ingenzi biridindiza n’icyakorwa kugira ngo risigasirwe. Muri ibyo biridindiza harimo umubare w’abarivamo.

Minisiteri y’Uburezi ivuga ko inzego z’ibanze nka zimwe mu zikorana bya hafi n’abaturage zikwiye gukurikirana niba abana bari mu cyiciro cyo kwiga biga nta nkomyi, abarivuyemo zikabakurikirana bakarisubiramo ntawe uhutajwe.

Gusa umwe mu baturage bo mu Murenga wa Nyanza mu Karere ka Gisagara utarashatse ko amazina ye atangazwa yabwiye IGIHE ko ubuyobozi bw’inzego z’ibanze bukora umukwabu wo gushakisha abanyeshuri bataye ishuri, ababyeyi babo bagashyirwa mu kagari bakabakubita.

Yagize ati “Umwana wanjye yanze kwiga neza yirirwa abunga nanjye ntacyo ankorera ariko ikimbabaza ni uburyo inzego z’ibanze zibimpora kandi nta ruhare nabigizemo. Mu minsi ishize baduhurije mu biro by’Akagari, bamwe baranadukubita.”

Muri uyu Murenge hari n’abavuze ko hari ababyeyi bashyirwa mu ishuri bakiga mu mwanya w’abana babo barivuyemo nubwo baba batazi gusoma no kwandika bakirirwa bicayemo.

Umunyamabanga Nshingwabikorwa w’Umurenge wa Nyanza mu Karere ka Gisagara, Kayinamura Jean Baptiste yabwiye IGIHE ati ‘Ibyo ntabwo wabikora, igikorwa ni icy’umukuru w’Umudugudu, dufata abana n’ababyeyi tukabashyira mu nteko y’abaturage tukabagaya ku buryo tubereka ko ibyo bari gukora atari byo’.

Yongeyeho ati “Ababyeyi turabafata, bagahurizwa mu midugudu n’abana umuyobozi w’Akagari akabashorera bakabajyana ku ishuri. Ntawe ukubitirwa ku Kagari cyangwa ngo ahafungirwe. Umuturage wohereje umwana gukorera amafaranga kumva ko yamugaruye yaramenyereye ko amwohereza amafaranga yumva birebeka nabi. Bafite n’imyumvire ko n’abarangije nta kazi bafite.”

Umunyamabanga wa Leta muri Minisiteri y’Uburezi ushinzwe amashuri abanze n’ayisumbuye, Dr Issac Munyakazi yabwiye IGIHE ko ubuyobozi bw’inzego z’ibanze bwaba bukoresha imbaraga runaka mu gusubiza abana mu ishuri byaba ari amakosa bukora ku giti cyabwo nta wabibutumye.

Iteka rya Minisitiri w’Uburezi ryo mu 2016 riteganya ibihano ku babyeyi batohereza abana mu ishuri n’abandi bantu babakoresha imirimo ituma batiga cyangwa bata ishuri rivuga ko ‘Umubyeyi cyangwa urera umwana mu buryo bwemewe n’amategeko utamwohereje ku ishuri kandi agejeje ku myaka yo gutangira amashuri abanza, ahanishwa kugawa mu nama y’Umudugudu atuyemo kandi agategekwa kujyana umwana ku ishuri’.

Mu gihe umubyeyi cyangwa urera umwana avanye umwana mu ishuri atarangije, atumizwa ku ishuri agasobanurirwa akamaro ko kwiga kandi agategekwa kugarura umwana mu ishuri.

Iyo umubyeyi cyangwa urera umwana atagaruye umwana ku ishuri, ubuyobozi bw’ishuri bwifashisha ubuyobozi bw’Akagari umwana atuyemo agasubizwa mu ishuri.

Abanyeshuri bataye amashuri abanza mu 2015-18
Abanyeshuri bataye amashuri yisumbuye mu 2015-18
Imibare y'abana bata ishuri igenda izamuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza