Imbamutima z’abanyeshuri n’abayobozi b’amashuri ku munsi wa mbere w’amasomo ( Amafoto )

Yanditswe na Mukahirwa Diane
Kuya 3 Ugushyingo 2020 saa 11:23
Yasuwe :
0 0

Nyuma y’amezi asaga arindwi abanyeshuri badakandagira mu ishuri, kuri uyu 2 Ugushyingo basubiye ku mashuri. Kuba bagiye kwiga muri ibi bihe bidasanzwe bya Covid-19 bemeza ko bigoye ariko bazabishobora.

Ubwo Covid-19 yatangiraga gukwirakwira mu Rwanda hafashwe ingamba zo kuyirinda aribwo hahagaritswe n’ibikorwa bitandukanye, aho n’amashuri yisanzemo aho kuya 16 Werurwe ibigo by’amashuri byahagaritse kwigisha mu rwego rwo kwirinda Covid-19.

Inama y’Abaminisitiri yo ku wa 25 Nzeri 2020 yemeje ko amashuri yongera gufungurwa. Nyuma yo gukomorerwa amashuri akongera gutangira kuri uyu wa mbere hirya no hino mu gihugu abanyeshuri bongeye guhura n’abarimu mu ishuri imbonankubone.

Abanyeshuri bongeye kugira amahirwe yo kwinjira mu ishuri baragaragaza ko byabanejeje kandi bagiye kwigana umwete ngo bazibe icyuho cy’igihe bari bamaze batiga ndetse bakomeze no kwirinda Covid-19.

Giramata Patience umunyeshuri wiga muri Lycée Notre Dame de Citeaux, yavuze ko banezerewe kuba bongeye kugaruka ku ishuri kuko bari bamaze gutakaza byinshi kubera kutiga.

Ati “ Kuba twongeye kugaruka ku ishuri byadushimishije kuko twari tumaze igihe kinini tutiga, amezi agera muri arindwi umuntu adakangagira mu ishuri aba amaze gutakaza byinshi.”

Uyu munezero awuhuriyeho na Kwitonda Emma Divine umunyeshuri wo muri College St André Nyamirambo, wemeza ko kuba bongeye kwiga ari umunezero kuri bo ariko ko bakizirikana icyari cyaratumye batiga ariyo mpamvu bazashyira imbere kwirinda Covid-19.

Ati “Twishimiye kongera kwicara mu ishuri ariko kuba twari tumaze igihe kingana gutya tutiga ni ukubera Covid-19 , turabizirikana cyane kandi tuzakomeza kwirinda twubahiriza amabwiriza yo kuyirinda.”

Ku ruhande rw’abarimu bongeye guhura n’abanyeshuri, nabo bavuze ko banyuzwe no kongera kwigisha imbonankubone kuko ngo bituma umunyeshuri akurikiranwa neza.

Kuri ubu ikiraje abarimu ishinga ni ukureba uko abanyeshyuri babo bahagaze kugira ngo bamenye aho bazahera babigisha, dore ko hari amashuri yabanje gutanga amasuzumabumenyi ngo barebe urwego abana bariho.

Uwingabire Claude wigisha muri College St André Nyamirambo aravuga ko bagiye kureba ubumenyi bw’abana ngo babashe umenya aho bahera bigisha.

Ati “Kuri ubu urabona ko abanyeshuri bafite ishyaka ryo kwiga, twabateguriye amasuzuma kugira ngo tumenye urwego buri mwana ariho ubundi uri hasi tumwiteho cyane tumuzamure agree hejuru kandi ndibwira ko bizagenda neza.”

Uko abanyeshuri bari kwiga muri iki gihe cya Covid-19

Amashuri yongeye gufungura imiryango ariko yafunguye icyorezo cya Covid-19 ntaho kirajya, ubu abanyeshuri bakaba bagomba kwiga ndetse bakanarindwa Covid-19.

Bamwe mu bayobzi b’igibo by’amashuri bavuze ko abanyeshuru bagomba kwiga ariko ko icya mbere ari ubuzima ariyo mpamvu bashyizeho ingamba zikomeye zizabasha kurinda abana Covid-19 .

Umuyobozi w’ishuri rya Lycée de Kigali, Martin Masabo yavuze ko ubu ari ibihe bidasazwe nabo bagomba gukora ibidasanzwe mu kwirinda.

Ati “Ibi n’ibihe bidasanzwe turimo natwe tugomba gukora ibidasanzwe, ubu twashyizeho uburyo abana bazajya barindwa Covid-19 , ko umunyeshuri yinjira mu kigo bakabanza ku mupima umuriro ngo barebe ko nta kibazo afite.”

“Ikindi kandi twashyizeho amakarabiro rusange abana bagomba gukarabiraho intoki kenshi gashoboka kugira birinde. Ikindi kandi twabaciyemo amatsinda y’abantu bake kuburyo biga bahanye intera ya metero no kuryama no kurya ni uko.”

Umuyobozi Lycée Notre Dame de Cîteaux , Sr Hélène Nayituriki yavuze ko bazakomeza gushishikariza abanyeshuri kwirinda no kurinda abandi , kandi ko hagize n’igihinduka bafite uburyo biteguye kuburyo ntacyo bizangiza.

Ati “Abana ni ugukomeza kubashishikariza kubahiriza amabwira kandi urabona babyumva , ikindi dufite umuganga wabihuguriwe n’abarimu bashinzwe gukurikirana abana kuburyo hari igihindutse twahita tugitsinda vuba cyane.”

Nubwo ari ibyishimo kuba abanyeshuri bongeye gutangira ariko haracyari imbogamizi mu bijyanye n’imyigire kuko usanga mu kubahiriza gahunda zo kwirinda Covid-19 hari aho bizabangamira amasomo y’abanyeshuri.

Kuba abanyeshuri bari basanzwe bamenyereye kwigira mu matsinda ariko kuri ubu bikaba bitari gushoboka kubera guhana intera mu kwirinda Covid-19 ni kimwe mu bizabangamira imyigire y’abanyeshuri.

Tuyisenge Jackson, umunyeshuri wo muri Lycée de Kigali yagize ati “Biragoye kuba tugiye kwiga tutabasha kwegerena kuko akenshi twigiraga mu matsinda aho mugenzi wacu uri hasi ariho yazamukiraga kandi hari n’ubwo mwarimu agenda utumvishe ukaza kwegera mugenzi wawe akagusobanurira ubu ntibizashoboka kuko tutegeranye.”

Ibi kandi birashimangirwa na Padiri Faustin Nsubijeho, umuyobozi wa College St André Nyamirambo uvuga ko bigoranye.

Ati “Biragoye cyane kuba abana bari kwiga nta bwisanzure kuko ntibabasha gukora imyitozo ngororamubiri kandi abanyeshuri baba bakeneye uburyo bwo kuruhuka mu mutwe ngo bongere kwiga bameze neza.”

Nubwo hari imbogamizi zitandukanye zatuma abanyeshuri batiga neza ariko bagomba kwiga ndetse bakanarindwa Covid-19.

Abanyeshuri bagomba kwiga bashyizemo intera kugira ngo hirindwe Covid-19
Abanyeshuri bahana intera no mu gihe batari mu ishuri
Muri St Andre naho amabwiriza yo kwirinda Covid-19 arubahirizwa
Mwarimu n'umunyeshuri bose bahurira mu ishuri bambaye agapfukamunwa
Abanyeshuru bo muri College St Andre Nyamirambo babanje guhabwa isuzumabumenyi ngo bamenye uko bahagaze mu myigire
Mbere yo kwinjira mu ishuri abanyeshuri barabanza bagakaraba intoki
Abanyeshuri banejejwe no kongera gukandagira mu ishuri
Abanyeshuri baravuga ko bazagorwa no kudakorera mu matsinda
Abanyeshuri bari kwiga ariko hubahirizwa amabwiriza yo kwirinda Covid-19
Mu byo bakora byose bubahiriza amabwiriza yo kwirinda Covid-19
Abanyeshuri bongeye gusubira ku mashuri nyuma y'amezi agera kuri arindwi batiga
Abarimu ngo bazagorwa no kwigisha abana bahanye intera ariko ngo bizamenyerwa
N'igihe abanyeshuri bagiye gufata amafunguro bazajya bicara bahanye intera
Amabwiriza yo kwirinda amanitse ku bigo kugira abanyeshuri bakomeze bayarebeho
Mbere yo gukomeza amasomo babanje gukora isuzumabumenyi
No mu ishuri bazajya bambara agapfukamunwa
Umunyeshuri umwe azajya yirarana ku gitanda kugira ngo hubahirizwe intera

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .