Ibyo wamenya ku biziririzwa byasembuye ugukomera kwa RDF

Yanditswe na IGIHE
Kuya 17 Nzeri 2020 saa 07:32
Yasuwe :
0 0

Ingabo z’u Rwanda (RDF) zimaze guhamya ibirindiro kubera ubunyamwuga n’ubudahangarwa zubatse mu myaka 26 ishize, ndetse uretse gushimwa kubera uko zibungabunga inkiko z’urwa Gasabo, no mu mahanga ni uko, zitabazwa aho amahoro yabuze.

Ubu umutekano niwo mutima w’iterambere ry’u Rwanda, ariko si ibyapfuye guhama gutyo gusa, bifite imvano.

Raporo igaragaza ishusho y’uko abaturage babona imiyoborere n’imitangire ya serivisi mu nzego zibegereye (Citizen Report Card) yo mu 2019 ku nkingi y’umutekano, igaragaza ko Ingabo z’u Rwanda ari zo ziza imbere mu kwizerwa n’abaturage kuko bazizeye ku kigero cya 99.4%.

Umutekano n’ituze by’abanyarwanda bimaze imyaka ibiri biza ku isonga mu bushakashatsi bwa gatandatu bw’Urwego rw’igihugu rw’Imiyoborere (RGB), bizwi ‘Rwanda Governance Scorecard (RGS)’.

Icyo cyizere gituruka ku myitwarire n’indangagaciro biranga abashinzwe gucunga umutekano w’u Rwanda n’abanyarwanda, ku isonga, Ingabo z’u Rwanda.

Ni icyizere gishingira ku muhate washyizwe mu kubaka umusirikare utazi gukoresha intwaro gusa, ahubwo unubatswe n’indangagaciro, kuburyo ubu abasirikare batakiri abarinzi b’inkiko z’u Rwanda ngo bahore mu bigo, ni n’abafatanyabikorwa mu iterambere ry’abaturage.

Mu gatabo kitwa “Imyitwarire n’indangagaciro by’ingabo z’u Rwanda” hagaragaramo ibizira bikaziririzwa ku musirikare w’u Rwanda, yaba umuto cyangwa umukuru.

Muri ako gatabo, habonekamo ko kizira ku ngabo y’u Rwanda kurangwa n’amacakubiri, ruswa, amatiku, kurema udutsiko no guca mu nzira zitemewe ukoreshwa n’inyungu bwite.

Ni imyitwarie ingabo z’u Rwanda zitajya zihanganira, urugero ni aho nko mu mwaka wa 2010, ubushinjacyaha bwa gisirikare bwatangiye gukurikirana bamwe mu basirikare bakuru bari baherutse gutoroka barimo uwari Lieutenant General, Faustin Kayumba Nyamwasa n’uwari Major, Théogène Rudasingwa, bubakurikiranyeho ibyaha bivutsa igihugu umudendezo, ibyaha bihungabanya Leta, icyaha cyo gukurura amacakubiri, ibyaha byo gusebanya n’ibitutsi n’icyaha cyo kurema umutwe w’abagizi ba nabi n’icyaha cyo gutoroka igisirikare.

Mu mwaka wa 2011 bakatiwe n’Urukiko Rukuru rwa Gisirikare igifungo cy’imyaka 24, no kwamburwa impeta za gisirikare.

Mu bindi biziririzwa mu Ngabo z’u Rwanda kandi, harimo gukunda ikuzo, gukoresha igitugu, gukunda ubutegetsi, inda nini n’umururumba.

Ku bijyanye n’inda nini n’umururumba, Umujyanama wa Perezida mu by’umutekano Gen James Kabarebe yigeze kuvuga uburyo Kayumba Nyamwasa yemewe gukoreshwa ngo yemere guhimba ibinyoma ngo ajye gutanga ubuhamya ko Perezida Paul Kagame ari mu bahanuye indege yari itwaye Juvenal Habyarimana.

Icyo gihe Gen Kabarebe yagize ati “Biriya bagiye muri Afurika y’Epfo bagashaka ibisambo nka ba Kayumba bakamugira inama sinzi ibyo bamusezeranyije niba ari amafaranga kuko na we yabonye ko intambara ze ntaho ziva ntaho zigana, bati ‘noneho bishyire kuri Perezida ya dosiye yo kuvuga abantu 40 ngo barashe indege ya Habyarimana, oya vuga ko ari Perezida, Kabarebe na Kayonga batatu’ nibyo biri bushoboke kuko uwo dushaka ni Perezida.”

“Bagomba kuba baramuhaye amafaranga menshi ariko icyo bashaka ni uguhirika ubutegetsi buriho, bagamije guca intege uburyo abaturage bayobowe.”

Izindi kirazira mu Ngabo z’u Rwanda ni ugukunda ubuzima bworoshye, kuvugaguzwa no kuvuga ibidakwiye, guhubuka no kwigerezaho ndetse no gushaka kumenya ibintu byose harimo ibyo udakeneye mu kazi ushinzwe.

Kuba ntibindeba, kutita ku bintu, guhunga inshingano, kugerageza kwerekana ko urusha abandi uburwanashyaka kandi imikorere atari myiza nabyo birazira mu ngabo z’u Rwanda.

RDF igaragaza kutazuyaza mu guhana cyangwa kwirukana abasirikare barenze ku ndangagaciro, aho nko kuri ubu hari abasirikare batanu bari mu rukiko bashinjwa ibyaha byo gufata ku ngufu abagore, gukubita abaturage no guta akazi byakorewe mu mudugudu wa Kangondo II ahazwi nko muri Bannyahe, mu karere ka Gasabo muri Mata 2020.

Umwaka ushize kandi Urukiko rw’Ubujurire rwakatiye Col Tom Byabagamba na Rtd Brig Gen Frank Rusagara igifungo cy’imyaka 15 nyuma yo guhamywa ibyaha birimo gusuzugura ibendera ry’igihugu, kwamamaza nkana ibihuha no kugomesha rubanda arwangisha ubutegetsi buriho, gukora igikorwa kigamije gusebya Leta ari Umuyobozi ndetse no gutunga imbunda binyuranije n’amategeko.

Byabagamba kandi kuri ubu ari mu rukiko aho akurikiranyweho ikindi cyaha yakoreye muri gereza cy’ubujura.

Hari izindi manza zitandukanye ziri mu nkiko zigaragaramo bamwe mu basirikare bagiye batatira inshingano, nk’abatorotse, abagambanye n’ibindi.

Mu gitabo cy’amategeko ahana ibyaha mu Rwanda, hagaragaramo ibindi bintu bibijujwe ku basirikare ndetse iyo bikozwe bishobora gutuma umusirikare afungwa cyangwa akamburwa impeta n’amapeti, gusubiza inyuma mu ntera n’ibindi.

Muri ibyo byaha harimo nk’ubugambanyi, gutoroka igisirikare, gusinda mu kazi; ibyaha by’urukozasoni; gukubita cyangwa gukomeretsa bikabije; ubwambuzi bushukana; ubujura; ubuhemu n’ibindi.

Indangagaciro zo gukunda no kurengera igihugu nizo ziza ku isonga muri RDF, uzirenzeho agahanwa bikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .