00:00:00 IGIHE NETWORK KN KINYARWANDA EN ENGLISH FR FRANCAIS

Ibintu bitandatu byagufasha kwirinda kwibagirwa

Yanditswe na Bukuru JC
Kuya 8 July 2022 saa 12:36
Yasuwe :

Gufata mu mutwe ni kimwe mu bintu by’ingenzi bifasha mu buzima bwa buri munsi, icyakora uko umuntu akura, agenda arushaho kwinjira mu byago byo guhora yibagirwa.

Gusa Dr. Richard Restak, impuguke mu bijyanye n’imikorere y’ubwonko, akaba n’umwarimu muri Kaminuza ya George Washington Hospital University, agaragaza ko hari uburyo butanu ushobora gukoresha mu rwego rwo kwirinda kujya wibagirwa bya hato na hato, bikaba ingenzi gutangira kubikora hakiri kare, kugira ngo umunsi wageze mu zabukuru ubwonko bwawe buzabe bufite ubushobozi bwo kwibuka vuba.

Jya wita ku kintu uri kureba

Rimwe na rimwe hari ubwo umuntu ashobora gukeka ko afite ikibazo cyo kwibagirwa, nyamara ikibazo nyamukuru afite ari uko ubwo yarebaga, cyangwa yumvaga amakuru yifuza gufata mu mutwe, atabihaye umwanya bikwiriye, ugasanga yabikoraga abivanga no kurangara, bityo ubwonko ntibushobore kubika ayo makuru neza.

Birumvikana ko iyo utafashe amakuru neza mu mutwe, bigora cyane ubwonko mu gihe uri kugerageza kuyibuka, kuko ntayo buba bufite. Ni muri urwo rwego ari ingenzi ko mu gihe wifuza gufata amakuru runaka mu mutwe, ari ngombwa ko uyitaho cyane mu gihe uri kuyareba cyangwa kuyumva, ibyo bikazagufasha mu gihe wifuza kuyibuka.

Jya witoza kwibuka

Nk’uko umubiri ushobora kuwukoresha imyitozo runaka, n’ubwonko ushobora kubutoza kwibuka. Uburyo bikorwamo ni uko ushobora kujya ushyiraho intego z’ibintu ugomba kwibuka, kandi ukagerageza kuzikurikiza.

Nk’urugero, niba ugiye guhaha ibintu, aho kugira ngo ubyandike ku rupapuro cyangwa muri telefoni, ushobora kugerageza kujya kubihaha nta kintu witwaje kikwibutsa, wanakitwaza ukirinda kukirebaho kugeza urangije guhaha.

Uyu mwitozo wakoreshwa mu byiciro bitandukanye, aho ushobora kuwukorera mu rugo, ku kazi n’ahandi hatandukanye.

Kina imikino y’ikoranabuhanga n’imyitozo ngororamubiri

Imikino ivugwa hano ni imikino ishobora gukinirwa kuri internet cyangwa indi mikino y’ikoranabuhanga. Iyi mikino ifasha ubwonko gukora vuba no kujya bwibuka amakuru atandukanye bushobora kuza gukenera mu mukino, byose bigatuma burushaho kwitoza gufata mu mutwe.

Ikindi ni uko imikino isanzwe, kimwe n’imyitozo ngororamubiri nabyo ari ingenzi cyane mu gutuma ubwonko bukora neza muri rusange, ku buryo ari kimwe mu byagufasha kujya wibuka ibyo wafashe mu mutwe.

Jya usoma ibitabo

Gusoma ibitabo ni ikintu cy’ingenzi cyane ku mikorere myiza y’ubwonko. Iyo usomye ibitabo, ukabisoma ushishikaye atari ibyo kubinyuramo gusa, bifasha cyane ubwonko bwawe, ku buryo burushaho gukora neza mu buryo bwo gufata ibyamezo ariko bukanibuka amakuru runaka.

Genzura uburyo ukoresha ikoranabuhanga

Kimwe mu bibazo bituma umuntu yibagirwa ni uko ahora abona amakuru yose akeneye bidasanzwe ko ubwonko buyabika, bikagera ubwo butangira gutakaza ubushobozi bwo kubika amakuru, cyangwa se gufata mu mutwe.

Ibi bishoboka kubera ko usanga mu Isi y’iki gihe, ibintu byose umuntu ashaka kuza kwibuka yifashisha ikoranabuhanga nka telefoni, ku buryo hari n’abo usanga na password bakoresha mu bintu by’ingenzi zibitse muri telefoni cyangwa irindi koranabuhanga.

Ibi ntabwo ari byiza kuko bikora icyo twagereranya no kumugaza igice cy’ubwonko gishinzwe kwibuka, kikaba nk’aho nta nshingano kigifite bityo kigatakaza ubushobozi bwacyo.

Mu gihe ari ngombwa, birumvikana ko hari amakuru ukwiriye kubika muri telefoni, kuko nanone hafi 80% by’ibyo umuntu abonye arabyibagirwa, ariko ni ingenzi cyane kwirinda gukoresha ubu buryo gusa, ahubwo ukajya unagerageza amakuru y’ingenzi wumva ushaka kwibuka ukayafata mu mutwe, ugakoresha telefoni gusa igihe wananiwe kuyibuka.

[Suzuma niba kwibagirwa atari ikimenyetso cy’ibindi bibazo

Kwibagirwa cyane kandi mu buryo buhoraho bishobora kuba ikimenyetso cy’ibindi bibazo by’ubuzima birimo nk’uburwayi bw’agahinda gakabije n’ubundi.

Niyo mpamvu mu gihe uhora wibagirwa utuntu duto kandi bikabaho inshuro nyinshi, ari ingenzi cyane gusuzuma niba iki atari ikibazo cyerekana ibindi bibazo ushobora kuba ufite ariko utabizi.

Nk’urugero, ushobora umwanya waparitsemo imodoka yawe muri parikingi nini, ibi bigafatwa nko kwibagirwa bisanzwe, ariko nko mu gihe wibagiwe uburyo wageze muri iyo pariki, ukibagirwa inzira wanyuzemo cyangwa gahunda y’ingenzi wari bujyemo, ibyo ni ibimenyetso by’uko kwibagirwa kwawe gushobora kuba gukabije, bityo ukeneye kujya gusuzuma niba bidaterwa n’ibindi bibazo.

Ku rundi ruhande, kwibagirwa bishobora guterwa n’ibyo urya cyangwa unywa. Nko kunywa inzoga nyinshi igihe kinini bishobora kugutera ibyago byo kujya wibagirwa. Bimwe mu byagufasha kugira ubushobozi bwo kwibuka, uretse ibyo tukarutseho, harimo kuruhuka bihagije, kwiga ubumenyi bushya buri gihe, kumenya indimi nyinshi n’ibindi bitandukanye.

Indi nyungu iri mu kwitoza kwibuka ni uko n’iyo bigeze mu gihe cy’izabukuru, umuntu aba agifite ubushobozi bwo kwibuka ugereranyije n’umuntu utarabyitoje.

Abantu bafite ibibazo byo kwibagirwa bashobora gutoza ubwonko bwabo kwibuka vuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .