00:00:00 IGIHE NETWORK KN KINYARWANDA EN ENGLISH FR FRANCAIS

Huye: Urubyiruko rwasabwe kugira ubushake bwo kwiga amateka ya Jenoside yakorewe Abatutsi

Yanditswe na Prudence Kwizera
Kuya 21 May 2022 saa 06:54
Yasuwe :

Minisiteri y’Ubumwe bw’Abanyarwanda n’Inshingano Mboneragihugu, yasabye urubyiruko kugira inyota yo gushaka kumenya ukuri ku mateka ya Jenoside yakorewe Abatutsi mu 1994, rugakoresha ubwo bumenyi mu kwigisha abashaka guhakana no kugoreka aya mateka.

Ibi byagarutsweho kuri uyu wa Gatanu tariki ya 20 Gicurasi 2022 ubwo hibukwaga urubyiruko rwazize Jenoside yakorewe Abatutsi mu 1994.

Iki gikorwa cyabereye muri Kaminuza y’u Rwanda (UR), Ishami rya Huye, gifite insanganyamatsiko igira iti "Urubyiruko twahisemo kuba umwe igihango cyacu."

Umuyobozi w’Akarere ka Huye, Ange Sebutege, yavuze ko urubyiruko rukwiye kugira ubumenyi bugirira akamaro igihugu.

Yagize ati "Ni umwanya wo kuzirikana ko ubumenyi budafite ubumuntu bworeka imbaga kuko twarabibonye hano, aho abarimu n’abanyeshuri bagize uruhare muri Jenoside yakorewe Abatutsi."

Umuyobozi wa Kaminuza y’u Rwanda Ishami rya Huye, Dr. Muleefu Alphonse, yavuze ko urubyiruko rukwiriye kurebera ku bikorwa by’urundi rubyiruko rwagize uruhare mu kubohora igihugu.

Ati "Urubyiruko rwijanditse muri Jenoside ariko dufite n’ingero nyinshi z’urubyiruko rwabaye indashyikirwa. Murabizi urubyiruko rw’i Nyange rwakoze ibintu bidasanzwe n’abantu bakuru batabashaga gukora, rwanga kwitandukanya."

Muhayisa Assoumpta ukuriye Ishami ryo kwibuka no gukumira Jenoside muri Minisiteri y’Ubumwe bw’Abanyarwanda n’Inshingano Mboneragihugu, yasabye urubyiruko gufata iya mbere bakarwanya abagoreka amateka kandi bakagira inyota yo kumenya ukuri.

Ati “Mube abana bafite inyota yo kwiga, yo gutega amatwi no kumva kandi munashishikare mumenye ngo ’uyu ibyo ambwiye nibyo?’ Niba ari umubyeyi wawe ukubeshye, ukagera imbere ukibonera ukuri, ubitekerezeho neza ushyire mu gaciro."

Muri icyo gikorwa, urubyiruko rusaga 1500 nirwo rwari ruteraniye muri Kaminuza y’u Rwanda, aho abasaga 300 ari abahagarariye abandi mu Nama Nkuru y’Igihugu y’Urubyiruko baturutse mu turere twa Huye, Gisagara, Nyamagabe na Nyaruguru.

Umuyobozi w'Akarere ka Huye, Ange Sebutege, yavuze ko urubyiruko rukwiye kugira ubumenyi bugirira akamaro igihugu
Abayobozi batandukanye bari baje muri iki gikorwa
Urubyiruko rwasabwe kugira ubushake bwo kwiga amateka ya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .