Hemejwe ko imibiri yabonetse mu kibuga cy’indege cya Gisenyi ari iy’abazize Jenoside

Yanditswe na Mukwaya Olivier
Kuya 20 Mutarama 2020 saa 09:41
Yasuwe :
0 0

Minisitiri w’ubutabera, Johnston Busingye yakuye urujijo ku mibiri yabonetse mu kibuga cy’indege cya Gisenyi itari yakamenyekanye, yemeza ko ari iy’abazize Jenoside yakorewe Abatutsi.

Minisitiri Busingye yavuze ko iyo mibiri igomba gushyingurwa mu cyubahiro vuba.

Ibi yabyemeje nyuma y’uruzinduko yakoreye mu kibuga cy’indege cya Gisenyi kuri iki Cyumweru aherekejwe n’Umunyamabanga Nshingwabikorwa wa Komisiyo ishinzwe kurwanya Jenoside, CNLG.

Nyuma yo gusura ahabonetse imibiri 141 mu kibuga cy’indege cya Gisenyi, bagiranye ikiganiro n’itangazamakuru bavuga ko basanze ari imibiri y’inzirakarengane zazize Jenoside yakorewe Abatutsi.

Umunyamabanga Nshingwabikorwa wa CNLG, Dr Bizimana Jean Damascène yavuze ko nta mpamvu yo gushidikanya agendeye ku mateka yaranze Gisenyi.

Ati’’Sinumva naho impaka zava ko iyi mibiri itari iy’abazize Jenoside yakorewe abatutsi kuko iki gihugu cyabayemo Jenoside kandi abantu bishwe ni abatutsi. Dusanzwe dufite amakuru ko hari abantu bahiciwe haba mu mujyi no muri Komine zari ziwukikije, bikozwe n’abasirikare n’imitwe y’interahamwe cyane cyane muri 1993 mu kwezi kwa cyenda ubwo hatangizwaga umutwe witwaga Turi Hose uyobowe na Lt Col Anathole Nsengiyumva.”

Bizimana yavuze ko uwo mutwe watorezwaga mu Bigogwe uhabwa imyitozo ya gisirikare, bavayo bakajya kwica abatutsi mu giturage kandi abicwaga ngo ntawe uzi aho babashyinguye.

Yakomeje agira ati “Aho Habyarimana yabaga hari raporo zerekana ko uwahayoboraga witwa Lt Col Jean Berchmas Nshimyumuremyi n’abasirikare yari ayoboye. Hari abatutsi bishe nabo ntituramenya aho babashyize, byashoboka ko ari abo ngabo. Bivuze ko iyi mibiri ari iyo muri 1994 cyangwa mbere yaho’’

Minisitiri w’ubutabera , Busingye Johnston agendeye ku makuru yatanzwe nuko imibiri yari imeze n’aho yabonetse, yemeje ko ari iy’abatutsi bishwe.

Ati “Ku birebana n’iyi mibiri, iyo urebye n’ahandi twagiye tuyibona mu gihugu nta gushidikanya kwagombye kubaho. Biba bifite uko bigaragara iyo ugenzuye hari ibimenyetso bikwereka ko ari ubwicanyi bwakozwe imibiri bakayizana aho kuko byari binagoranye kuhagera.”

Busingye yavuze ko bagiye gushaka umunsi wa vuba iyo mibiri igashyingurwa mu cyubahiro ari nako bakomeza gushakisha amakuru.

Yakomeje anenga abadatanga amakuru ngo batabazwa uko byagenze kandi babizi.

Iyi mibiri yabonetse kuwa 4 Mutarama 2020 mu masaha ya saa tanu ubwo abakozi bari barimo gukora imirimo yo kwagura ikibuga.

Mu bikorwa byo Kwibuka Jenoside yakorewe Abatutsi mu Karere ka Rubavu mu myaka ishize hagiye hasabwa gutangwa amakuru y’ahajugunywe imibiri y’Abatutsi bishwe muri kiriya gihe. Bivugwa ko hari abantu baburiwe irengero, hakaba n’abishwe bajugunywa mu irimbi riri ahari hiswe Komini Rouge n’ahandi.

Minisitiri Busingye yasabye ko iyo mibiri ishyingurwa mu cyubahiro mu gihe cya vuba
Bamaze gusura ahabonetse iyo mibiri, hemejwe ko ari iy'abatutsi bazize Jenoside
Umunyamabanga Nshingwabikorwa wa CNLG, Dr Bizimana Jean Damascène yavuze ko nta mpamvu yo gushidikanya agendeye ku mateka yaranze Gisenyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza