Hatangajwe abana bahize abandi mu kwandika inkuru zivuga kuri Coronavirus

Yanditswe na Ishimwe Deborah
Kuya 18 Nzeri 2020 saa 05:24
Yasuwe :
0 0

Umuryango Edified Generation Rwanda washinzwe n’abarihiwe amashuri na Imbuto Foundation watangaje amanota y’abahatanye mu irushanwa ryiswe “COVID-19 Essay writing Contest 2020” ryateguriwe abana bari mu rugo ngo bakomeze gushishikarira gusoma no kwandika.

Iri rushanwa ryashyiriweho abanyeshuri bari mu rugo, mu buryo bwo kwimakaza umuco wo kwandika no gusoma mu rubyiruko no gufasha gahunda yo kwigira mu rugo hifashishijwe ikoranabuhanga.

COVID-19 Essay writing Contest 2020 yitabiriwe n’abanyeshuri bo mu byiciro bitandukanye kuva ku biga mu mwaka wa mbere w’amashuri abanza kugera mu mwaka wa gatandatu w’amashuri yisumbuye.

Kuri uyu wa Gatanu, tariki ya 18 Nzeri 2020 nibwo hatangajwe amanota. Mu nkuru 289 zari zatanzwe muri aya marushanwa, inkuru 30 nizo zatsinze, zikaba zizabumbirwa mu gitabo kimwe kivuga amateka ya COVID-19, kizasohorwa n’Ikigo cy’Igihugu Gishinzwe Ishyinguranyandiko, RALSA.

Abatsinze bazahabwa ibihembo byabo ku munsi wo gusoza ukwezi ko kwandika, bizaba ku wa 21 Ukwakira. Harimo 11 ba mbere bazahabwa mudasobwa, abandi basigaye bakazahabwa ubufasha bw’amafaranga y’ishuri y’igihembwe cya mbere, n’ibikoresho by’ishuri.

Umuyobozi wa Edified Generation Rwanda, Ntirenganya Valens, yagize ati “Twatangaje inkuru 30 zahize izindi muri aya marushanwa yabereye mu turere dutanu aritwo Nyarugenge, Kicukiro, Bugesera na Kirehe. Utu turere tukaba twaratoranyijwe hagendewe ku kuba aritwo twibasiwe cyane na COVID-19, ariko ku bw’ingamba zo kwirinda iki cyorezo, ingendo hagati y’intara n’Umujyi wa Kigali zidakorwa, twahisemo guhitamo batatu mu batsinze baza guhagararira abandi muri iki gikorwa.”

Umwe mu batsinze wiga mu mwaka wa gatandatu w’amashuri yisumbuye, Giramana Lize, yavuze ko yanditse ku buzima bwa nyuma ya COVID-19 agaragaza ko ubukungu bw’igihugu buzamanuka bitewe n’imihindukire y’uburyo bw’imikorere.

Yagize ati “Bitewe n’ingamba zo guhangana na COVID-19,hari ibikorwa byagiye bihagarikwa hari n’abakozi bagiye bagabanywa ku kazi, bityo umusaruro w’ibikorwa nawo ukagabanuka.”

“Bitewe n’uko ibikorwa byinshi ubu bikorerwa ku ikoranabuhanga umuntu yibereye mu rugo, mbona kuzongera gusubira ku murongo bizagorana.”

Kanamugire Camille wari uhagarariye Ikigo cy’Igihugu cy’Uburezi (REB) yavuze ko kwandika no gusoma byongerera umunyeshuri ubumenyi.

Yagize ati “Umwana agomba gusoma akanandika kuko bikuza ubwonko bwe bikanabwongerera ubumenyi, bikanatuma azaba umuntu ufite ibitekerezo byiza byubaka umuryango Nyarwanda. Kuri ubu turasaba uruhare runini ababyeyi bagafasha abana gusoma no kwandika kugira amashuri azatangire umwana atarasubiye inyuma.”

Uretse iri rushanwa Edified Generation itegura, isanzwe ikora n’ibindi bikorwa byo guteza imbere umuryango Nyarwanda birimo guteza imbere urubyiruko no kurihira bamwe mu bana batabona amafaranga y’ishuri.

Giramata Lize uri mu batsinze ni we wahagarariye abiga mu mwaka wa Gatandatu w'amashuri yisumbuye
Amarushanwa yo kwandika no gusoma mu banyeshuri bari mu rugo agamije kubafasha kurushaho kunguka ubumenyi
Abayobozi ba Edified Generation Rwanda hamwe n'abafatanyabikorwa mu gikorwa cyo gutangaza amanota y'irushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .