Hashyizweho uburyo bwo kureba amakuru arebana n’ubutaka hifashishijwe ikoranabuhanga

Yanditswe na Ferdinand Maniraguha
Kuya 29 Ugushyingo 2020 saa 10:13
Yasuwe :
0 0

Ikigo gishinzwe imicungire n’imikoreshereze by’ubutaka mu Rwanda cyashyizeho uburyo bw’ikoranabuhanga buzajya bufasha abashaka kumenya amakuru ajyanye n’ubutaka kuyabona bakoresheje internet.

Iki kigo kivuga ko bigamije korohereza abashaka kumenya amakuru ajyanye n’ubutaka mu Rwanda ndetse no gushyigikira gahunda ya Leta yo guteza imbere ikoranabuhanga.

Ubu buryo ubukoresha azajya abashaka kumenya aho ubutaka buherereye (intara, akarere, Umurenge, akagari), ingano yabwo, Nyirabwo, uburyo ubutaka butunzwemo ni ukuvuga niba ari amasezerano y’ubukode burambye, cyangwa niba ari inkondabutaka.

Azajya kandi amenya niba buriho itambamira cyangwa se niba bwaratanzweho ingwate, icyo bwagenewe gukoreshwa, amakuru ku gishushanyo mbonera, niba hari ihererekanya ririmo kubukorerwaho muri ako kanya, igereranya ku giciro cyabwo kuri metero kare bitewe n’aho buherereye n’ibindi.

Itangazo Ikigo gishinzwe imicungire n’imikoreshereze b’ubutaka mu Rwanda cyashyize hanze rivuga ko ubwo buryo buzwi nka Land Information Inquiry Portal buboneka ku rubuga landinformation.rlma.rw

Nyuma yo kuvugururwa ngo rworohere abantu kurugeraho hakoreshejwe uburyo bwose bushoboka haba mudasobwa na telefone, tariki 26 Ugushyingo nibwo urwo rubuga rwatangiye gukoreshwa ku mugaragaro.

Mu itangazo bagize bati “Ushobora kurusura ukoresheje mudasobwa, tablet cyangwa telefone, bikaba bisaba mbere na mbere kurwiyandikishaho kugirango ubashe kurukoresha. Ubu buryo bw’ikoranabuhanga bufasha abantu aho bari hose ku isi bafite internet, kumenya amakuru y’ubutaka runaka igihe cyose babishakiye kandi bakabyikorera.”

Ubu buryo bushya buje bwunganira ubundi bwari busanzweho bukoresha telefone (*651#) aho byagaragaraga ko budafasha abantu benshi cyane cyane ababa hanze y’imbibi z’u Rwanda.

Guhera mu mwaka wa 2009 ubwo hatangiraga igikorwa cyo kubarura no kwandika ubutaka, Leta y’u Rwanda yashyizeho uburyo bwihariye bw’imicungire y’ubutaka binyuze mu buryo bw’ikoranabuhanga aho amakuru yose yerekeye ubutaka abitse, ubwo buryo bukanafasha mu koroshya serivisi zinyuranye zijyanye n’ubutaka.

Uburyo bw'Ikoranabuhanga bvwashyizweho bufasha abanyarwanda baba abari imbere mu gihugu cyangwa mu mahanga, kumenya amakuru ajyanye n'ubutaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .