Guverinoma mu nzira zo kwishyuza abishoboye bafite ababo mu bigo ngororamuco

Yanditswe na Evariste Nsengimana
Kuya 7 Gashyantare 2020 saa 11:58
Yasuwe :
0 0

Ikigo cy’Igihugu gishinzwe igororamuco (NRS) cyatangaje ko kirimo gusuzuma umushinga ushobora kuzatuma imiryango yishoboye ifite abantu barererwa mu bigo ngoromuco biri hirya no hino mu gihugu izajya yishyuzwa serivisi bahahererwa.

NRS ifite inshingano rusange yo guca imyitwarire yose ibangamira abaturage binyujijwe mu kugorora umuco, gutanga uburere, ubumenyi n’ubumenyingiro, aho ubusanzwe abahabwaga izo serivisi bazihabwa bacumbikiweyo kandi ku buntu.

Umuyobozi wa NRS, Bosenibamwe Aimee yabwiye IGIHE ko hari gahunda ihari yo gusuzuma uburyo imiryango yishoboye yazajya yishyura serivisi zihatangirwa mu rwego rwo kunganira Leta no gukomeza kwita ku nshingano z’abana babo.

Ati “Ni gahunda dutekereza tutarashyira mu bikorwa, nta nubwo turayemeza burundu ariko niho bishyira bigana. Leta imaze imyaka igera kuri 11 itangira ubuntu iyo serivisi yo gufasha abanyarwanda bahuye n’ibibazo byo kujya mu myitwarire y’ubuzererezi ariko ukabona bisa n’aho bifata indi ntera ndetse wabona ubwiyongere n’ubusabe bw’abantu basaba ko abana babo bajya mu igororamuco bagenda biyongera, bikagaragaza ko mu by’ukuri umuryango ntacyo utanga mu gukumira ibituma abana babo bajya mu buzererezi.”

Bosenibamwe yasobanuye ko usanga Leta ibikora yonyine nyamara ari igikorwa yakabaye ifatanya n’ababyeyi, cyane cyane abafite ubushobozi bwo kuba bakwita ku bana babo no kwishyura ibibatangwaho.

Ati “Twafashe umwanzuro rero ko abantu bose bajya mu bigo ngororamuco bashyirwa mu byiciro, aho bigaragara ko mu by’ukuri batashobora kwishyura ubufasha bahabwa, nka bariya baba bavuye mu mihanda, abafite ibibazo binyuranye bakeneye gufashwa na Leta nk’uko ifasha abatishoboye.”

Ibyo byiciro ngo nibyo bizagaragaza n’abafite ubushobozi bwo kuba barihirira abana babo ibibatangwaho mu gihe bari kwitabwaho, bakajya babitanga.

Ati “Iyo ugiye kureba mu by’ukuri n’abana b’inzererezi n’abandi bafite imyitwarire ibangamira abaturage, iteka biterwa n’aho umuntu aba yarakuriye. Umwana wese iyo akivuka aba ari umuziranenge, afite amahirwe yo kubaho neza. Uburere ahabwa nibyo bimuhindura. Ababyeyi bose bafashe ingamba zo kwita ku bana, bakabaha uburere bukwiriye, dushobora kuzagira abana bazira ubuzererezi n’imyitwarire mibi.”

Bosenibamwe avuga ko mu bigo ngororamuco hatangirwa uburere n’uburezi nk’ubundi Leta ishoramo amafaranga atari macye. NRS igaragaza ko nibura ku Kwezi Leta itanga miliyoni zisaga 70Frw ku kigo ngororamuco cya Iwawa gusa.

Ati “Birakwiye ko na bamwe bari mu cyiciro cy’abifite nabo bagira uruhare mu igororamuco ry’abana babo, cyane cyane ko iyo bagezemo bigiramo n’imyuga ibafasha kwiteza imbere, nk’uko n’abandi bose bajya mu mashuri asanzwe bishyura amafaranga y’ishuri y’abana babo.”

Bosenibamwe avuga ko kwita ku mwana ari inshingano za buri mubyeyi bityo n’uwo umwana acitse akishora mu bikorwa bibangamira abaturage bitamwambura inshingano zo gukomeza kumwitaho.

Ati “Iyo uri umubyeyi wabyaye umwana akakunanira, ntabwo bigukuraho inshingano zo gukomeza gukora ibishoboka kugira ngo agaruke ku murongo. Uba ugifite inshingano zo kumwitaho mu buryo ubwo aribwo bwose.”

Yakomeje agira ati “Tuzareba umuryango umwana akomokamo n’icyiciro yashyirwamo kugira ngo abashe kuba yafasha umwana we mu igororamuco. Byumvikane ko yaba ari umubyeyi uzanye umwana we mu kigo ngororamuco yishoboye, yaba ari wa mwana wacitse umuryango akajya mu buzererezi afite umuryango wishoboye, bose bashyirwa mu cyiciro kimwe.”

NRS igaragaza ko uyu mushinga nubwo inyigo yawo igikorwa, byanze bikunze uzashyirwa mu bikorwa.

Mu bigo bitatu bya Leta bigororerwamo abafite imyitwarire mibi birimo icya Iwawa, umwaka ushize cyari gifite urubyiruko rusaga 4294, Nyamagabe hari urubyiruko 1438, Gitagata ifite bana bari munsi y’imyaka 17 bangana na 350 n’abagore 275.

Ubushakashatsi bwakozwe na Komisiyo ishinzwe abana umwaka ushize, bwagaragaje ko mu mijyi minini y’igihugu harimo inzererezi 2882 aho abarenga 91% muri bo ari abahungu.

Kujyana umwana mu kigo ngororamuco, bishobora kuzajya byishyuzwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza