Dusubize amaso inyuma kuri 20 bakatiwe n’inkiko bafatwa nk’abacurabwenge ba Jenoside yakorewe Abatutsi

Yanditswe na Musangwa Arthur
Kuya 15 Kamena 2020 saa 09:10
Yasuwe :
0 0

Mu bukangurambaga Leta yateguye Jenoside yakorewe Abatutsi, ikanayishyira mu bikorwa yakoraga, yabwiraga Abahutu ko nibiroha muri Jenoside ari benshi ntawe uzabahana kuko nta gereza babona bakwirwamo cyangwa ngo babone inkiko zibacira imanza ngo zirangire.

Ibyiringiro byabo byayoyotse ingabo za FPR Inkotanyi zimaze guhagarika Jenoside kuko zihutiye gufata no gushyiraho uburyo abagize uruhare muri Jenoside bose bagezwa mu butabera binyuze mu nkiko zisanzwe, inkiko Gacaca, Umuryango Mpuzamahanga nawo utangiza urukiko mpanabyaha rwashyiriweho u Rwanda rwagize ruruhare rukomeye mu guhana ba ruharwa bari ku isonga muri Jenoside.

Nyuma y’imyaka igera kuri 26, twasubije amaso inyuma tugaruka ku bari ku isonga mu mugambi wa Jenoside bakatiwe n’inkiko zaba izo mu Rwanda, mpuzamahanga n’iz’ibihugu.

Col. Théoneste Bagosora

Col. Théoneste Bagosora ni umwe mu bakomeye mu ngabo zashyize mu bikorwa umugambi wa jenoside. Yavuzwe ko ubwo yari mu mishyikirano ya gisirikare yabereye i Byumba ahitwa i Ngondore, yeruye ko nta mututsi uzakandagira mu Ngabo z’u Rwanda, bikaba mu byishe amasezerano ya Arusha ndetse bikagaragaza ko umugambi wa Jenoside wari ushyizwe imbere n’ubutegetsi bw’icyo gihe.

Bagosora avuye i Byumba ngo nibwo yatangazaga ko agiye gutegura imperuka y’abatutsi.

Kuva mu 1990, Bagosora yashinjwe ko yatangiye ibikorwa byo kwica Abatutsi ndetse ku wa 4 Ukuboza 1991, Perezida Habyarimana ashyiraho Komisiyo yayoboraga afite inshingano yo kwiga no gutanga raporo ku kibazo cyabazaga ngo “Ni iki cyakorwa kugira ngo umwanzi atsindwe mu buryo bwa gisirikare, mu bw’itangazamakuru no mu bwa politiki.”

Muri 1992, Bagosora yategetse ibiro bikuru by’ingabo z’igihugu na Jandarumori gutegura lisiti z’abantu bazicwa. Muri Mata 1994, izo lisiti zakoreshejwe n’Interahamwe n’abasilikare mu kwica abantu. Guhera muri 1993, Bagosora yavuze kenshi ko ategura “Imperuka y’abatutsi. Mu 1993, Bagosora yatanze intwaro ku nterahamwe, anayobora imyitozo zahabwaga.

Guhera ku wa 6 Mata 1994, Bagosora niwe wari Umuyobozi mukuru utanga amabwiriza ku banyapolitiki n’abasirikare. Yakoresheje inama nyinshi zitanga amabwiriza yo kwica Abatutsi. Yatanze kandi amabwiriza yo kwica abanyapolitiki barimo Agatha Uwilingiyimana, Rucogoza Faustin n’abandi. Bagosora yakatiwe n’urukiko Mpanabyaha rwashyiriweho u Rwanda imyaka 35 y’igifungo.

Kambanda Jean

Kambanda Jean yabaye Minisitiri w’Intebe wa Leta y’Abatabazi yashyize mu bikorwa Jenoside yakorewe Abatutsi mu 1994. Azwi cyane mu mashusho yakwirakwijwe amugaragaza yambaye ikoti rya gisirikare, yereka abaturage uburyo bakwiriye gukoresha imbunda.

Uyu mugabo w’imyaka 64 wavukiye i Gishamvu muri Butare, mu rukiko yashinjwe ibyaha bitandukanye hagendewe ku kuba nka Minisitiri w’Intebe kuva kuwa 8 Mata 1994 kugeza kuwa 17 Nyakanga 1994, yarayoboye inama z’Abaminisitiri hakavugwa ku bwicanyi bwakorerwaga Abatutsi ariko ntagire icyo abikoraho mu kubihagarika.

Kuri ibyo hakiyongeraho no guhamagarira rubanda ubwicanyi bukuraho ubwoko bw’Abatutsi. Yanagize uruhare mu ikurwaho rya Perefe wa Butare, Jean-Baptiste Habyalimana, wari we wenyine wakomokaga mu Batutsi mu bayoboraga Perefegitura. Ibi byaje koroshya itangira ry’iyicwa ry’Abatutsi muri Butare.

Byongeye, hagati ya 8 Mata na 17 Nyakanga 1994 muri Butare na Gitarama, Jean Kambanda wakomokaga mu ishyaka rya MDR yakwirakwije imbunda mu baturage, zaje gukoreshwa mu kwica Abatutsi. Yashimangiraga ko imbunda itagomba kuba iy’umusirikare, buri wese agomba kumenya kuyikoresha.

Muri Mata 1994 yanagiye ategeka ko hashyirwaho za bariyeri, ari nazo zifashishijwe mu kugenzura indangamuntu, uwo basanze handitsemo ko ari Umututsi ntaharenge.

Mu 1998 yemeye ibyaha byose yaregwaga birimo icya Jenoside, ubugambanyi mu cyaha cya Jenoside, gushishikariza abaturage gukora Jenoside, kugira uruhare muri Jenoside n’ibyaha byibasiye inyokomuntu. Yahamwe n’ibyaha byose uko ari bitandatu yari akurikiranweho bifitanye isano na Jenoside yakorewe Abatutsi muri Mata 1994, akatirwa gufungwa burundu.

Gatete Jean Baptiste

Gatete Jean Baptiste ni umugabo wamenywe na benshi kubera ibikorwa byamuranze mu icurwa ry’umugambi wa Jenoside yakorewe Abatutsi mu 1994 no kuyishyira mu bikorwa, igahitana ubuzima bw’abasaga miliyoni imwe mu gihe cy’iminsi 100.

Yayoboye Komini Murambi kuva mu 1981 kugera 1993, ubu ni mu Karere ka Gatsibo mu Burasirazuba bw’u Rwanda. Gatete Jean Baptitse kandi yabaye Umuyobozi Mukuru muri Minisiteri y’Umuryango n’Iterambere ry’Abari n’Abategarugori nyuma yo kuba Burugumesitiri wa Komini Murambi.

Urukiko mpanabyaha rwashyiriweho u Rwanda rwamukatiye imyaka 40 y’igifungo nyuma yo kumuhamya ibyaha bya Jenoside birimo gushishikariza abantu kwica, ndetse ko ari we wari inyuma y’urupfu rw’Abatutsi amagana bari bahungiye i Rwankuba, kuri Paruwasi ya Kiziguro ndetse n’iya Mukarange, bibwira ko ariho babona ubuhungiro hanyuma bakaza kuhasiga kwicwa.

Nyiramasuhuko Pauline

Nyiramasuhuko wavutse mu 1946, yabaye umugore wa mbere ku Isi wahamwe n’ibyaha bya Jenoside birindwi bidasanzwe yakoreye muri Jenoside yakorewe Abatutsi muri Mata 1994. Pauline Nyiramasuhuko yabaye Minisitiri w’Iterambere ry’umugore.

Muri Kamena 2011 Nyiramasuhuko yakatiwe burundu na ICTR nk’umwe mu bagore b’abanyapolitiki bari bakomeye mu gihe cya Jenoside. Yahamwe n’ibyaha bikomeye birimo kugira umugambi wa Jenoside no kuyitegura; kuyikora; gushishikariza kuyikora; ibyaha byibasiye inyokomuntu birimo iyicarubozo no gutegeka (interahamwe) gusambanya abakobwa n’abagore ku ngufu. Nyuma yarajuriye aza kugabanyirizwa igihano ahabwa imyaka 47 y’igifungo.

Padiri Seromba Athanase

Padiri Seromba Athanase yavukiye muri Komini Rutsiro mu mwaka 1963, muri Perefegitura ya Kibuye. Ubu ni mu Ntara y’Uburengerazuba. Paruwasi ya Nyange, aho yoherejwe gukorera nka padiri, yari muri Komini Kivumu, muri Diyosezi ya Nyundo.

Ku wa 16 Mata 1994, Abatutsi barenga 2000 basenyeweho Kiliziya ya Nyange, irabagwira barapfa. Padiri Seromba Athanase niwe watumije imashini ya Tingatinga, ategeka ko isenya iyo Kiliziya yari yuzuyemo Abatutsi.

Ku ya 6/2/2002, nibwo yishyikirije urukiko rwa Arusha. Ku itariki ya 12/03/2008, Padiri Seromba Athanase yakatiwe igihano cyo gufungwa burundu, n’ubwo atigeze yemera icyaha. Kuya 27/06/ 2009, uyu musaserdoti wa Diyosezi ya Nyundo yoherejwe mu gihugu cya Bénin aho azarangiriza igihano cye.

Mugesera Léon

Mugesera w’imyaka 68 ni umwe mu bari intiti mbere ya Jenoside yakorewe Abatutsi washishikarije Abahutu kwica Abatutsi.

Uyu mugabo wabaye umwarimu muri Kaminuza y’u Rwanda n’umuyobozi muri MRND yari ku butegetsi, urukiko Rukuru mu Rwanda rwamukatiye igihano cyo gufungwa burundu nyuma yo guhamwa n’ibyaha bya Jenoside n’ibindi byibasiye inyokomuntu yari akurikiranyweho.

Dr Mugesera yahamwe n’ibyaha birimo gushishikariza Abahutu mu buryo butaziguye kwica Abatutsi, gutoteza nk’icyaha cyibasiye inyokomuntu, no kubiba urwango rushingiye ku moko n’inkomoko.

Ni ibyaha ubushinjacyaha bushingiye ahanini ku butumwa bukubiye mu ijambo yavugiye ku Kabaya mu 1992 ryuje ingengabitekerezo n’amagambo atoteza, asebanya byose bigamije umugambi wa Jenoside.

Dr Léon Mugesera yagejejwe mu Rwanda mu 2012 yoherejwe na Canada ngo akurikiranwe ku byaha bya Jenoside n’ibyibasiye inyokomuntu.

Colonel Nsengiyumva Anatole

Colonel Nsengiyumva Anatole yari umukuru w’ingabo ku Gisenyi kuva tariki ya 13 Kamena 1993. Mbere, yari umuyobozi mukuru w’iperereza rya gisirikare.
Yashinjwaga kuba guhera mu 1993, yarayoboye imyitozo y’Interahamwe za MRND n’Impuzamugambi za CDR muri Gisenyi n’itangwa ry’intwaro.

Guhera ku wa 6 Mata 1994, abyumvikanyeho na Bagosora, Nsengiyumva yatangije Jenoside muri Gisenyi. Niwe wayiyoboye kandi henshi Abatutsi bishwe ahari.

Lt Colonel Nsengiyumva Anatole yavukiye mu yahoze ari Komini Satinsyi muri Perefegitura ya Gisenyi mu 1950. Yinjiye mu Ishuri ry’Abofisiye ry’i Kigali mu 1969, arisohokamo mu 1971 ari Sous-Lieutenant.

Yafatiwe muri Cameroun mu 1996 ajyanwa Arusha mu 1997. Urukiko rwamukatiye igifungo cy’imyaka 15.

Agnes Ntamabyariro

Ntamabyariro yabaye Minisitiri w’Ubutabera ku ngoma y’Abatabazi yashyize mu bikorwa Jenoside yakorewe Abatutsi. Yafunzwe mu 1997 afatiwe muri Zambia.

Mu 2009 yakatiwe gihano cyo gufungwa burundu n’Urukiko Rwisumbuye rwa Nyarugenge mu rubanza rwamaze imyaka itatu, nyuma yo gufungwa imyaka 12.

Ntamabyariro ni we mutegetsi wa mbere wo ku ngoma ya Habyarimana waburanishijwe n’inkiko z’u Rwanda.

Bikindi Simon

Bikindi Simon ni umwe mu rugero rw’uburyo ubuhanzi bukoreshejwe nabi bushobora koreka imbaga. Uyu yari umuhanzi w’umuhanga mu gucuranga no kuririmba mu buryo gakondo ariko indirimbo ze nizo zifashishijwe cyane mu bukangurambaga bwo gushishikariza abahutu kwica abatutsi.

Bikindi yabaye umwanditsi w’indirimbo, umuririmbyi n’umuyobozi w’Itorero ry’Imbyino gakondo ryitwaga ‘Irindiro’.

Ubwo FPR Inkotanyi yatangiraga urugamba rwo kubohora igihugu mu 1990, nibwo Bikindi yamenyekanye cyane asohora indirimbo zateraga ingufu ingabo za Leta yariho icyo gihe ndetse n’izindi zakanguriraga abahutu kwanga abatutsi.

Izo ndirimbo zacurangwaga kuri Radio Rwanda ndetse no kuri RTLM ifatwa nka radiyo yagize uruhare runini mu kongera ubukana bwa Jenoside yakorewe Abatutsi. Bikindi yahunze igihugu nyuma y’uko FPR Inkotanyi ihagaritse Jenoside
Yafatiwe i Leiden mu Buholandi tariki 12 Nyakanga 2001.

Mu Ukuboza 2008, Urukiko Mpuzamahanga Mpanabyaha rwashyiriweho u Rwanda rwamukatiye gufungwa imyaka 15 nyuma yo kumuhamya icyaha cyo gukangurira abantu kwanga abandi (incitation à la haine) mu gihe cya Jenoside.

Uwo mugabo wavukiye Rwerere muri Gisenyi, igifungo yakirangije ku wa 12 Kamena 2016, aguma muri Benin ari naho yaguye mu 2018 afite imyaka 64.

Ngeze Hassan

Itangazamakuru ryabaye umuyoboro ntagereranywa mu gukongeza no guhembera Jenoside yakorewe Abatutsi hirya no hino mu gihugu.

Ngeze yamenyekanye cyane ku nyandiko ze zirimo amategeko 10 y’Abahutu yasohoye mu kinyamakuru cye Kangura mu Ukwakira 1990, akubiyemo icengezamatwara ryo kwanga Abatutsi.

Uretse kandi inyandiko yacishaga muri iki kinyamakuru, Ngeze, yagize uruhare mu kwica Abatutsi mu yahoze ari Perefegitura ya Gisenyi, yavukagamo ubu ni mu Karere ka Rubavu.

Kuri ubu afungiye muri Mali, aho arangiriza igihano cy’imyaka 35 yakatiwe nyuma yo kujuririra icya burundu yari yahanishijwe mbere n’Urukiko Mpuzamahanga Mpanabyaha rwashyiriweho u Rwanda (ICTR).

Georges Henri Yvon Joseph Ruggiu

Ruggiu ni umwe mu banyamahanga mbarwa bagize uruhare rukomeye muri Jenoside yakorewe Abatutsi akanabihanirwa n’inkiko. Uyu mugabo wavutse tariki ya 12 ukwakira 1957 i Verviers mu Bubiligi, yabaye umunyamakuru wa Radiyo RTLM aho yifashishwaga mu gushishikariza Abahutu kwica Abatutsi akoresheje ururimi rw’Igifaransa.

Yageze kuri RTLM muri Mutarama 1994 hasigaye amezi make ngo indunduro ya Jenoside yakorewe abatutsi ibe.

George Ruggiu yatawe muri yombi tariki ya 23 Nyakanga 1997 i Mombasa mu gihugu cya Kenya, ahita ajyanwa Arusha muri Tanzania ku cyicaro cy’urukiko mpanabyaha rwashyiriweho u Rwanda.

Mu 2000 yakatiwe igifungo cy’imyaka irindwi ku byaha yashinjwaga byo gushishikariza abantu mu buryo butaziguye kandi ku mugaragaro gukora icyaha cya Jenoside, no gukora ibyaha byibasiye inyokomuntu. Yakatiwe igihano gito kuko yaburanye yemera icyaha.

Ngirumpatse Matayo na Edouard Karemera

Matayo Ngirumpatse yari Perezida w’Ishyaka MRND ryari ku butegetsi, ari naryo rivugwaho kuba ryari ku isonga mu gutegura no gushyira mu bikorwa jenoside yakorewe Abatutsi muri Mata 1994 mu gihe Edouard Karemera yari amwungirije ari na Minisitiri muri Guverinoma ya Habyarimana no muri Leta y’Abatabazi.

Ngirumpatse na Karemera bakatiwe gufungwa burundu n’Urukiko rwa Arusha nyuma yo guhamywa ibyaha bya Jenoside n’ibyibasiye inyokomuntu, byakorewe hirya no hino mu gihugu n’abanyamuryango b’ishyaka ryabo; by’umwihariko Interahamwe zari zikomeye ku mugambi wa Jenoside.

Aba bombi bahamijwe ibyaha kuwa 2 Gashyantare 2012, igihano gishimangirwa mu bujurire kuwa 29 Nzeri 2014.

Froduald Karamira

Karamira wavutse mu 1947 yari umucuruzi ukomeye muri Kigali akaba n’umunyapolitiki ari Visi Perezida mu ishyaka MDR ashyigikiye igice cya Hutu Power cyashishikarizaga abahutu kwanga abatutsi.

Mu Ukwakira 1993 yumvikanye ahamagarira abahutu kwirwanaho bakarwanya umwanzi wabinjiriye. Muri Kamena 1996 nibwo Karamira yafatiwe i Mumbai mu Buhinde yoherezwa kuburanira mu Rwanda.

Hejuru yo kubiba amacakubiri mu baturage, Karamira yanashinjwe guha intwaro no gukorana n’Interahamwe muri Jenoside yakorewe Abatutsi. Yarezwe kandi we ubwe kwica amagana y’abatutsi barimo na 13 bo mu muryango we.

Muri Gashyantare 1997 yahamijwe n’inkiko zo mu Rwanda ibyaha yeregwaga akatirwa kwicwa arashwe. Yajuririye icyo gihano ariko biba iby’ubusa ubujurire bwe buteshwa agaciro, arasirwa mu ruhame n’abandi bantu batatu tariki 24 Mata 1998.

Renzaho Tharcisse

Col. Tharcisse Renzaho muri Jenoside yakorewe Abatutsi yari Perefe w’Umujyi wa Kigali. Urukiko Mpuzamahanga rwashyiriweho u Rwanda rwamukatiye igifungo cya burundu rumaze kumuhamya ibyaha bya jenoside, ibyaha byibasira inyoko muntu (ubwicanyi no gufata ku ngufu), ubwicanyi no gufata ku ngufu arenga ku masezerano ya Geneve.

Urukiko rwavuze ko Renzaho yashyigikiye iyicwa ry’Abatutsi kuri bariyeri zari zashyizweho ariwe ubitegetse kandi ko yavuze amagambo ashyigikira ihohotera rishingiye ku gitsina ry’abagore bigatuma bafatwa ku ngufu.

Renzaho kandi yashinjwe kuba yaratanze intwaro zakoreshejwe mu kwica Abatutsi. Yahamwe kandi no kuba yari ari mu gitero cyahitanye Abatutsi amagana muri Kiliziya y’Umuryango Mutagatifu. Renzaho yayoboye igikorwa cyo kuvangura abantu bari bahungiye muri CELA, havanwamo Abatutsi bagera kuri 40 baricwa.

Ladislas Ntaganzwa

Ladislas Ntaganzwa woherejwe mu Rwanda na RDC mu 2016, yahamijwe ibyaha bya Jenoside n’Urukiko Rukuru mu Rugereko rwarwo ruburanisha ibyaha mpuzamahanga, akatirwa igifungo cya burundu.

Ntaganzwa wabaye Burugumesitiri w’iyahoze ari Komini Nyakizu ashinjwa kuba yaratanze amabwiriza yo kurasa imbaga yari yahungiye ku kibuga cya TTC Cyahinda, kandi ko abageragezaga guhunga basangaga batangatanzwe n’abandi bafite amacumu, ubuhiri, imihoro n’ibindi.

Ntaganzwa yatawe muri yombi ku wa 7 Ukuboza 2015 ahitwa Nyanzale muri Repubulika Iharanira Demokarasi ya Congo, RDC, agezwa mu Rwanda muri Werurwe 2016.

Pascal Simbikangwa

Capt Pascal Simbikangwa yakoraga mu kigo gishinzwe iperereza ku butugetsi bwa Perezida Juvenal Habyarimana, Yabanje gukora mu ngabo zarindaga umukuru w’Igihugu. Yari muramu wa Col. Elie Sagatwa, uyu Sagatwa akaba yari muramu wa Habyarimana n’umunyamabanga we wihariye.

Urukiko rw’ubujurire mu Bufaransa, mu 2016 rwamukatiye igifungo cy’imyaka 25 nyuma yo kumuhamya ibyaha bya Jenoside n’ibyibasiye inyokomuntu yakoreye mu Rwanda mu 1994.

Pascal Simbikangwa ashinjwa kugira uruhare mu ishyirwaho rya za bariyeri ziciweho Abatutsi benshi mu Mujyi wa Kigali no gutanga intwaro n’amabwiriza ku Nterahamwe.

Uyu mugabo wafatiwe mu birwa bya Mayottes mu 2008, yaburanaga ari mu kagare k’abafite ubumuga bitewe n’impanuka yakoze mu 1986.

Tito Barahira na Ngenzi Octavien

Mu 2016 Tito Barahira na Ngenzi Octavien bakatiwe n’urukiko rukuru rw’i Paris mu Bufaransa igifungo cya burundu, nyuma yo gusanga bahamwa n’ibyaha bya Jenoside yakorewe Abatutsi mu 1994.

Aba bombi bahamijwe kugira uruhare mu bwicanyi bw’abari bahungiye mu Kiliziya ya Paruwasi ya Kabarondo mu yahoze ari Komine Kabarondo basimburanyeho kuyobora ari ba Burugumesitiri hagati ya 1977 - 1994.

Dr Kayishema Clement

Dr Kayishema Clément yamamaye mu bwicanyi ubwo yari perefe wa Kibuye. Yavukiye muri Komini Gitesi (Kibuye) mu Murenge wa Bwishyura w’ubu (Karongi) muri 1954. Yakoze mu bitaro bya Kibuye ahava muri 1992 agizwe Perefe wa Kibuye kugeza muri 1994.

Ashinjwa kuba ari we wayoboye ubwicanyi bwose bwakorewe mu cyahoze ari Perefegitura ya Kibuye.

Tariki 12/06/1994 yandikiye ubwe minisitiri w’ingabo asaba ibikoresho bya gisirikare byo gutoza urubyiruko mu rwego rwo kongerera imbaraga Interahamwe hateganywa kuzajya kwica mu Bisesero.

Yahungiye mu yari Zaire aza gufatirwa muri Zambiya mu 1996 ajyanwa mu Rukiko Mpanabyaha Mpuzamahanga rwashyiriweho u Rwanda i Arusha mu gihugu cya Tanzania. Ku wa 21/05/1999 Dr Kayishema yakatiwe igifungo cya burundu.
Yaguye muri Gereza y’Umuryango w’Abibumbye muri Mali kuwa 29/10/2016 azize SIDA.

Munyakazi Laurent

General de Brigade Munyakazi ni we wari ushinzwe umutekano mu mujyi wa Kigali mu gihe cya Jenoside yakorewe Abatutsi.

Yahamijwe ibyaha bya Jenoside yakorewe Abatutsi 1994, birimo kuba yarayoboye ubwicanyi bwabereye kuri Kiriziya y’Umuryango Mutagatifu, akatirwa igihano cyo gufungwa burundu n’Urukiko rwa Gacaca rwo mu yahoze ari Segiteri Rugenge, mu Mujyi wa Kigali mu mwaka 2005. Yaguye muri gereza ya Kimironko mu 2013.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .