Diane Rutabana yamennye hasi amabanga y’imikoranire ya Uganda na RNC, yibutsa Nyamwasa ko na we ari umubyeyi

Yanditswe na IGIHE
Kuya 15 Ukwakira 2019 saa 06:40
Yasuwe :
0 0

Umugore wa Ben Rutabana witwa Diane Rutabana yandikiye ibaruwa inzego z’umutekano za Leta ya Uganda n’iza RNC, asaba kumenyeshwa irengero ry’umugabo we umaze ukwezi kurenga atazi aho ari.

Ben Rutabana, Komiseri ushinzwe amahugurwa muri RNC yahagurutse i Bruxelles ku wa Gatatu tariki 4 Nzeri 2019 saa 21:45 n’indege ya Emirates Airlines, agana i Entebbe muri Uganda. Yageze ku kibuga cy’indege cya Entebbe ku wa 5 Nzeri saa 13:50.

Guhera tariki 8 Nzeri, ntabwo umuryango we wongeye kumenya amakuru ya Rutabana wahagurutse avuga ko agiye mu butumwa bw’umutwe abarizwamo. Yagombaga gusubira mu Bubiligi ku wa 19 Nzeri nabwo akoresheje Emirates Airlines, ariko baramutegereje baraheba.

RNC yo yamwihakanye rugikubita, ivuga ko atari agiye mu butumwa bwayo.

Tariki 13 Ukwakira, Diane Rutabana yandikiye inzego z’umutekano za Uganda n’iza RNC, yinginga ngo bamubababrire bamumenyeshe aho umugabo aherereye kuko yizera ko bahazi, cyangwa se ngo bagirire imikoranire myiza bari bafitanye bamufashe gushakisha.

Iyo baruwa irimo amarangamurima menshi, Diane Rutabana yavuze ko iminsi 35 ishize umugabo we aburiwe irengero, ku buryo abana n’umuryango bahangayitse.

Ati “Umuryango we urahangayitse, abana barashaka kubona se , namwe mufite imiryango kandi muzi uburyo bibaza kubura uwo ukunda noneho mu gihe ntawe ushaka kuguha amakuru kuri Ben Rutabana, haba muri RNC cyangwa Uganda.”

Byari bisanzwe bivugwa ko Uganda yahaye rugari umutwe wa RNC ugakorera muri icyo gihugu ugamije guhungabanya umutekano w’u Rwanda, nyamara icyo gihugu kikabihakana.

Ibyo bihamywa kandi n’abanyarwanda bagiye bafungirwa muri icyo gihugu ku kagambane ka RNC kuko banze gukorana nayo, bagatotezwa bamwe bagakurizamo gupfa cyangwa bakajugunywa ku mupaka w’u Rwanda ari intere.

Mu ibaruwa Diane Rutabana yabivuye imuzi, agaragaza ko umugabo we ndetse n’abandi bambari ba RNC bakoranaga neza na Uganda kandi bajyagayo kenshi ntacyo bikanga, ari nacyo cyatumye umugabo we yumva ko kujyayo nta kibazo nubwo yari yaburiwe.

Ati “Tuzi ko Uganda ari igihugu giha umutekano impunzi by’umwihariko abanyarwanda kandi ifitanye umubano mwiza na RNC , ibi bivuze ko Rutabana ubwo yazaga muri Uganda nk’umwe mu bagize RNC yari yizeye umutekano we kandi n’abandi bakozi ba RNC barabizi kuko batembera kenshi muri Uganda.”

Umuryango wa Rutabana uvuga ko wakiriye amakuru ko yaba yarafunzwe binyuranyije n’amategeko n’abagize umutwe wa RUD Urunana, agambaniwe n’abarimo Frank Ntwali muramu wa Kayumba Nyamwasa.

Bavuga ko kandi Rutabana yahagurutse afitanye amakimbirane na Kayumba Nyamwasa uyobora ishami ry’umutekano muri RNC , ndetse ngo hari abari baramuburiye ko nasubira muri Uganda azahura n’akaga.

Diane Rutabana mu ibaruwa yavuze ko yagerageje kubaza abo muri RNC na Kayumba Nyamwasa ubwe, amakuru bamuhaye akamutera impungenge kurusha uko amuhumuriza.

Ati “Tariki 11 Ukwakira nasabye umwe mu nshuti za hafi z’umuryango wacu kumbariza Kayumba Nyamwasa akamenyesha ibyari bijyanye umugabo wanjye muri Uganda ngo tubishingireho tumenya icyaba cyaratumye aburirwa irengero , igisubizo cyavuye kuri Nyamwasa cyari giteye urujijo ahubwo kirushaho kumpangayikisha.”

Kuri Diane, ngo Kayumba Nyamwasa ntashaka ko bamenya aho Ben aherereye, akaba akeka ko biterwa wenda n’impamvu zari zatumye umugabo we ajya muri Uganda Kayumba adashaka gushyira hanze bigateza izindi ngaruka.

Ati “Ariko abana barahangayitse, rero Kayumba nk’umubyeyi yakabaye yumva impungenge zacu nibura akabwira abana niba umubyeyi wabo ameze neza.”

Nyuma yo kubura amakuru y’umugabo we muri RNC, Diane Rutabana ngo yitabaje inshuti ya Rutabana akaba n’Umuyobozi w’Urwego rw’Ubutasi mu gisirikare cya Uganda (CMI), Brig Gen Abel Kandiho.

Diane yibutsa Kandiho uburyo yari inshuti ikomeye ya Ben Rutabana ku buryo yajyaga anamuhamagara mu gicuku ntazuyaze kumwitaba. Nyamara igitangaje, ngo inshuro zose Diane yahamagaye Kandiho ngo amubaze iby’umugabo we, undi ntiyigeze amwitaba na rimwe.

Ati “Nagerageje kuvugisha Brig Gen Abel Kandiho umwe mu bayobozi b’inzego z’umutekano za Uganda akaba n’inshuti y’umugabo wanjye, ngira ngo mubaze niba yaba afite amakuru y’aho umugabo wanjye aherereye, ntabwo yigeze anyitaba inshuro zose namuhamagaye, byatumye icyizere kiyoyoka.”

Yongeyeho ati “Ku nzego z’umutekano za Uganda umugabo wanjye yakoranaga nazo bya hafi, twizeye ko mushobora kuba muzi aho aherereye kandi nubwo mwaba mutahazi, twizera neza ko imbaraga mufite mu karere , mwazifashisha mushakisha amakuru ashobora kutugabanyiriza agahinda. Kuri Brig Gen Abel Kandiho wakundaga kuvugana na Ben cyane kandi urabizi uburyo wajyaga umuhamagara mu gicuku akakwitaba, dufashe kumushakisha cyangwa se utubwire uko amerewe.”

Umugore wa Ben Rutabana avuga ko by’umwihariko Kayumba Nyamwasa azi neza aho umugabo we aherereye, akamusaba kwirengagiza amakimbirane yose ntakomeze kwicisha agahinda abana ba Rutabana.

Ati “Nk’umubyeyi rero ntutume abana ba Ben bicwa n’agahinda kuko tuzi neza ko uzi aho Ben Rutabana aherereye n’uko amerewe.”

Rutabana yakunze kugenda muri Uganda kimwe na bagenzi be bo muri RNC nta nkomyi, ari mu bikorwa bya RNC byo gushaka ubushobozi n’abayoboke, abifashijwemo n’inzego zirimo urushinzwe ubutasi bwa gisirikare, CMI n’urw’iperereza ry’imbere mu gihugu, ISO.

Rutabana yari afitanye ubwumvikane buke na Kayumba Nyamwasa, bashinjanya ko Kayumba ashaka kwiyegereza abo bafitanye isano, ndetse ngo Rutabana yababajwe n’abantu bafatiwe muri Congo mu mutwe wa P5 uyoborwa na Kayumba, ubu bari mu nkiko mu Rwanda.

Rutabana ngo yarakajwe n’uko inama ze zitubahirijwe kuko bajya gufatwa yari yababuriye.

Uburakari bwa Rutabana agashaka kwaka ibisobanuro Kayumba wagushije ingabo zabo mu biganza by’uwo bahanganye, ngo byaba impamvu yatumye ashaka ‘kumwumvisha’ kuko umusirikare muto yari ashatse kubaza byinshi ‘Jenerali’, ndetse bikekwa ko ubwo Rutabana yajyaga muri Uganda yari agiye mu bikorwa bya gisirikare, arenze ku gushaka kwa Kayumba.

Amakuru atandukanye ari kunyuzwa ku mbuga nkoranyambaga ariko adafitiwe gihamya, avuga ko Ben Rutabana yaba yariciwe muri Congo aciwe umutwe. Ngo yaba yicishijwe ku kagambane ka Kayumba ngo atazamena amabanga y’uwo mutwe na Uganda dore ko yari atangiye gushwana nabo.

Ben Rutabana (ibumoso) bivugwa ko yafashwe bigizwemo uruhare na CMI iyoborwa na Brig Gen Abel Kandiho(uri hagati), ku kagambane ka Kayumba Nyamwasa (uri iburyo).

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza