Coronavirus ku wa 28 Kamena: Abanduye barenze miliyoni 10, USA yihariye abarenga ¼

Yanditswe na Nkurunziza Ferdinand
Kuya 28 Kamena 2020 saa 10:45
Yasuwe :
0 0

Ubwandu bw’icyorezo cya COVID-19 bukomeje gukwirakwira hirya no hino ku isi, aho abamaze kubarurwa ko banduye iki cyorezo barenze miliyoni 10, mu gihe abamaze kugikira barenga 5,4.

Imibare yo kuri iki Cyumweru, tariki ya 28 Kamena 2020, yerekana ko abamaze guhitanwa na COVID-19 ku Isi yose barenga 501,437.

Leta Zunze Ubumwe za Amerika na Bresil ni byo bihugu bimaze kwibasirwa cyane n’iki cyorezo kurusha ibindi haba ku mibare y’abanduye n’abamaze gupfa bazize COVID-19.

Ibihugu bitandukanye ku Isi biri kugenda byoroshya ingamba byari byarashyizeho mu rwego rwo guca intege ikwirakwira ry’iki cyorezo zirimo ‘Guma mu Rugo’, nyamara hari ahatangiye kugaraga ubundi bwandu bushya nyuma yo koroshya ingamba.

Byinshi mu bihugu byo ku mugabane wa Aziya, Amerika n’u Burayi byatangiye gusubiza muri ‘Guma mu Rugo’ ibice bimwe na bimwe byagaragayemo abanduye bashya.

Abaturage bo muri Leta ya Texas yo muri Leta Zunze Ubumwe za Amerika no mu Mujyi wa Leicester wo mu Bwongereza bashobora gusubizwa mu rugo kuko ubwandu muri iyi mijyi bukomeje kwiyongera.

Leta ya Victoria yo muri Australia yategetse ko abayinjiramo bose bazajya babanza gupimwa COVID-19 mu gihe igihugu cya Ireland cyagumishijeho akato k’iminsi 14 ku Bongereza binjira mu gihugu.

U Bushinwa bwatangiriyemo COVID-19, bwongeye kubarura ubwandu bushya ku bantu 17 kuri iki cyumweru, barimo 14 bagaragaye mu Mujyi wa Beijing.

Mu Karere ka Afurika y’Iburasirazuba hamaze kubarurwa abanduye COVID-19 bagera ku 10 158, aho igihugu cya Kenya gikomeje kuza imbere mu kugira imibare iri hejuru, ubu hamaze kugaragara abagera ku 5811, abamaze gukira bo ni 1936, mu gihe abamaze kwitaba Imana bo ari 141.

Sudani y’Epfo imaze kubarura abanduye bagera ku 1942; u Rwanda rwo rumaze kubarura abaturage banduye COVID-19 bagera kuri 878; Uganda yo ifite abagera kuri 848; Tanzania ho ni 509, mu gihe u Burundi bwo bumaze kubarura abanduye 170.

Ku mugabane wa Afurika, ho hamaze kubarurwa abafashwe na COVID-19 bagera ku 374 639; Afurika y’Epfo ikaza imbere mu mibare y’abamaze kwandura kuko ifite abagera ku 131 800; ikaba ikubye kabiri Misiri iyikurikiye, imaze kubarura abanduye 63 923.

Leta Zunze Ubumwe za Amerika zonyinye zihariye abarenga 1/4 cy’abanduye ku isi hose, zimaze kubarura abagera kuri 2 596 770, mu gihe Bresil ya kabiri yo ikomeje no kugaragara nk’igicumbi gishya cya COVID-19, imaze kubarura abagera kuri 1 315 941.

Abanduye COVID-19 ku isi hose barenze miliyoni 10, USA yihariye abarenga ¼

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .